Kapitel Tina-aiti

Yehovah E Pramisi fu Pai Danièl na wan Tumusi Moi Fasi

1, 2. (a) Sortu prenspari eigifasi wan lonman musu abi fu man wini? (b) Fa na apostel Paulus ben agersi wan libi fu getrowfasi na ini a diniwroko fu Yehovah nanga wan streilon?

WAN lonman e langa ensrefi go na fesi fu doro a lasti strepi fu a streilon. Pikinmoro a no abi bro srefisrefi, ma fu di a e si a marki di a wani doro na en fesi, meki a e poti ala krakti na ini den lasti stap disi di no furu moro. ¡A e du ala muiti nanga ibri titei fu en skin, èn te fu kaba a e doro a strepi! A fesi fu en e sori taki en ati sidon èn taki a wini. A hori di a horidoro te na a kaba tyari bun bakapisi gi en.

² Na a kaba fu Danièl kapitel 12, wi e si taki a lobi profeiti e doro a lasti strepi fu en eigi „streilon” — a libi fu en na ini a diniwroko fu Yehovah. Baka di na apostel Paulus ben kari difrenti eksempre fu bribi na mindri den futuboi fu Yehovah di ben libi bifo a ten fu den Kresten, a ben skrifi: „Fu dati ede dan, fu di wi abi so wan bigi wolku kotoigi lontu wi, meki wi puru so srefi ibri hebi nanga a sondu di e kisi wi makriki, èn meki wi horidoro fu lon a streilon di poti na wi fesi, ala di wi e luku bun na Yesus, a Moro Prenspari Fesiman èn a Sma di e meki a bribi fu wi kon bun dorodoro. Fu a prisiri ede di ben poti na en fesi, meki a ben horidoro na wan pina-udu, a ben wisiwasi syen, èn a go sidon na a reti-anu fu a kownusturu fu Gado.”​—Hebrewsma 12:1, 2.

3. (a) San ben pusu Danièl fu „horidoro fu lon a streilon”? (b) Sortu dri aparti sani na engel fu Yehovah ben taigi Danièl?

³ Danièl ben de na mindri a „bigi wolku kotoigi” dati. Seiker a ben de wan sma di ben musu „horidoro fu lon a streilon”, èn trutru lobi gi Gado ben pusu en fu du dati. Yehovah ben tyari furu sani kon na krin gi Danièl ini a tori fu a tamara fu den grontapu tirimakti, ma now A ben seni a  deki-ati disi gi en: „Fu a sei fu yusrefi, waka miti a kaba; èn yu sa rostu, ma yu sa opo tanapu go na a presi fu yu na a kaba fu den dei” (Danièl 12:13). Na engel fu Yehovah ben e taigi Danièl dri aparti sani: (1) taki Danièl ben musu „waka miti a kaba”, (2) taki a ben sa „rostu” èn (3) taki a ben sa „opo baka”, na wan ten di de na en fesi. Fa den wortu disi kan gi Kresten deki-ati na ini a ten disi fu horidoro te na a lasti strepi na ini a streilon fu kisi libi?

„WAKA MITI A KABA”

4. San na engel fu Yehovah ben wani taki di a ben taki: „Waka miti a kaba”, èn fu san ede dati ben sa kan de wan tyalensi gi Danièl?

⁴ San na engel ben wani taki di a ben taigi Danièl: „Fu a sei fu yusrefi, waka miti a kaba”? A kaba fu san? We, fu di Danièl pikinmoro ben abi 100 yari, dan a de krin taki disi ben e sori go na a kaba fu en eigi libi, di kande ben de heri krosibei. * Na engel ben e gi Danièl tranga fu horidoro getrow te na dede. Ma dati no ben sa de so makriki. Danièl ben libi fu si fa den ben meki Babilon fadon èn fa wan fikapisi fu den Dyu katiboman ben drai go baka na Yuda nanga Yerusalem. A sani dati ben musu gi na owru profeiti furu prisiri. Ma wi no abi no wan tori di e sori taki a ben go nanga a grupu dati. Kande a ben owru tumusi èn ben swaki tumusi na a ten dati. Noso kande a ben de a wani fu Yehovah gi en fu tan na ini Babilon. Awansi fa a no fa, soleki fa wi kan fruwakti, dan wan sma ben sa kan aksi ensrefi efu Danièl no ben e firi pikinso sari di den kondreman fu en ben e go na Yuda.

