Kapitel 10

A kownoekondre foe Gado e tiri

1, 2. Fa libisma tirimakti sori foe no de boen?

KANDE a pasa nanga joe taki joe bai wan aparaat èn te foe kaba joe si taki a no ben wroko. Kon meki wi taki dati joe ben tjari en gi wan man di kan meki sani baka. Ma sjatoe baka di a man meki na aparaat baka, a broko. Dati troetroe ben meki joe lasi-ati!

² Na so a de toe nanga libisma tirimakti. Ala ten libisma ben angri foe wan tirimakti di ben sa djaranti vrede nanga kolokoe. Tokoe a tranga moeiti di sma meki foe bow a libimakandra baka, no abi troetroe boen bakapisi. Wan heri ipi kroederi gi vrede meki, ma baka dati sma no ben hori densrefi na den. Boiti dati, sortoe tirimakti ben man roetoe pôtifasi poeroe, noso a desko di sma e desko makandra, ogridoe, siki, nanga a pori di sma e pori na ekologie? Libisma tiri no man meki kon boen baka. Srefi a koni kownoe Salomo foe Israèl ben aksi: „Foe taki foe a sma foe grontapoe, fa a kan sabi en pasi?” — Odo 20:24.

3. (a) San ben de a moro prenspari tori di Jesus ben preiki foe en? (b) San son sma e taki foe Gado Kownoekondre?

³ No lasi-ati! Wan tirimakti na heri grontapoe di poti steifi no de soso wan dren. A ben de a moro prenspari tori di Jesus ben preiki foe en. A ben kari en „a kownoekondre foe Gado”, èn a ben leri den bakaman foe en foe begi gi dati (Lukas 11:2; 21:31). A no de foe taki, dati son sma ini relisi groepoe e taki son tron foe Gado Kownoekondre. Foe taki en leti, ala dei miljoenmiljoen sma e begi foe en te den e begi a Wi Tata Begi ibri tron baka (a begi disi den e kari a model begi toe). Ma sma e gi difrenti piki te joe e aksi den: „San na a Kownoekondre foe Gado?” Son sma e taki: „A de na ini joe ati.” Trawan e kari en hemel. Bijbel e gi wan krin piki soleki fa wi sa si.

 WAN KOWNOEKONDRE NANGA WAN MARKI

4, 5. Foe san ede Jehovah ben bosroiti foe tjari wan njoen fasi kon foe sori a soevereiniteit foe en, èn san disi sa doe?

⁴ Ala ten Jehovah Gado ben de Kownoe, noso Soeverein Tiriman, foe na universum. Foe di en ben meki ala sani, meki dati e gi en a hei posisi dati (1 Kroniki 29:11; Psalm 103:19; Tori foe den Apostel 4:24). Ma a Kownoekondre di Jesus ben preiki foe en, de na ondro na universeel soevereiniteit foe Gado. A Mesian Kownoekondre dati abi wan spesroetoe marki, ma san na a marki?

⁵ Soleki fa ben froeklari kaba na ini kapitel 6, dan a fosi libisma paar ben opo densrefi teige a makti foe Gado. Foe den strei ede di ben tjari kon na fesi, meki Jehovah ben bosroiti foe tjari wan njoen fasi kon foe sori a soevereiniteit foe en. Gado ben meki a prakseri foe en bekènti, foe meki wan „siri” kon di ben sa masi a Sneki, Satan, èn poeroe den bakapisi foe a sondoe di libisma ben kisi foe Adam nanga Eva. A moro prenspari „siri” na Jesus Krestes, èn „a kownoekondre foe Gado” na a wrokosani di sa wini Satan krinkrin. Jesus Krestes sa gebroiki a Kownoekondre disi foe poti a tirimakti baka di sa tiri grontapoe ini a nen foe Jehovah èn A sa regtfardiki a soevereiniteit foe Gado foe ala ten di A abi reti na tapoe. — Genesis 3:15; Psalm 2:2-9.

6, 7. (a) Pe a Kownoekondre de, èn soema na a Kownoe nanga den kompe tiriman foe en? (b) Soema na den borgoe foe a Kownoekondre?

