San Abi Trutru Waarde?

Te wi abi wan trutru warti sani, dan dati kan gi bigi prisiri. Ma san ben kan gi a bigi prisiri disi? Furu moni? Diri noso kefalek moi gowtu sani di no de fu feni furu? Biginen noso hei posisi? Furu sma e si den sani disi leki tumusi prenspari sani. Den sani disi di kari na tapusei e gi sma okasi fu bai den sani di den abi fanowdu, den kan gi a libi moro waarde, noso den kan meki taki wi e kisi a lespeki di wi leki libisma wani fu trawan èn taki wi e doro den marki di wi abi na ini wi libi. A de so taki wi e feti na baka den sortu sani disi, fu di wi e howpu taki den sa yepi wi fu doro den marki di wi abi gi a ten di e kon?

LIBISMA moro furu e si wan sani leki wan warti sani, te a sani dati e gi den san den abi fanowdu noso te a man meki den du san den lobi. Wi lobi sani di e meki wi firi bun èn di e gi wi a dyaranti taki sani sa waka bun nanga wi na ini a ten di e kon. Wi e warderi sani di e tyari frulekti kon wantewante; sani di e meki a libi moro switi, noso di e meki taki sma e lespeki wi. Ma ibritron baka tra sani de di wi lobi noso di wi wani. Fu dati ede a no de wan koni sani fu gebroiki den tra sani di wi lobi noso di wi wani ibritron baka, fu kon sabi san abi trutru waarde. Fu taki en leti, efu wi wani kon sabi san abi trutru waarde, dan wi musu kon frustan san na a moro prenspari sani di wi abi fanowdu.

San na a moro prenspari sani di wi abi fanowdu? Noti no abi waarde efu wan prenspari sani e misi — libi. Sondro libi, wi no ben o de. Kownu Salomo fu owruten Israèl ben skrifi: „Ma fu a sei fu den dedewan, den no sabi notinoti . . . No wan wroko noso prakseri noso sabi noso koni no de na ini Syeol [a grebi fu ala libisma]” (Preikiman 9:5, 10). Te wi dede, dan wi sa musu libi den gudu fu wi na baka. Fu dati ede, a moro prenspari sani di wi abi fanowdu, na fu kisi wan sani di sa kibri wi libi. San sa du dati?

San Sa Kibri Wi Libi?

„Moni na wan sani di e kibri sma”, na so Kownu Salomo ben taki (Preikiman 7:12). Te wi abi nofo moni, dan wi kan bai nyanyan èn so srefi wan bun oso. Moni kan meki taki wi man kisi a prisiri fu go na farawe presi. Te wi no man wroko moro fu di wi kon owru noso fu di  wi e siki, dan moni kan gi wi den sani di wi abi fanowdu. Moni kan tyari furu winimarki kon gi wi. Ma moni no man kibri wi libi. Na apostel Paulus ben gi Timoteus deki-ati nanga den wortu disi: „Komanderi den wan di gudu na ini a disiten seti fu sani fu no abi heimemre, èn fu no poti a howpu fu den tapu gudu di no e gi seikerfasi, ma tapu Gado” (1 Timoteus 6:17). Ala moni na grontapu no man bai libi gi wi.

Luku na ondrofenitori fu wan man di nen Hitoshi. Fu di Hitoshi ben kweki na ini wan pôti osofamiri, dati meki a ben abi a tranga winsi fu kon gudu. A ben bribi so tranga taki moni abi makti, dati a ben abi a denki srefi taki nanga yepi fu moni yu man meki sma du ala sani. Ne wan man kon na Hitoshi en oso èn a aksi en efu a ben sabi taki Yesus Krestes ben dede gi en. Na aksi disi meki taki Hitoshi ben wani sabi moro, bika a ben feni taki no wan sma ben o wani dede gi wan sma leki en. A go na wan konmakandra fu arki wan Bijbel publikitaki èn a no ben man bribi di a yere a rai di Bijbel e gi sma fu ’tan abi wan soifri ai’. A takiman fruklari taki wan „soifri ai” na wan ai di e si fara èn a e luku soso yeye afersi (Lukas 11:34). Na presi taki Hitoshi tan wroko tranga fu meki moni nomo, a bigin poti yeye markitiki na a fosi presi na ini en libi.

