Wi Na Den Sma Di Abi Bribi

Meki a Bun Nyunsu Bekènti na den Aleisi Gron fu Taiwan

NOFOTRON Taiwan e kisi bun furu alen. Fu dati ede, den kan koti aleisi drape tu tron ibri yari. Ma wanwan leisi, na alen no e kon na a ten di a musu kon. Dati meki den yongu aleisi di prani, e dede. Te disi e pasa, dan a gronman e tapu fu prani? Nôno. A sabi taki a de fanowdu fu horidoro. A e prani nyun yongu aleisi èn a e poti den baka na ini a gron. Efu sani waka moro bun baka dati, dan a gronman sa koti furu aleisi. Sontron a praniwroko nanga a kotiwroko na yeye fasi gersi a sani disi.

Horidoro na ini a Kotiwroko na Yeye Fasi

Na ini den yari di pasa, Yehovah Kotoigi na ini Taiwan wroko tranga fu prani èn fu feni siri fu Bijbel waarheid na ini kontren pe furu sma no ben e arki. Wan eksempre na a Distrikt Miao-li. Wanwan leisi, den brada ben e meki muiti fu gi kotoigi na ini a kontren, ma wan tu sma nomo ben e arki te Kotoigi ben kon na den. Fu dati ede, na ini 1973 den ben seni wan trowpaar di ben de spesrutu pionier go drape fu wroko leki furuten Kownukondre preikiman. Na ini a bigin, son sma ben wani sabi moro fu a bun nyunsu. Ma heri esi, dati ben kenki. Baka dati, den ben seni den spesrutu pionier go na wan tra kontren.

Na ini 1991, den ben poti tu tra spesrutu pionier na wroko drape. Ma agen, a fasi fa sani ben waka ben sori taki a situwâsi drape no ben bun ete fu meki sani gro na yeye fasi. Baka wan tu yari, den ben poti den spesrutu pionier na wroko na presi pe den ben e howpu taki moro sma ben sa arki. So bun, a gron ben tan wan pisi ten sondro taki wan sma ben prani na en tapu.

Muiti Di Meki Baka E Tyari Bun Bakapisi Kon

Na ini a bigi pisi kondre fu Taiwan, kontren ben de pe wan gemeente no ben abi a frantwortu fu wroko den. Na ini september 1998, a bosroiti ben teki fu meki muiti fu go suku den kontren pe moro sma de di ben sa wani arki. Fa disi ben o pasa? Nanga yepi fu so wan 40 pisi-ten spesrutu pionier di ben kisi a wroko fu go na den presi pe furu sma e libi, èn pe no wan gemeente ben abi a frantwortu fu wroko den kontren disi.

Na ini a Distrikt Miao-li, tu foto de sei makandra di den spesrutu pionier ben kisi gi a preikiwaka disi. Fo sisa di no trow, ben musu wroko drape gi dri mun fu luku efu den sma ben o wani arki te den ben o gi den kotoigi. Syatu baka di den doro drape, dan den ben skrifi fayafaya fu fa den ben miti someni sma di ben wani kon sabi moro. Na a ten di den kaba den dri mun fu pionierwroko na ini a kontren, dan den ben e hori furu oso-bijbelstudie. Den ben seti wan bukustudie grupu tu nanga yepi fu wan owruman fu wan gemeente di de krosibei fu a presi.

Dri fu den sisa disi ben taki krinkrin taki den ben sa wani go doro fu sorgu gi den „yongu prani” di ben e gro so bun. Fu dati ede, tu fu den sisa ben kisi fu wroko leki fasti spesrutu pionier èn a di fu dri sisa ben go doro fu wroko drape leki gewoon pionier. Wan owruman fu a gemeente di de krosibei fu a presi, ben froisi go na a kontren fu yepi den. Moro leki 60 sma ben de na a fosi publikitaki di ben hori na a kontren dati. Now a gemeente di de krosibei, e yepi a yongu grupu disi fu hori konmakandra ibri sonde, boiti taki den abi wan tu bukustudie kaba. A kan, taki wan nyun gemeente sa kon na ini a kontren heri esi.

 A Hori Di Den Horidoro E Tyari Blesi Kon na Tra Presi fu Taiwan

Sma na tra kontren ben handri na wan srefi sortu fasi. Na ini a Distrikt I-lan na a noord-owstusei fu na èilanti, wan nyun Gemeente Bukustudie ben seti na ini a kontren pe den pisi-ten spesrutu pionier ben wroko.

Wan mofoneti, di wan sisa di de wan pisi-ten spesrutu pionier ben go oso fu oso, dan a ben miti wan yonkuman èn a ben sori en wan papira di e sori o ten den gemeente konmakandra e hori. A yonkuman ben aksi wantewante: „Mi kan kon na a konmakandra tamara neti? Efu mi kan kon, dan san mi musu weri?” Fosi a pionier disi denki, a ben musu hori aiti bijbelstudie ibri wiki nanga sma di ben wani kon sabi moro. Syatu baka dati, wan tu fu den bijbelstudenti ben e prakseri fu tron preikiman fu a bun nyunsu tu, nanga a marki fu teki dopu.

Wan tra sma na ini a srefi foto disi ben go na kerki someni yari kaba, ma a no ben man feni wan sma di ben kan leri en kon sabi Bijbel. Di na uma disi ben yere fu a seti fu bijbelstudie, dan a ben teki na okasi wantewante. A ben kisi deki-ati fu sreka a les fu en na fesi. Di a sisa, di ben du a pisi-ten spesrutu pionierwroko, doro fu hori a studie dan a ben kon sabi taki na uma ben du en „skorowroko”. A ben bai wan buku pe a ben skrifi den aksi fu a pisi di a ben musu studeri. Dan a ben skrifi san a ben o piki tapu ibri aksi. Na ini en buku a ben skrifi ala den tekst tu di kari na ini en les. Di a sisa doro drape fu hori a fosi studie, dan na uma ben sreka den fosi dri les kaba!

Den srefi sortu bakapisi ben de fu si na ini a foto Dongshih di de na a mindrisei pisi fu Taiwan. Den pisi-ten spesrutu pionier ben pristeri moro leki 2000 brochure na ini den dri mun di den ben wroko drape. Na a di fu dri mun den ben hori 16 oso-bijbelstudie. Tapu 21 september 1999, wan gronseki di ben feni presi na a mindrisei pisi fu Taiwan, ben pori a moro bigi pisi fu a foto. Toku son sma di wani kon sabi moro, e go doro fu go na fesi na yeye fasi. Disi den e du ala di a e teki pikinmoro wan yuru fu go na den konmakandra na ini a moro krosibei Kownukondre zaal. Iya, a de fanowdu fu horidoro so taki wi kan koti furu sani awansi a de sani di wi prani trutru noso sani di wi prani na yeye fasi.

[Karta na tapu bladzijde 8]

(Efu yu wani si pe den sani disi skrifi, luku a tijdschrift)

CHINA

Taiwan Kanari

TAIWAN

[Sma di abi a reti fu a karta]

Mountain High Maps® Copyright © 1997 Digital Wisdom, Inc.