5. San e sori taki Danièl ben horidoro te na a kaba?

⁵ Tweifri no de taki Danièl ben kisi furu krakti fu den switi wortu di na engel ben taki: „Waka miti a kaba.” A ben sa kan meki wi memre den wortu di Yesus Krestes ben taki so wan siksi yarihondro baka dati: „A sma di horidoro te na a kaba, na en sa kisi frulusu” (Mateus 24:13). Tweifri no de, taki dati  na san Danièl ben du. A ben horidoro te na a kaba èn na wan getrow fasi a ben lon a streilon fu kisi libi te na a kaba. Dati ben kan de wán sani fu san ede den e taki bun fu en na ini a Wortu fu Gado baka ten (Hebrewsma 11:32, 33). San ben meki taki Danièl ben man horidoro te na a kaba? A tori fu en libi e yepi wi fu piki na aksi disi.

HORIDORO LEKI WAN STUDENTI FU A WORTU FU GADO

6. Fa wi du sabi taki Danièl ben de wan fayafaya studenti fu a Wortu fu Gado?

⁶ Gi Danièl, horidoro te na a kaba ben wani taki fu tan studeri den tumusi moi pramisi fu Gado èn fu prakseri dipi fu den. Wi sabi taki Danièl ben de wan fayafaya studenti fu a Wortu fu Gado. Fu eksempre, na sortu tra fasi a ben kon sabi a pramisi di Yehovah ben gi Yeremia taki a katibo ben sa de 70 yari langa? Danièl srefi ben skrifi: „Misrefi . . . ben kon si nanga yepi fu den buku a nomru fu den yari” (Danièl 9:2; Yeremia 25:11, 12). Tweifri no de taki Danièl ben suku den buku fu a Wortu fu Gado di ben de na a ten dati. Den buku fu Moses, David, Salomo, Yesaya, Yeremia, Esekièl — awansi san Danièl ben kan kisi — seiker ben gi en furu prisiri yuru fu leisi den èn fu prakseri dipi fu den.

7. Sortu wini wi abi te wi e studeri a Wortu fu Gado, te wi e agersi a ten fu wi nanga a ten fu Danièl?

⁷ A de prenspari fu studeri a Wortu fu Gado èn teki en na ini wi, so taki wi man kweki horidoro na ini a ten disi (Romesma 15:4-6; 1 Timoteus 4:15). Èn wi abi a heri Bijbel di abi tori di skrifi na ini tu fu fa wan tu fu den profeititori fu Danièl ben kon tru hondrohondro yari baka ten. Moro fara, a de wan blesi taki wi e libi na ini „a ten fu a kaba” di den ben taki na fesi fu dati na Danièl 12:4. Na ini a ten fu wi, Gado blesi den salfuwan nanga yeye inzicht so taki den e skèin leki warskow faya fu waarheid na ini a grontapu disi di takru. Leki wan bakapisi fu dati, meki furu fu den dipi profeititori na ini a buku Danièl, di son wan fu den ben e dangra en, wani taki furu gi wi na ini a ten disi. Fu dati ede, meki wi tan  studeri a Wortu fu Gado ala dei, èn noiti si den sani disi leki sani di e kon fu densrefi. Te wi e du dati, dan a sa yepi wi fu horidoro.