Materia gudu kan gi wi wan bun libi tu èn a kan gi wi seikerfasi so srefi. Te wi abi furu gudu, dan dati kan meki taki wi no sa abi fu broko wi ede nanga den sani di wi abi fanowdu ala dei. Te wi abi wan moi oso na ini wan moi birti, dan dati kande kan gi wi a firi taki sani e waka bun nanga wi. Moi krosi nanga wan moi oto kan meki taki wi e kisi lespeki fu trawan.

A de wan blesi fu ’si bun fu ala a tranga wroko fu wi’ (Preikiman 3:13). Èn te wi abi bun furu, dan dati kan yepi den lobiwan fu wi fu ’no broko den ede nanga noti, fu nyan, dringi, èn fu meki prisiri’. Ma materia sani abi waarde fu wan pisi ten nomo. Di Yesus Krestes ben warskow sma fu no abi bigi-ai, dan a taki: „Srefi te wan sma abi sani pasa marki, a libi fu en no e kon fu den sani di a abi” (Lukas 12:15-21). Awansi omeni materia gudu wi abi, den no sa man gi wi a dyaranti taki wi sa tan na libi.

Liz, fu gi wan eksempre, ben trow nanga wan man di ben abi furu moni. A e fruteri: „Wi ben abi wan moi oso nanga tu wagi, èn a moni di wi ben abi ben e gi wi okasi fu abi ala sortu materia sani di de fu feni na grontapu . . . Kande yu no man bribi en, ma toku mi ben e broko mi ede nanga moni.” A e fruklari: „Wi ben abi someni sani di wi ben kan lasi. A gersi taki o moro gudu yu abi, o moro mendri seikerfasi yu abi.”

Biginen nanga hei posisi na sani di furu sma e si leki tumusi prenspari sani so srefi, fu di den kan meki taki wi e kisi prèise èn so srefi grani fu trawan. Na ini a grontapu fu tide furu sma wani wan wroko di e pai bun moni. Te wi e leri fa fu gebroiki den aparti talenti noso koni fu wi na wan bun fasi, dan den kan yepi wi fu meki wan nen gi wisrefi. A kan de so taki trawan e prèise wi, taki den abi bigi lespeki gi sani di wi e denki, èn kande den e du muiti fu tron wi mati. Ala den sani disi kan gi wi prisiri nanga satisfaksi. Ma te fu kaba, den sani disi no sa de moro. Salomo ben abi ala glori nanga makti di wan kownu ben kan abi, ma a ben kragi: „Sma no sa memre a koniwan noso a donwan moro te ten di no skotu. . . Sma sa frigiti den alamala trutru” (Preikiman 2:16). Biginen nanga hei posisi no e gi wi libi.

Wan stonpopki mekiman di nen Celo kon kisi furu warderi gi wan sani di warti moro leki biginen. Fu di a ben abi talenti, meki a kisi okasi fu teki leri di yepi en fu gebroiki den talenti disi moro bun. Syatu baka dati koranti nanga sabiman fu koniwroko ben prèise a wroko fu en. Furu fu den stonpopki fu en ben de fu si na ini den bigi foto fu Europa. Celo e fruteri: „Mi musu erken taki wan pisi ten a meki fu stonpopki ben de a moro prenspari sani na ini mi libi. Ma mi kon si taki efu mi ben o tan du a wroko fu mi, dan a ben o de neleki mi ben e dini tu masra (Mateus 6:24). Mi ben de seiker taki a moro prenspari sani di mi ben kan du, ben de fu preiki a bun nyunsu fu  Gado en Kownukondre. Fu dati e de mi teki a bosroiti fu tapu nanga mi wroko leki wan stonpopki mekiman.

San Abi a Moro Bigi Waarde?

Fu di noti no abi waarde efu libi no de, dan sortu sani de fu kisi di sa gi wi a dyaranti taki wi sa tan na libi? Ala libi e komopo fu Yehovah Gado (Psalm 36:9). Iya, „nanga yepi fu en wi abi libi èn wi e buweigi èn wi de” (Tori fu den Apostel 17:28). A e gi têgo libi leki presenti na den sma di a lobi (Romesma 6:23). San wi musu du fu man kisi a presenti disi?

