Psalm 148:1-14
148 Prèise Yah!*
Prèise Yehovah, un alamala di e libi na ini hemel.Prèise en, unu di de na den moro hei presi.
2 Prèise en, ala un engel fu en.
Prèise en, ala un legre fu en.
3 Prèise en, un son nanga mun.
Prèise en, ala un brenki stari.
4 Prèise en, un hemel nanga den moro farawe pisi fu hemel.*Prèise en, un watra di de na tapsei fu hemel.
5 Meki den prèise a nen fu Yehovah,bika na fu di a taki meki den kon de.
6 A poti den na den presi, so taki den e tan fu ala ten, iya, fu têgo.A poti wan wet gi den di no o kenki.
7 Prèise Yehovah, un alamala di e libi na grontapu,iya, un bigi meti di e libi na ini se nanga ala un dipi watra.
8 Bliksem nanga pispisi ijs di e fadon kmoto na hemel, snew nanga dungru wolku, un alamala prèise en.Prèise en, yu bigi winti di e du san a taki.
9 Un bergi nanga ala un pkin bergi,un froktubon nanga ala un sedrebon,
10 un busimeti nanga ala un osometi,un meti di e kroipi na gron nanga fowru di e frei,
11 un kownu fu grontapu nanga ala den sma fu den difrenti kondre,un granman nanga ala un krutuman fu grontapu,
12 un yonguman nanga ala un yongu uma,*un owru man makandra nanga den yonguwan, un alamala prèise en.
13 Meki den prèise a nen fu Yehovah,bika en nen w’wan hei moro ala tra nen.
A glori fu en hei moro grontapu nanga hemel.
14 A o meki en pipel kisi moro makti.*Ala den sma di e tai hori na en, a o gi moro glori.Iya, a o gi glori na den Israelsma, a pipel di de krosbei fu en.
Prèise Yah!*
Futuwortu
^ Noso: „Haleluyah!” „Yah” na a syatu fasi fa sma e skrifi a nen Yehovah.
^ Hebrewtongo: „hemel fu den hemel”.
^ Hebrewtongo: Wan uma di no sribi nanga wan man ete.
^ Hebrewtongo: „A o hei a tutu fu en pipel”.
^ Noso: „Haleluyah!” „Yah” na a syatu fasi fa sma e skrifi a nen Yehovah.