DANIÈL BEN HORIDORO NA INI BEGI

8. Sortu eksempre Danièl ben gi ini a tori fu begi?

⁸ Begi ben yepi Danièl tu fu horidoro te na a kaba. Ala dei a ben go na Yehovah Gado na ini begi èn ben taki nanga en sondro fu kibri wan sani, nanga wan ati di ben furu nanga bribi èn nanga frutrow. A ben sabi taki Yehovah de a „Yereman fu begi”. (Psalm 65:2; teki gersi Hebrewsma 11:6.) Di na ati fu Danièl ben lai nanga sari fu di Israèl ben meki opruru, dan a ben fruteri Yehovah krinkrin fa a ben e firi (Danièl 9:4-19). Srefi di Darius ben gi a komando taki na en wawan, sma ben musu seni tranga begi gi 30 dei langa, dan Danièl no ben meki dati tapu en fu begi Yehovah Gado (Danièl 6:10). ¿A no e naki wi ati te wi si na ini wi prakseri fa a getrow owru man dati ben tyalensi wan olo di ben furu nanga lew, na presi fu poti a tumusi warti grani fu begi na wan sei? Tweifri no kan de taki Danièl ben waka miti en kaba na wan getrow fasi, ala di a ben e begi Yehovah fayafaya ala dei.

9. Fu san ede noiti wi no musu si a grani fu begi leki wan gewoon sani?

⁹ Begi na wan sempel sani. Wi kan begi pikinmoro na iniwan ten, na iniwan presi, begi tranga noso sondro taki sma yere. Ma noiti wi musu si a bigi grani disi leki wan gewoon sani. Bijbel e sori taki begi abi fu du nanga horidoro èn a tan di wi e tan na ai na yeye fasi (Lukas 18:1; Romesma 12:12; Efeisesma 6:18; Kolosesma 4:2). ¿A no de wan aparti sani taki wi abi wan yepisani fu man abi komunikâsi, di no skotu èn di wi kan gebroiki ibri momenti, nanga a moro hei sma na ini na universum? ¡Èn A e arki! Memre na okasi di Danièl ben begi èn Yehovah ben seni wan engel leki piki. ¡Na engel ben kon ala di Danièl ben e begi ete! (Danièl 9:20, 21) A ten fu wi no de wan ten pe den sortu fisiti disi fu engel e feni presi kande, ma Yehovah no kenki (Maleaki 3:6). Neleki fa a ben yere a begi fu Danièl, na so a sa arki a begi fu wi tu. Èn te wi  e begi, dan wi sa kon moro krosibei na Yehovah èn wi sa kweki wan banti di sa yepi wi fu horidoro te na a kaba, soleki fa Danièl ben du dati.

HORIDORO LEKI WAN LERIMAN FU A WORTU FU GADO

10. Fu san ede a ben de prenspari gi Danièl fu leri trawan a waarheid fu a Wortu fu Gado?

¹⁰ Danièl ben musu „waka miti a kaba” na wan tra fasi. A ben musu horidoro leki wan leriman fu waarheid. Noiti a ben frigiti taki a ben de wan fu den sma fu a pipel di Gado ben frukisi èn di den Buku fu Bijbel ben taki fu den: „ ’Unu na mi kotoigi,’ na so Yehovah taki, ’iya, mi futuboi di mi frukisi’ ” (Yesaya 43:10). Danièl ben du ala san a ben man fu du a wroko dati. Kande a wroko fu en ben abi na ini tu fu gi leri na en eigi pipel di ben de na ini katibo na Babilon. Wi no sabi furu fa a ben handri nanga den Dyu di ben de kompe fu en, boiti a kontakti fu en nanga den dri di den e taki fu den leki „den kompe fu en” — Hananya, Misaèl nanga Asarya (Danièl 1:7; 2:13, 17, 18). A krosibei matifasi fu den seiker ben du furu fu yepi ibriwan fu den fu horidoro (Odo 17:17). Danièl, di Yehovah ben blesi nanga spesrutu inzicht, ben abi furu fu leri den mati fu en (Danièl 1:17). Ma a ben abi fu gi tra leri tu.

11. (a) San ben de tumusi aparti na a wroko fu Danièl? (b) O bun Danièl ben du na aparti wroko fu en?