Soso te wi abi wan krosibei matifasi nanga Yehovah, dan wi kan kisi a presenti fu têgo libi. Fu dati ede, efu Yehovah feni wi bun, dan dati abi moro bigi waarde leki iniwan tra sani di wi abi kande. Te Yehovah feni wi bun, dan wi kan fruwakti trutru koloku di sa tan fu têgo. Ma efu Gado no feni wi bun, dan wi kan kisi pori fu têgo. Fu dati ede, a krin fu si taki iniwan sani di sa yepi wi fu kisi wan bun matifasi nanga Yehovah, abi bigi waarde.

San Wi Musu Du

Wi musu kisi sabi efu wi wani taki sani waka bun nanga wi. Wi kan feni soifri sabi na ini Bijbel, Yehovah en Wortu. Bijbel wawan e fruteri wi san wi musu du fu plisi Gado. Fu dati ede wi musu studeri den Buku fu Bijbel bun. Te wi e meki muiti fu kon sabi ala san wi man fu Yehovah Gado nanga Yesus Krestes, dan wi sa kisi leki bakapisi fu dati ’sabi di wani taki têgo libi’ (Yohanes 17:3). So wan sabi na wan gudu di wi musu warderi!—Odo 2:1-5.

A sabi di wi e kisi fu Gado Wortu e meki taki wi man du ete wan tra sani — wi kan sori taki wi e bribi na ini Yesus Krestes. Yehovah gi a komando taki ala sma di e kon na en musu du dati nanga yepi fu Yesus (Yohanes 14:6). Fu taki en leti, „no wan tra sma de di kan gi frulusu” (Tori fu den Apostel 4:12). Te fu kaba, a no ’solfru noso gowtu . . . , ma a warti brudu fu Krestes’ sa gi wi frulusu (1 Petrus 1:18, 19). Wi musu sori taki wi e bribi dati, fu di wi e bribi den leri fu Yesus èn wi e waka baka na eksempre fu en (Hebrewsma 12:1-3; 1 Petrus 2:21). Èn na ofrandi fu Krestes abi trutru waarde! Den winimarki di sa kon leki bakapisi fu dati, sa meki taki a heri libisma famiri sa kisi têgo libi na ini a ten di e kon. Te den winimarki disi sa de fu kisi dorodoro fu a bun fu wi, dan dati wani taki dati wi kisi a trutru warti presenti fu têgo libi.—Yohanes 3:16.

Yesus ben taki: „Yu musu lobi Yehovah, yu Gado, nanga yu heri ati en nanga yu heri sili èn nanga yu heri frustan” (Mateus 22:37). Te wi lobi Yehovah, dan dati wani taki dati wi musu „hori den komando fu en” (1 Yohanes 5:3). Yehovah e gi wi komando fu tan aparti fu grontapu, wi musu tan tyari wisrefi na wan fasi di Gado feni bun, èn wi musu horibaka gi en Kownukondre na wan getrow fasi. Na so fasi wi e „frukisi libi” na presi fu dede (Deuteronomium 30:19). Efu wi e ’kon krosibei fu Gado, dan a sa kon krosibei fu wi’.—Yakobus 4:8.

A dyaranti taki Gado feni wi bun, warti furu tron moro leki ala den gudu na grontapu. Den sma di abi a dyaranti dati na den moro gudu sma na grontapu! We, fu dati ede, meki wi du san de fanowdu so taki Yehovah feni wi bun, bika dati na a gudu di abi trutru waarde. Iya, meki wi gi yesi na a rai fu Paulus: „Suku regtfardikifasi, suku fu gi yusrefi na ini a dini fu Gado, suku bribi, suku lobi, suku fu horidoro, èn suku fu abi safri-atifasi. Feti a tumusi bun feti fu a bribi, grabu a têgo libi bun steifi.”—1 Timoteus 6:11, 12.

[Prenki na tapu bladzijde 21]

San yu e si leki wan tumusi warti sani? Moni, materia gudu, biginen, noso wan tra sani?

[Prenki na tapu bladzijde 23]

Wi musu studeri den Buku fu Bijbel bun