Preikiman 3:1-22
3 Gi ala sani wan ten de,iya, wan ten de gi ibri sani di sma e du na grontapu.
2 Wan ten de fu meki pkin èn wan ten de fu dede.Wan ten de fu prani gron èn wan ten de fu hari puru san ben prani.
3 Wan ten de fu kiri èn wan ten de fu dresi.Wan ten de fu broko puru èn wan ten de fu bow.
4 Wan ten de fu krei èn wan ten de fu lafu.Wan ten de fu bari krei èn wan ten de fu dansi.*
5 Wan ten de fu trowe ston gwe èn wan ten de fu tyari ston kon na wán.Wan ten de fu brasa èn wan ten de fu no brasa.
6 Wan ten de fu suku sani èn wan ten de fu si sani leki lasi sani.Wan ten de fu kibri sani èn wan ten de fu trowe sani gwe.
7 Wan ten de fu priti sani na tu èn wan ten de fu nai sani kon na wán.Wan ten de fu tan tiri èn wan ten de fu taki.
8 Wan ten de fu lobi èn wan ten de fu no lobi srefsrefi.Wan ten de fu feti èn wan ten de fu freide.
9 Sortu wini wan wrokoman e kisi gi ala a muiti di a e meki?
10 Mi si sortu wroko Gado gi libisma fu du, so taki den abi wan sani fu du.
11 Ala sani a meki moi* na a yoisti ten. A meki libisma srefi nanga a firi fu libi fu têgo.* Tòg noiti den no o man kon sabi finfini fa a tru Gado meki ala sani.
12 Mi kon si taki a moro bun sani di libisma kan du na fu prisiri èn fu du bun na ini a libi fu den.
13 Mi kon sabi tu taki ibri sma musu nyan, taki a musu dringi èn taki a musu prisiri nanga ala a tranga wroko di a e du. Dati na wan kado fu Gado.
14 Mi kon sabi taki ala den sani di a tru Gado e meki o tan fu ala ten. Sma no kan poti noti moro na tapu èn den no kan puru noti fu den tu. A tru Gado meki den, so taki libisma kan abi bigi lespeki gi en.
15 San e psa ben psa kba èn san musu kon ete ben de kba. A tru Gado e suku* den sani di trawan ben feti fu kisi.*
16 San mi si tu na grontapu, na taki pe sma ben musu koti krutu na wan reti fasi, den ben e du ogri. Pe den ben musu du san reti, den ben e du ogri tu.
17 Mi taki na ini mi ati: „A tru Gado o koti krutu gi den ret’ati sma èn gi den ogrisma, bika wan ten de gi ala sani di musu psa èn gi ala sani di musu du.”
18 Na ini mi ati mi taki dati a tru Gado o tesi libisma èn a o sori den taki den de a srefi leki meti.
19 Bika a sani di e psa nanga libisma, na dati e psa tu nanga den meti. A srefi sani e psa nanga den alamala te fu kba. Soleki fa a wan e dede, na so a trawan e dede tu. Den alamala abi a srefi libikrakti. Dati meki libisma no bun moro meti. Iya, ala sani na fu soso.
20 Den alamala e go na a srefi presi. Den alamala meki fu doti èn den alamala o tron doti baka.
21 Suma sabi efu a libikrakti fu libisma e opo go na loktu, noso efu a libikrakti fu meti e saka go ondro gron?
22 Mi si taki nowan sani moro bun leki te wan sma e prisiri nanga en wroko, fu di dati na a pai di a o kisi. Bika suma man meki a si san o psa baka te a dede?
Futuwortu
^ Hebrewtongo: „dyompo”, „dyompodyompo fu prisiri”.
^ Noso: „a seti bun”, „a meki na wan yoisti fasi”.
^ Hebrewtongo: „Srefi têgo ten a poti na ini den ati”.
^ Noso: „o du”.
^ Noso kande: „den sani di psa gwe”.