¹¹ Moro leki iniwan tra profeiti, Danièl ben abi a wroko fu gi kotoigi na heiden tiriman. Ala di furutron a ben musu meki boskopu di no ben pôpi bekènti na den tiriman disi, toku a no ben handri nanga den neleki den ben de tegu sani, noso na wan noso tra fasi ben lagi moro en. A ben taki nanga den na wan lespeki fasi èn na wan koni fasi. Yu ben abi wan tu sma — soleki den ondro-kownu di ben abi triki èn di ben dyarusu — di ben wani kiri Danièl. Toku, tra tiriman ben kon lespeki en. Fu di Yehovah ben meki taki Danièl ben man fruklari kibritori di ben e dangra kownu nanga koniman, dan a profeiti ben kisi moro bigi nen (Danièl 2:47, 48; 5:29). A tru  taki di a ben kon owru, a no ben man wroko so furu moro leki di a ben yongu. Ma seiker a ben waka miti a kaba fu en libi, ala di na wan getrow fasi a ben e suku iniwan fasi ete pe a ben kan dini leki wan kotoigi fu en lobi-ati Gado.

12. (a) Sortu wroko fu gi leri wi leki Kresten abi na ini a ten disi? (b) Fa wi kan waka baka a rai fu Paulus fu „tan waka nanga koni te a abi fu du nanga den wan di de na dorosei”?

¹² Wi kan feni getrow kompe na ini a Kresten gemeente fu a ten disi di sa yepi wi fu horidoro, neleki fa Danièl nanga den dri kompe fu en ben yepi makandra. Wi e gi leri na makandra tu fu di wi e gi „makandra deki-ati” (Romesma 1:11, 12). Neleki Danièl, wi abi wan wroko fu gi kotoigi na sma di no de na bribi (Mateus 24:14; 28:19, 20). Fu dati ede, wi musu meki den bekwaamfasi fu wi kon moro bun, so taki wi e „gebroiki a wortu fu waarheid na wan reti fasi” te wi e taki fu Yehovah nanga sma (2 Timoteus 2:15). Èn a sa yepi efu wi e gi yesi na a rai fu na apostel Paulus: „Tan waka nanga koni te a abi fu du nanga den wan di de na dorosei” (Kolosesma 4:5). So wan koni wani taki tu fu abi wan balansi fasi fu si den wan di no abi a srefi bribi leki wi. Wi no e wisiwasi den sortu sma disi fu di wi e si wisrefi leki wi hei moro den (1 Petrus 3:15). Na presi fu dati, wi e suku fu hari den go na a waarheid fu di wi e gebroiki a Wortu fu Gado nanga takt èn na wan bekwaam fasi, so taki wi e doro na ati fu den. ¡Te wi doro wan sma ati, dan dati e gi wi prisiri srefisrefi! A prisiri dati seiker e yepi wi fu horidoro te na a kaba, soleki fa Danièl ben du dati.

„YU SA ROSTU”

13, 14. Fu san ede a fruwakti di sma abi taki den o dede ben gi furu Babilonsma frede, èn fa a fasi fa Danièl ben si a tori ben de tra fasi?

¹³ Baka dati na engel ben gi Danièl a dyaranti: „Yu sa rostu” (Danièl 12:13). San den wortu dati ben wani taki? We, Danièl ben sabi taki dede ben de na en fesi. Dede na a kaba fu ala libisma di den no man lon komoto gi en fu sensi a ten fu Adam te go miti a ten fu wi. A fiti fu dati ede taki Bijbel e kari dede wan „feanti” (1 Korentesma 15:26). Ma a fruwakti  di Danièl ben abi taki a o dede, ben wani taki wan heri tra sani gi en leki san a ben wani taki gi den Babilonsma na lontu en. Gi den sma disi, di ben de dipi na ini a dangra anbegi fu so wan 4000 falsi gado, dede ben abi ala sortu frede sani na ini. Den ben bribi taki baka dede, den wan di no ben de koloku na ini den libi noso ben dede na wan ogri-ati fasi, ben tron yeye di e teki refensi èn di e spuku den wan di de na libi. Den Babilonsma ben e bribi so srefi na ini wan ondrogron grontapu di e gi sma fu frede, pe ogri-ati bubu e tan di abi skin fu libisma èn fu meti.

