Yesaya 23:1-18
-
Krutuboskopu gi Tirus (1-18)
23 Disi na wan krutuboskopu gi Tirus:
Bari krei, un man di de na tapu den sipi fu Tarsis!
Sma broko a lanpe èn nowan presi de pe sipi man kon na ini a kondre.
Na Kitim, sma taigi den a boskopu disi.
2 Un sma di e tan na a sesyoro, tapu un mofo.
Den bisnisman fu Sidon di e abra a se, furu un kondre nanga gudu.
3 Den psa furu watra fu tyari na aleisi* fu Sihor*nanga den sani di den koti na Nijl-liba.Den seri den sani dati fu meki bigi moni èn furu kondre kisi wini fu dati.
4 Sidon, yu musu syen, yu so wan tranga foto na a se.Bika a se taki:
„Noiti mi ben abi a pen fu wan uma di e meki wan pkin. Noiti mi meki pkin.Noiti mi kweki wan manpkin noso wan umapkin.”*
5 Te sma yere san psa nanga Tirus,den o frede srefsrefi neleki di den ben yere san psa nanga Egepte.
6 Un abra a se go na Tarsis.
Un sma di e tan na a sesyoro, bari krei!
7 A no a foto disi na a foto fu unu di ben e meki prisiri sensi owruten, sensi a bigin?
En futu ben tyari en go na fara kondre fu go tan drape.
8 Tirus na a wan di e poti sma leki kownu.Den bisnisman fu en na granmanèn na heri grontapu sma e gi den grani.Sobun, suma besroiti taki a musu kisi strafu?
9 Na Yehovah di e tiri den legre besroiti disi,so taki a no meki bigi moro fu ala den moi sani fu en.A o meki ala den man di ben kisi grani na grontapu kisi syen.
10 Ai umapkin fu Tarsis, yu musu psa go na ini a heri kondre neleki a watra fu Nijl-liba.
Nowan presi* de moro gi den sipi fu tan.
11 Gado langa en anu na tapu a se.A seki den kownukondre.
Yehovah taki dati den fortresi* fu Fenisia musu kisi pori.
12 A taki: „Ai umapkin fu Sidon, ai yongu uma* di den pina,noiti moro yu o bari fu prisiri.
Opo, dan yu abra go na Kitim.
Ma drape srefi yu no o feni rostu.”
13 Luku a kondre fu den Kaldeyasma.
A no Asiria, ma na a pipel disimeki a* tron wan tanpresi gi den meti di e libi na ini a sabana.
Den meki toren fu feti nanga en.Den broko den tranga toren fu en.Den meki a tron wan brokopresi.
14 Bari krei, un man di de na tapu den sipi fu Tarsis,bika den pori a fortresi* fu unu.
15 Na a ten dati, sma no o prakseri Tirus 70 yari langa. A pisi ten dati wán kownu o tiri. Na a kba fu den 70 yari Tirus o tron leki a huru-uma na ini a singi disi:
16 „Ai huru-uma di sma no e luku nanga wan ai, teki wan harpu, dan yu waka lontu na ini a foto.
Prei yu harpu bunèn singi furu singi,meki den poti prakseri na yu baka.”
17 Na a kba fu den 70 yari Yehovah o poti prakseri na Tirus. Dan Tirus o du leki wan huru-uma baka, bika a o huru nanga ala kownukondre fu grontapu èn den o pai en fu a huru di a e huru.
18 A moni nanga den tra sani di a kisi fu a huru di a e huru o tron santa sani gi Yehovah. A no o poti den sani dati na wan sei èn a no o kibri den, bika den o kon de fu a pipel fu Yehovah. Den o gebroiki den sani dati fu bai n’nyan fu nyan den bere furu èn fu bai moi krosi fu weri.
Futuwortu
^ Hebrewtongo: „a siri”.
^ Disi na wan kriki fu a Nijl-liba.
^ Hebrewtongo: „yongu uma di no sribi nanga wan man ete”.
^ Noso kande: „lanpe”.
^ Hebrewtongo: „uma di no sribi nanga wan man ete”.
^ Kande disi na Tirus.