⁶ Akroederi wan vertaling foe den wortoe di Jesus ben taigi den ogri-ati Fariseiman, dan a ben taki: „Gadokondre . . . de na oen ini” (Lukas 17:21, Njoe Testament Nanga dem Psalm). Jesus ben wani taki dati a Kownoekondre ben de na ini na ogri ati foe den kroeka man dati? Nôno. Wan moro soifri vertaling foe a fosi Grikitongo e taki so: „A kownoekondre foe Gado de na oen mindri” (New World Translation). So boen, Jesus di ben de na den mindri, ben sori na tapoe ensrefi leki a Kownoe foe a ten di ben o kon. Gado Kownoekondre kwetikweti no de wan sani di de na ini na ati foe wan sma, ma a de wan troetroe tirimakti di e tiri èn di abi wan tiriman nanga borgoe. Na wan hemel tirimakti, foe di den e kari en „a kownoekondre foe hemel” èn  so srefi „a kownoekondre foe Gado” (Mateus 13:11; Lukas 8:10). Ini wan fisjoen, a profeiti Danièl ben si a Tiriman foe a kownoekondre leki „wan sma di gersi wan manpikin foe libisma”, di den ben tjari go na fesi na Almakti Gado èn di ben kisi „tirimakti [di e tan] nanga wartifasi nanga kownoekondre, so taki den pipel, nationaal groepoe, nanga tongo, den alamala moesoe dini en” (Danièl 7:13, 14). Soema na a Kownoe disi? We, bijbel e kari Jesus Krestes „a Manpikin foe libisma” (Mateus 12:40; Lukas 17:26). Ija, Jehovah ben poti en Manpikin, Jesus Krestes, na wroko foe de Kownoe.

⁷ A no Jesus wawan e tiri. Makandra nanga en joe abi 144.000 sma di „bai foe grontapoe”, foe de den kompe kownoe nanga priester foe en (Openbaring 5:9, 10; 14:1, 3; Lukas 22:28-30). Den borgoe foe Gado Kownoekondre sa de wan famiri foe libisma na heri grontapoe, di e saka densrefi na ondro a fesimanwroko foe Krestes (Psalm 72:7, 8). Ma fa wi kan de seiker, taki a Kownoekondre sa regtfardiki a soevereiniteit foe Gado troetroe èn taki a sa meki a fasi fa a paradijs ben de, kon boen baka na wi grontapoe?

A TROEFASI FOE A KOWNOEKONDRE FOE GADO

8, 9. (a) Fa wi ben sa kan agersi a getrowfasi foe den Kownoekondre pramisi foe Gado? (b) Foe san ede wi kan de seiker taki a Kownoekondre na wan troetroe sani?

⁸ Kon meki wi taki dati wan faja bron joe oso. Now wan mati di abi ala sani di de fanowdoe foe bow wan oso, e pramisi joe foe jepi bow joe oso baka èn foe gi joe osofamiri njanjan. Efoe a mati dati ala ten de eerlijk nanga joe, dan joe no ben sa bribi en? Kon meki wi taki dati joe ben komoto na wroko e go na oso a tra dei èn joe ben si taki wrokoman ben bigin kaba foe poeroe den sani di tan abra foe na oso di bron èn taki sma ben tjari njanjan kon gi joe osofamiri. Tweifri no de taki joe ben sa abi ala froetrow taki, te foe kaba, sani no ben sa kon boen baka wawan, ma taki den ben sa de srefi moro boen leki fosi.

⁹ Na a srefi fasi Jehovah e gi wi a djaranti taki a Kownoekondre de wan troetroe sani. Soleki fa a bijbel boekoe Hebrewsma  e sori, dan foeroe pisi foe a Wet ben prenki a Kownoekondre seti (Hebrewsma 10:1). Profeititori di ben sori na fesi fa a Kownoekondre foe Gado ben o de, ben de krin foe si toe ini a kownoekondre foe Israèl na grontapoe. Dati no ben de wan gewoon tirimakti, bika den tiriman ben sidon na tapoe a „kownoestoeroe foe Jehovah” (1 Kroniki 29:23). Boiti dati, den ben taki na fesi: „A tiritiki foe a tiriman no sa komoto na Juda, èn so toe a komanderiman-tiki na mindri en foetoe, te leki Silo e kon; èn na en den pipel sa gi jesi” (Genesis 49:10) *. Ija, a ben de ini a famirilin disi foe den kownoe foe Juda taki Jesus ben o gebore, èn foe ala ten a ben o de a Kownoe foe Gado tirimakti. — Lukas 1:32, 33.