¹⁴ Dede no ben wani taki no wan fu den sani disi gi Danièl. Hondrohondro yari bifo a ten fu Danièl, Gado ben meki Kownu Salomo taki nanga yepi fu a santa yeye: „Fu a sei fu den dedewan, den no sabi notinoti” (Preikiman 9:5). Èn a psalm singiman ben singi fu wan sma di dede: „En yeye e komoto gowe, a e go baka na en gron; na a dei dati den prakseri fu en e lasi gowe” (Psalm 146:4). So bun, Danièl ben sabi taki den wortu di na engel ben taigi en, ben sa sori fu de tru. Dede ben wani taki rostu. No wan prakseri, no wan bita firi fu sari, no wan skin-ati — èn seiker no wan bubu. Yesus Krestes ben taki sani na a srefi fasi di Lasarus dede. A ben taki: „Wi mati Lasarus go rostu.”​—Yohanes 11:11.

15. Fa a dei fu dede kan de moro bun leki a dei te wan sma gebore?

¹⁵ Luku wan tra sani fu san ede a fruwakti di Danièl ben abi fu dede no ben e gi en frede. A Wortu fu Gado e taki: „Wan nen moro bun leki bun oli, èn a dei fu dede moro bun leki a dei te wan sma e kon gebore” (Preikiman 7:1). Fa a dei fu dede, di seiker de wan sari ten, ben kan de moro bun leki a prisiri dei fu geborte? A sroto de na ini a „nen”. „Bun oli” ben kan kostu kefalek furu. ¡Wan leisi a sisa fu Lasarus, Maria, ben lobi den futu fu Yesus nanga switismeri oli di ben kostu pikinmoro a moni di wan sma e wroko na ini wan yari! (Yohanes 12:1-7) Fa wan nen ben kan de so warti? Na Preikiman 7:1, a Griki Septuaginta e taki „wan bun nen”. A no de a nen nomo, ma san a nen wani taki, na dati e meki en so warti. Te wan sma gebore, dan a no abi wan bun nen noso wan  takru nen ete, a no abi buweisi fu bun sani di a du, èn a no abi sani di e meki sma memre a persoonlijkheid nanga den eigifasi fu en. Ma na a kaba fu en libi, a nen wani taki ala den sani disi. Èn efu a de wan bun nen na a fasi fa Gado e si en, dan a abi moro waarde leki iniwan materia gudu ben kan abi oiti.

16. (a) Fa Danièl ben meki muiti fu meki wan bun nen na Gado? (b) Fu san ede Danièl ben kan go rostu nanga ala frutrow taki a ben man meki wan bun nen na Yehovah?

¹⁶ Na ini en heri libi, Danièl ben du ala sani di ben de na ini en makti fu meki wan bun nen na Gado èn Yehovah no ben frigiti no wan fu den sani disi. A ben luku Danièl èn ben ondrosuku en ati. Gado ben du den srefi sani nanga Kownu David di ben singi: „O Yehovah, yu ondrosuku mi finifini, èn yu sabi mi. Yusrefi kon sabi te mi e sidon èn te mi e opo. Yu si san mi e prakseri fu farawe kaba” (Psalm 139:1, 2). A tru taki Danièl no ben de volmaakti. A ben de wan bakapikin fu a sondari Adam èn ben de wan memre fu wan sondu nâsi (Romesma 3:23). Ma Danièl ben abi berow fu a sondu fasi fu en èn ben tan pruberi fu waka nanga en Gado na wan opregti fasi. Fu dati ede, a getrow profeiti ben kan abi a frutrow taki Yehovah ben sa gi en pardon fu den sondu fu en èn noiti no ben sa hori en na ati (Psalm 103:10-14; Yesaya 1:18). Yehovah e frukisi fu memre den bun wroko fu den getrow futuboi fu en (Hebrewsma 6:10). Dati meki tu leisi na engel fu Yehovah ben kari Danièl wan „man di Gado lobi srefisrefi” (Danièl 10:11, 19). Disi ben wani taki dati Gado ben lobi Danièl. Sondro fu broko en ede, Danièl ben kan go rostu fu di a ben meki wan bun nen na Yehovah.

