A di fu tu buku fu den Kownu 13:1-25
13 Na ini a di fu tutenti na dri yari di Yoas, a manpikin fu Ahasia, ben de kownu fu Yuda, dan Yoahas, a manpikin fu Yehu, tron kownu fu Israel. Yoahas tiri na Samaria tinaseibi yari langa.
2 Yoahas tan du ala sani di Yehovah no feni bun. Den srefi sani di Nebat en manpikin Yerobeyam ben du, na dati Yoahas du tu. Na den sondu fu Yerobeyam, meki Israel go du sondu tu. Yoahas no tapu fu du den sondu disi.
3 Ne Yehovah ati kon bron srefisrefi nanga Israel èn na a ten dati a gi den abra na Kownu Hasael fu Siria èn na Ben-Hadad, a manpikin fu Hasael.
4 Bakaten Yoahas begi Yehovah fu no ati bron moro. Ne Yehovah arki en, fu di a ben kon si fa Israel ben e pina. A si fa a kownu fu Siria ben e kwinsi den.
5 Sobun, Yehovah meki wan sma kon frulusu den, so taki den ben kan kon fri fu den Siriasma. Na so den Israelsma ben kan go libi baka na ini den oso fu den.
6 (Ma den no tapu fu du den sondu di Yerobeyam nanga den bakapikin fu en ben du. Na den sondu fu Yerobeyam, meki Israel go du sondu tu. Ala den sondu disi den Israelsma du. Wan santa postu ben de srefi na Samaria.)
7 A kownu fu Siria no libi nowan sma gi Yoahas, boiti feifitenti srudati di e rèi asi. A libi tin asiwagi gi Yoahas tu, nanga tin dusun srudati di ben e waka nanga futu. A kownu disi kiri ala den tra sma. Na so den Israelsma kon de leki fini doti di yu e kisi te sma e masi aleisi.
8 Ala tra sani di abi fu du nanga Yoahas, ala sani di a du èn a fasi fa a sori a makti fu en, skrifi na ini a buku di e taki fu den tori fu den kownu fu Israel.
9 Te fu kaba Yoahas go rostu neleki den afo fu en èn den beri en na Samaria. Dan en manpikin Yoas bigin tiri leki kownu.
10 Na ini a di fu dritenti na seibi yari di Yoas ben tiri leki kownu fu Yuda, Yoas, a manpikin fu Yoahas, tron kownu fu Israel. A tiri leki kownu na Samaria tinasiksi yari langa.
11 Ala ten a ben e du sani di Yehovah no feni bun. Den srefi sani di Nebat en manpikin Yerobeyam ben du, na dati Yoas du tu. Na den sondu fu Yerobeyam, meki taki Israel go du sondu tu. Yoas no tapu fu du den sondu disi.
12 Ala tra sani di abi fu du nanga Yoas èn ala sani di a du, a fasi fa a sori a makti fu en èn a fasi fa a feti nanga Kownu Amasia fu Yuda, skrifi na ini a buku di e taki fu den tori fu den kownu fu Israel.
13 Te fu kaba Yoas go rostu neleki den afo fu en. Dan den beri en na Samaria pe den tra kownu fu Israel ben beri. Ne Yerobeyam tron kownu na presi fu en.
14 Now Elisa kon siki te fu dede. Dati meki Kownu Yoas fu Israel kon na en. A brasa Elisa hori èn a bigin krei. A taki: „Mi tata, mi tata, a fetiwagi fu Israel nanga den srudati fu en di e rèi asi!”*
15 Ne Elisa taigi Yoas: „Teki wan bo nanga wan tu peiri.” Sobun, Yoas teki wan bo nanga wan tu peiri.
16 Dan Elisa taigi a kownu fu Israel: „Span a bo.” Sobun, Yoas span a bo. Baka dati Elisa poti en anu na tapu na anu fu Kownu.
17 Ne Elisa taki: „Opo a fensre di de na owstusei.” Dati meki Yoas opo a fensre. Dan Elisa taigi en: „Sutu a peiri.” Sobun, Yoas sutu a peiri. Elisa taigi en: „Disi na a peiri fu Yehovah di o tyari frulusu kon. Na a peiri disi o frulusu yu fu Siria. Yu o kiri den Siriasma na Afek, teleki nowan fu den tan abra.”
18 Dan Elisa taki: „Teki den peiri.” Ne Yoas teki den peiri. Elisa taigi a kownu fu Israel: „Naki na tapu a gron.” Sobun, Yoas naki na tapu a gron. Ma a du dati dri tron nomo.
19 Ne a man fu a tru Gado mandi srefisrefi nanga en èn a taki: „Yu ben musu naki feifi noso siksi tron! Efu yu ben du dati, dan yu ben o wini den Siriasma, teleki nowan fu den tan abra. Ma now yu o wini den Siriasma dri tron nomo, fu di na dri tron nomo yu naki na tapu a gron.”
20 Baka dati Elisa dede èn den beri en. Sensi a ten dati, grupu ogri-ati fufuruman fu Moab teki a gwenti fu kon na ini a kondre na a bigin fu ibri yari.
21 Wan dei di sma ben e beri wan man, den si wan fu den grupu ogri-ati fufuruman. Ne den sma trowe a dedeskin fu a man na ini a grebi fu Elisa èn den lon gowe. Di a dedeskin tuka nanga den bonyo fu Elisa, a man kon na libi baka wantronso èn a opo tanapu.
22 A heri pisi ten di Yoahas ben e tiri, Kownu Hasael fu Siria pina den Israelsma.
23 Ma Yehovah sori den sari-ati èn a yepi den. A poti prakseri na den, fu di a ben meki wan frubontu nanga Abraham, Isak èn nanga Yakob. A no ben wani kiri den èn te na a dei fu tide a no drai baka gi den.
24 Te fu kaba Kownu Hasael fu Siria dede. Dan en manpikin Ben-Hadad bigin tiri leki kownu.
25 Ben-Hadad, a manpikin fu Hasael, ben teki den foto puru na a anu fu Yoas papa Yoahas. Ma Yoas teki den foto disi baka fu Ben-Hadad. Dri leisi Yoas wini en èn te fu kaba a teki ala den foto baka, di ben de fu Israel.