10. (a) O ten a fondamenti foe Gado Mesian Kownoekondre ben poti? (b) Na ini sortoe prenspari wroko den sma di ben o de kompe tiriman foe Jesus na ini a ten di ben o kon, ben sa teki fesi na grontapoe?

¹⁰ A fondamenti foe a Mesian Kownoekondre foe Gado ben poti di den ben teki den apostel poeroe na mindri trawan (Efeisesma 2:19, 20; Openbaring 21:14). Den disi ben de den fosiwan foe den 144.000 sma di ben sa tiri na hemel nanga Jesus Krestes leki kompe kownoe. So langa den sma di ben o de kompe tiriman na ini a ten di ben o kon, ben de na grontapoe ete, den ben o teki fesi ini a wroko foe gi kotoigi, soleki fa a komando foe Jesus ben de: „Go . . . èn meki disipel foe sma foe ala nâsi, èn dopoe den na ini a nen foe a Tata èn foe a Manpikin èn foe a santa jeje.” — Mateus 28:19.

11. Fa a Kownoekondre preikiwroko e doe na ini a ten disi, èn san a e doe?

¹¹ Na wan fasi di noiti no ben doe ete, sma e gi jesi now na a komando foe meki disipel. Jehovah Kotoigi e meki a boen njoensoe foe a Kownoekondre bekènti na heri grontapoe, akroederi den wortoe di Jesus ben taki na profeitifasi: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon” (Mateus 24:14). Leki wan pisi foe a Kownoekondre preikiwroko, wan bigi programa foe gi sma leri, e  feni presi now. Den wan di e saka densrefi na ondro den wet nanga den gronprakseri foe Gado Kownoekondre, e ondrofeni vrede nanga wánfasi kaba di libisma tirimakti no man tjari. Ala den sani disi e sori krin taki Gado Kownoekondre na wan troetroe sani!

12. (a) Foe san ede a fiti foe kari den Kownoekondre preikiman Jehovah Kotoigi? (b) Fa Gado Kownoekondre de tra fasi leki libisma tirimakti?

¹² Jehovah ben taigi den Israèlsma: „Oenoe na mi kotoigi, . . . ija, mi foetoeboi di mi froekisi” (Jesaja 43:10-12). Jesus, „a Getrow Kotoigi”, ben meki a boen njoensoe foe a Kownoekondre bekènti nanga faja (Openbaring 1:5; Mateus  4:17). So boen, a fiti taki den Kownoekondre preikiman na ini a ten disi e tjari a nen Jehovah Kotoigi, di Gado gi den. Ma foe san ede den Kotoigi e gebroiki someni ten nanga someni moeiti foe taki nanga tra sma foe Gado Kownoekondre? Den e doe disi bika a Kownoekondre na a wan-enkri howpoe gi a libisma famiri. Te foe kaba, libisma tirimakti sa kon na wan kaba, ma Gado Kownoekondre no sa kaba noiti. Jesaja 9:6, 7 e kari a Tiriman foe a Kownoekondre, Jesus, a „Granman foe Vrede” èn e taki moro fara: „Na a tiri leki granman di de pasa marki èn na vrede, wan kaba no sa kon.” Gado Kownoekondre no de leki den tirimakti foe libisma — tide den de èn tamara den fadon. Foe troe, Danièl 2:44 e taki: „A Gado foe hemel sa opo wan kownoekondre di noiti no sa kisi pori. Èn a kownoekondre srefi no sa gi abra na wan tra pipel. . . . Èn ensrefi sa tan te ten di no skotoe.”

13. (a) San na wan toe problema di Gado Kownoekondre sa handri nanga boen bakapisi? (b) Foe san ede wi kan de seiker taki den pramisi foe Gado sa kon troe?

