Kownukondre Preikiman E Fruteri

Yepi Ala Sortu Sma na ini Bakrakondre

ABRAHAM ben de wan man di ben abi wan aparti sortu bribi. „Di [Gado] ben kari en”, na so na apostel Paulus ben taki, dan Abraham ben gi yesi na Gado sten èn „ben gowe, ala di a no ben sabi pe a ben e go.” Baka di Abraham ben froisi en heri famiri, dan a „ben tan leki wan freimdesma na ini a kondre fu a pramisi” ete wan hondro yari fu en libi.​—Hebrewsma 11:8, 9.

Na so a de tu na ini a ten disi, taki furu Yehovah Kotoigi teki a tyalensi fu froisi go na wan tra kondre fu kan dini pe a nowtu de moro bigi. Trawan leri wan tra tongo so taki den kan gi kotoigi na sma fu tra kondre di kon libi na ini a kondre fu den. Soleki fa den ondrofenitori di e kon now e sori, dan a moi yeye disi opo „wan bigi doro di e tyari go na aktiviteit” na ini Bakrakondre pe fu den 15 milyun sma, pikinmoro wán milyun sma de fu tra kondre.​—1 Korentesma 16:9.

□ Bahram, wan sma di fosifosi ben leri trawan Kung Fu, ben kon fu wan kondre na Mindri Owstusei. A ben kisi wan Bijbel èn wan tu Waktitoren publikâsi. Baka wán mun, Bahram ben kon frustan taki a ben feni a waarheid. Wan studie ben bigin na en nanga en wefi, ma wan problema ben de — a sma di ben leri den a Bijbel, no ben taki a tongo fu den. Den ben taki nanga makandra nanga yepi fu gebaar, „nanga yepi fu anu nanga futu”, soleki fa den e memre. Baka wan pisi ten, Bahram nanga en wefi ben man feni wan gemeente pe den ben taki a tongo fu den, èn baka dati den ben gro esi-esi. Now Bahram na wan dopu Kotoigi.

□ Wan pionier paar fu Bakrakondre ben waka go miti wan man fu Indonesia di ben e tanapu na fesi wan wenkri. A man ben prisiri di a paar ben taki nanga en na ini en eigi tongo. Baka dati den ben meki mofo fu fisiti en na en oso. Den ben kon sabi taki a ben libi na Rosiakondre moro leki 20 yari, èn na ini a ten dati a ben tron wan datra di e luku a gosontu fu umasma. A ben taki dati a no ben bribi na ini wan gado, ma a ben erken taki ibri leisi te a ben yepi wan uma fu meki wan pikin, dan a ben musu taki nanga fruwondru: „¡Libisma skin moi trutru! ¡Na wan wondru!” A ben wani studeri Bijbel, èn syatu baka dati a ben kon bribi taki wan Kriaman de di e broko en ede nanga libisma (1 Petrus 5:6, 7). Now a de wan dopu brada èn a e dini makandra nanga na Indonesia gemeente na Amsterdam.

□ Na Rotterdam, wan fu den moro bigi sipi lanpe na grontapu, wan pionier grupu kon kisi a koni fu preiki gi sma fu difrenti tongo, di e kon na syoro ibri dei. Leki wan bakapisi fu a wroko fu a fayafaya grupu preikiman disi, difrenti sipiman, so srefi wan kapten, wan srudati di e wroko na se, èn wan man di ben de wan bodyguard fosi, teki a waarheid. Now den srefi e yepi fu panya a bun nyunsu fu Gado Kownukondre na heri grontapu.​—Mateus 24:14.

Neleki fa a de na tra presi na grontapu, na so Yehovah Kotoigi na Bakrakondre abi wan fasti bosroiti fu du san den musu du fu meki a têgo bun nyunsu bekènti na ibri nâsi, lo, tongo, nanga pipel.​—Openbaring 14:6