17. Fu san ede a de tranga fanowdu taki wi e meki wan bun nen na Yehovah na ini a ten disi?

¹⁷ Ibriwan fu wi kan aksi wisrefi: ’¿Mi meki wan bun nen na Yehovah?’ Wi e libi na ini muilek ten. A no fu meki sma frede, ma a de soso wan tru sani nomo di wi musu erken, taki ibriwan fu wi kan dede iniwan momenti (Preikiman 9:11). Fu dati ede, a de prenspari srefisrefi taki ibriwan fu wi e teki a fasti bosroiti fu meki wan bun nen na Gado nownowde,  sondro fu draidrai. Efu wi e du dati, dan wi no abi fu frede dede. A de soso wan rostu nomo — neleki sribi. ¡Èn neleki fa a de nanga sribi, na so wan sma e wiki baka dati!

„YU SA OPO TANAPU”

18, 19. (a) San na engel ben wani taki di a ben taki na fesi dati Danièl ben sa „opo tanapu” na ini a ten di e kon? (b) Fu san ede Danièl ben sa sabi na opobaka howpu?

¹⁸ A buku Danièl e tapu nanga wan fu den moro moi pramisi di Gado oiti gi wan libisma. Na engel fu Yehovah ben taigi Danièl: „Yu sa opo tanapu go na a presi fu yu na a kaba fu den dei.” San na engel ben wani taki? ¡We, fu di a „rostu” di a ben taki fu en dyonsrode ben de dede, dan a pramisi taki Danièl ben sa „opo tanapu” baka ten, ben kan wani taki soso wán sani nomo — opobaka! * Fu taki en leti, son sabiman taki dati a fosi leisi di den Buku e sori spesrutu go na a opobaka èn di de fu feni na ini den Hebrew Buku fu Bijbel, de na ini Danièl kapitel 12 (Danièl 12:2). Ma den no abi leti ini disi. Danièl ben sabi na opobaka howpu heri bun.

¹⁹ Fu eksempre, sondro tweifri Danièl ben sabi den wortu disi di Yesaya ben skrifi tu yarihondro na fesi: „Den dedewan fu yu sa libi. Wan dedeskin fu mi — den sa opo baka. ¡Wiki èn meki wan prisiri babari, un sma di e tan na ini a doti fu gron! Bika . . . a gron srefi sa trowe den wan di no man du noti na ini dede, soleki fa dati e pasa te wan sma gebore” (Yesaya 26:19). Langa na fesi fu dati, Elia nanga Elisa ben kisi a krakti fu Yehovah fu gi sma wan trutru opobaka (1 Kownu 17:17-24; 2 Kownu 4:32-37). Moro na fesi srefi, Hana, a mama fu a profeiti Samuèl ben erken taki Yehovah man opo sma baka fu Syeol, a grebi (1 Samuèl 2:6). Ete na fesi moro srefi, a getrow Yob ben taki fu a howpu fu en nanga den wortu disi: „¿Efu wan man di gosontu èn tranga na skin fasi dede, a kan libi baka? Ala den dei di mi musu du fruplekti wroko mi sa wakti,  te leki a frulusu fu mi kon. Yu sa kari, èn misrefi sa piki yu. Yu sa angri fu du a wroko fu yu anu.”​—Yob 14:14, 15.

20, 21. (a) Fu sortu opobaka Danièl seiker sa de wan pisi fu dati? (b) Na sortu fasi na opobaka na ini a Paradijs kande sa feni presi?

²⁰ Neleki Yob, na so Danièl ben abi reide fu abi a frutrow taki Yehovah ben sa angri trutru fu tyari en kon na libi baka, wan dei na ini a ten di e kon. Toku a ben musu de wan bigi trowstu fu yere wan makti yeye kriaturu taki dati a howpu dati de tru. Iya, Danièl sa opo na ini „na opobaka fu den regtfardikiwan”, di sa feni presi na ini a Dusun Yari Tiri fu Krestes (Lukas 14:14). Fa dati sa de gi Danièl? A Wortu fu Gado e fruteri wi furu fu dati.