¹³ Sortoe libisma kownoe ben kan tjari wan kaba kon na feti, ogridoe, siki, a dede di sma e dede foe angri ede, nanga a de di sma de sondro oso foe tan? Boiti dati, sortoe tiriman na grontapoe ben kan gi den wan di dede wan opobaka? Gado Kownoekondre nanga en Kownoe sa handri den afersi disi. A Kownoekondre no sa sori taki a no boen, neleki fa a de nanga wan wrokosani di no e wroko boen èn di ibri joeroe den moesoe meki en baka. Na presi foe dati, Gado Kownoekondre sa abi boen bakapisi, bika Jehovah e pramisi: „Mi wortoe di komoto na mi mofo . . . no sa drai kon baka na mi sondro boen bakapisi, ma a sa doe seiker a sani di mi abi prisiri na ini, èn seiker a sa abi boen bakapisi ini a sani di mi ben seni en foe doe” (Jesaja 55:11). A prakseri foe Gado no sa misi, ma o ten a Kownoekondre tiri ben o bigin?

A KOWNOEKONDRE TIRI — O TEN?

14. Sortoe fowtoe prakseri den disipel foe Jesus ben abi foe a Kownoekondre, ma san Jesus ben sabi foe en tirimakti?

¹⁴ „Masra, na ini a ten disi joe e opo a kownoekondre gi Israèl baka?” Na aksi disi di den disipel foe Jesus ben poti  gi en, ben tjari kon na krin taki den no ben sabi a marki foe Gado Kownoekondre ete èn a fasti ten di a ben o bigin tiri. Jesus ben warskow den foe no poti prakseri toemoesi foeroe na tapoe na afersi, èn ben taki: „A no de gi oenoe foe kisi sabi foe den ten noso pisi ten di a Tata poti na ondro en eigi makti.” Jesus ben sabi taki a tiri di a ben sa tiri grontapoe ben sa de wan sani gi a ten di ben moesoe kon ete, langa ten baka na opobaka foe en èn na opo di a ben opo go na hemel (Tori foe den Apostel 1:6-11; Lukas 19:11, 12, 15). Den Boekoe foe bijbel ben taki foe disi na fesi. Fa so?

15. Fa Psalm 110:1 e jepi wi foe kon froestan a ten di Jesus bigin tiri?

¹⁵ Kownoe David ben sori na wan profeitifasi go na Jesus leki „Masra”, di a ben taki: „A wortoe di Jehovah taigi mi Masra na: ’Go sidon na mi reti-anoe te leki mi poti den feanti foe joe leki wan foetoebangi gi joe foetoe.’” (Psalm 110:1; teki gersi Tori foe den Apostel 2:34-36.) A profeititori disi e sori taki a tirimakti foe Jesus no ben o bigin wantewante baka te a ben opo go na hemel. Na presi foe dati a ben sa wakti na a reti-anoe foe Gado (Hebrewsma 10:12, 13). O langa a ben sa tan wakti? O ten a tirimakti foe en ben o bigin? Bijbel e jepi wi foe feni den piki.

16. San ben pasa na ini 607 b.G.T., èn san disi ben abi foe doe nanga Gado Kownoekondre?

¹⁶ A wan-enkri foto na heri grontapoe pe Jehovah ben poti en nen na tapoe, ben de Jerusalem (1 Kownoe 11:36). A ben de so srefi a mamafoto foe wan kownoekondre na grontapoe di Gado ben feni boen èn di ben prenki a hemel Kownoekondre foe Gado. Foe dati ede, a pori di den Babilonsma ben pori Jerusalem na ini 607 b.G.T. ben wani taki foeroe. A sani disi di ben pasa, ben sori taki wan langa pisi ten ben bigin taki Gado no sa tiri a pipel foe en na grontapoe. So wan 600 jari na baka, Jesus ben sori taki a pisi ten disi pe Gado no ben e tiri, no ben kon na wan kaba ete, foe di a ben taki: „Den nâsi sa trapoe Jerusalem, te leki den fasti ten foe den nâsi kon na wan kaba.” — Lukas 21:24.

17. (a) San na „den fasti ten foe den nâsi”, èn o langa den ben o de? (b) O ten „den fasti ten foe den nâsi” ben bigin èn o ten den ben kaba?

¹⁷ Na ini a ten foe „den fasti ten foe den nâsi”, grontapoe  tirimakti ben sa kisi pasi foe poeroe a tirimakti di Gado ben feni boen. A pisi ten dati ben bigin nanga a pori foe Jerusalem na ini 607 b.G.T., èn Danièl ben sori taki a ben sa go doro „seibi ten” langa (Danièl 4:23-25). O langa dati de? Bijbel e sori taki dri nanga wan afoe „ten” de a srefi leki 1260 dei (Openbaring 12:6, 14). Toe tron a pisi ten dati, noso seibi ten, ben sa de 2520 dei. Ma no wan spesroetoe sani ben pasa na a kaba foe a sjatoe pisi ten dati. Te wi e teki ini a profeititori foe Danièl „wan dei foe wan jari”, èn e teri 2520 jari bigin foe 607 b.G.T., dan wi e doro na a jari 1914 G.T. — Numeri 14:34; Esekièl 4:6.

18. San Jesus ben doe sjatoe baka di a kisi Kownoekondre makti, èn sortoe bakapisi a ben abi gi grontapoe?

¹⁸ Jesus ben bigin tiri na hemel na a ten dati? Ini a tra kapitel wi sa taki foe den reide di den Boekoe foe bijbel e gi, taki a ben bigin tiri na a ten dati. A no de foe taki, dati a bigin foe Jesus tiri no ben sa de foe si foe di vrede ben o de wantewante na grontapoe. Openbaring 12:7-12 e sori taki sjatoe baka di Jesus kisi a Kownoekondre, a ben o trowe Satan nanga den ogri jeje engel poeroe na hemel. Disi ben sa wani taki heloe gi grontapoe, ma a e gi wi deki-ati te wi e leisi taki Didibri abi soso „wan sjatoe pisi ten” ete. Heri esi, wi sa man abi prisiri no soso foe di Gado Kownoekondre e tiri, ma so srefi foe di a sa tjari blesi kon gi grontapoe èn gi a libisma famiri di e gi jesi (Psalm 72:7, 8). Fa wi doe sabi taki disi sa pasa heri esi?

[Foetoewortoe]

ONDROSOEKOE A SABI FOE JOE

San na a Kownoekondre foe Gado, èn foe pe a e tiri?

Soema e tiri na ini a Kownoekondre, èn soema na den borgoe foe a Kownoekondre?

Fa Jehovah gi wi a djaranti taki en Kownoekondre de wan troetroe sani?

O ten „den fasti ten foe den nâsi” ben bigin èn o ten den ben kaba?

[Aksi foe a tori disi]

[Faki na tapoe bladzijde 94]

WAN TOE PRENSPARI SANI DI PASA DI ABI FOE DOE NANGA GADO KOWNOEKONDRE

• Jehovah e meki bekènti taki a abi na prakseri foe meki wan „siri” kon di ben sa masi na ede foe a Sneki, Satan Didibri. — Genesis 3:15.

• Na ini 1943 b.G.T., Jehovah ben sori taki a „siri” disi ben sa de wan libisma bakapikin foe Abraham. — Genesis 12:1-3, 7; 22:18.

• A Wet froebontoe di Israèl ben kisi foe Gado na ini 1513 b.G.T., e gi „wan prenki foe den boen sani di o kon”. — Exodus 24:6-8; Hebrewsma 10:1.

• A kownoekondre foe Israèl na grontapoe, e bigin na ini 1117 b.G.T., èn baka ten a e go doro na ini a famirilin foe David. — 1 Samuèl 11:15; 2 Samuèl 7:8, 16.

• Jerusalem kisi pori na ini 607 b.G.T., èn „den fasti ten foe den nâsi” e bigin. — 2 Kownoe 25:8-10, 25, 26; Lukas 21:24.

• Na ini 29 G.T. Jesus salfoe leki a Kownoe di Gado poti ma di no e wroko ete, èn a e bigin nanga en diniwroko na grontapoe. — Mateus 3:16, 17; 4:17; 21:9-11.

• Na ini 33 G.T. Jesus e opo go na hemel, foe wakti drape na a reti-anoe foe Gado, te leki a bigin tiri. — Tori foe den Apostel 5:30, 31; Hebrewsma 10:12, 13.

• Jesus e tron kownoe na ini a hemel Kownoekondre na ini 1914 G.T. te „den fasti ten foe den nâsi” kaba. — Openbaring 11:15.

• Den e trowe Satan nanga den ogri jeje foe en kon na ini a birti foe grontapoe èn den e tjari moro heloe kon gi a libisma famiri. — Openbaring 12:9-12.

• Jesus e tiri a preiki foe a boen njoensoe foe Gado Kownoekondre na heri grontapoe. — Mateus 24:14; 28:19, 20.