²¹ Yehovah a „no wan Gado fu bruya, ma fu vrede” (1 Korentesma 14:33). Fu dati ede, a de krin taki na opobaka na ini a Paradijs sa feni presi na wan orde fasi. Kande a sa feni presi wan moi pisi ten baka Armagedon (Openbaring 16:14, 16). Ala marki fu na owru seti fu sani sa figi puru, èn sondro tweifri sani sa sreka fu gi den sma di ben dede wan switikon. Ini a tori fu suma fu den sma di dede, o kon baka, Bijbel e gi a fasi disi fa sani sa waka: „Ibriwan na ini en eigi posisi” (1 Korentesma 15:23). A gersi taki a kan taki ini a tori fu ’na opobaka fu den regtfardikiwan nanga den onregtfardikiwan’, den regtfardikiwan sa tyari kon baka na libi fosi (Tori fu den Apostel 24:15). Na a fasi dati, getrow man fu owruten, soleki Danièl, sa man yepi tiri grontapu afersi, so srefi fu gi leri na den milyardmilyard „onregtfardikiwan” di tyari kon baka na libi.​—Psalm 45:16.

22. San na wan tu aksi di Danièl sondro tweifri ben sa wani fayafaya wan piki na tapu?

²² Fosi Danièl de klariklari fu teki den sortu frantiwortu dati, dan seiker a sa abi wan tu aksi. Te yu luku en bun, dan a ben taki fu wan tu fu den dangra profeititori di a ben kisi: „Mi ben yere, ma mi no ben man frustan” (Danièl 12:8). ¡A sa prisiri trutru fu frustan den santa kibritori disi fu Gado te fu kaba! Sondro tweifri a sa wani fu yere ala sani fu a Mesias. Danièl sa prisiri srefisrefi fu kon sabi a fasi fa den grontapumakti  ben kon baka makandra, bigin nanga a ten fu en te go doro a ten fu wi. A sa prisiri tu fu kon sabi suma na den getrow „santawan fu a Moro Heiwan” — di ben horidoro ala di den ben kisi frufolgu na ini „a ten fu a kaba” — èn fu kon sabi fu a trutru pori di a Mesias Kownukondre fu Gado sa tyari kon na tapu ala den kownukondre fu libisma.​—Danièl 2:44; 7:22; 12:4.

¡A PRESI FU DANIÈL NA INI PARADIJS — ÈN A DI FU YU!

23, 24. (a) Fa a grontapu pe Danièl sa kisi wan opobaka sa de tra fasi leki a grontapu di a ben sabi? (b) Danièl sa abi wan ròl na ini a Paradijs, èn fa wi du sabi dati?

²³ Danièl sa wani sabi sani fu a grontapu pe a sa de na ini na a ten dati — wan grontapu di de so tra fasi leki a grontapu fu a ten fu en. Ala marki fu feti nanga kwinsi di ben pori a grontapu di a ben sabi, no sa de moro. Sari, siki, dede no sa de moro (Yesaya 25:8; 33:24). Ma nyanyan sa de pasa marki, furu oso, èn wroko di e gi sma satisfaksi sa de gi ala sma (Psalm 72:16; Yesaya 65:21, 22). A libisma famiri sa de wan koloku famiri di kon de na ini wánfasi.

²⁴ Danièl seiker sa abi wan presi na ini a grontapu dati. „Yu sa opo tanapu go na a presi fu yu”, na engel ben taigi en. A Hebrew wortu di den vertaal dyaso nanga „presi” na a srefi leki a wortu di ben gebroiki gi trutru pisi gron. * Danièl kande ben sabi a profeititori fu Esekièl di e taki fu a prati fu a kondre Israèl di ben kon bun baka (Esekièl 47:13–48:35). San a profeititori fu Esekièl e sori na ini a kontru fu a Paradijs? Taki a heri pipel fu Gado sa abi wan presi na ini a Paradijs, srefi a kondre sa prati na wan orde fasi èn na wan regtfardiki fasi. A no de fu taki dati a presi fu Danièl na ini a Paradijs sa abi fu du nanga moro sani leki nanga wan presi nomo. A sa abi na ini tu a ròl fu en na ini a prakseri fu Gado. A paiman di Gado ben pramisi fu gi Danièl de seiker.

25. (a) San na wan tu sani di wi kan fruwakti na ini a libi na ini a Paradijs di e hari yu? (b) Fu san ede wi kan taki dati libisma meki fu de na ini a Paradijs?

 ²⁵ Ma fa a de nanga a presi fu yu? Den srefi pramisi kan de gi yu. Yehovah wani, taki libisma di e gi yesi, „opo tanapu” go na a presi fu den, fu abi wan presi na ini a Paradijs. ¡Prakseri pikinso! A sa de seiker wan prisiri sani fu miti Danièl srefi makandra nanga tra getrow man nanga uma fu Bijbel ten. Dan yu sa abi furu trawan di drai kon baka fu dede di abi leri fanowdu, so taki den kon sabi Yehovah Gado èn lobi en. Pruberi fu si fa yusrefi e sorgu gi a tanpresi fu wi na grontapu èn e yepi fu meki a tron wan paradijs pe bun furu difrenti sani èn moi sani de di sa tan fu têgo. Prakseri taki Yehovah e gi yu leri èn e leri yu fa fu libi na a fasi fa a ben wani taki libisma musu libi (Yesaya 11:9; Yohanes 6:45). Iya, wan presi de gi yu na ini a Paradijs. Ala di a Paradijs kan gersi wan sani di son sma no sabi na ini a ten disi, toku memre taki na ini a bigin Yehovah ben meki libisma fu libi na ini so wan presi (Genesis 2:7-9). Na a fasi dati, a Paradijs na a naturu tanpresi fu den milyardmilyard sma fu grontapu. Dati na a tanpresi fu den. Fu doro drape sa de neleki den e go na oso.

26. Fa Yehovah e erken taki a no makriki gi wi fu wakti a kaba fu a seti disi?

 ²⁶ ¿Na ati fu wi de nanga furu warderi srefisrefi te wi e prakseri ala den sani disi, a no so? ¿Yusrefi no e angri fu de drape? ¡Fu dati ede, a no de fu fruwondru taki Kotoigi fu Yehovah wani sabi srefisrefi o ten a kaba fu a seti fu sani disi sa kon! A no makriki fu wakti. Yehovah e erken taki a no makriki fu wakti, bika a e gi wi tranga fu „tan fruwakti” a kaba, „awansi a ben sa meki [wi] wakti en srefi”. Yehovah wani taki, dati fu a fasi fa wi e si sani a kan gersi kande taki a e meki wi wakti, bika a srefi tekst e gi wi a dyaranti: „A no sa kon lati”. (Habakuk 2:3; teki gersi Odo 13:12.) Iya, a kaba sa kon na a fasti ten.

27. San yu musu du fu man tanapu na fesi Gado te na ini ala têgo ten?

²⁷ San yu musu du fu di a kaba e kon krosibei? Yu musu horidoro na wan getrow fasi, neleki Danièl, a lobi profeiti fu Yehovah. Studeri a Wortu fu Gado fayafaya. Begi fayafaya. Abi demakandra na wan lobi-ati fasi nanga kompe-bribiman. Leri trawan a waarheid fayafaya. Fu di a kaba fu a godelowsu seti fu sani disi e kon moro krosibei ibri dei, dan tan abi a fasti bosroiti fu de wan loyaal futuboi fu a Moro Heiwan èn wan sma di e horibaka na wan getrow fasi gi a Wortu fu en. ¡Grantangi poti prakseri na a profeititori fu Danièl! ¡Èn meki a de so, taki a Soeverein Masra Yehovah gi yu a grani fu tanapu na en fesi nanga prisiri te na ini ala têgo ten!

[Futuwortu]

SAN YU BEN KON FRUSTAN?

• San ben yepi Danièl fu horidoro te na a kaba?

• Fu san ede a fruwakti di Danièl ben abi fu dede no ben e gi en frede?

• Fa a pramisi fu na engel taki Danièl ’sa opo tanapu go na a presi fu en’ sa kon tru?

• Fa yusrefi kisi wini fu di yu poti prakseri na a profeititori fu Danièl?

[Aksi fu a tori disi]

 [Prenki di e tapu heri bladzijde 307]

[Prenki na tapu bladzijde 318]

¿Yu e poti prakseri na a profeiti wortu fu Gado neleki Danièl?