Amos 9:1-15
9 Dan mi si Yehovah tanapu na tapusei fu na altari,+ èn a taki: „Naki na tapu na ede fu a pilari, so taki den fondamenti seki. Koti den ede fu ala den pilari puru.+ Den lasti sma fu a pipel mi o kiri nanga feti-owru. Awinsi wan fu den o wani lon gowe, toku a no o man du dati. Nowan sma di pruberi fu lowe, o man lowe gowe.+
2 Efu den diki wan olo fu go kibri ondro gron, dan na fu drape mi o puru den.+ Efu den kren go na hemel, dan mi o hari den kon na ondro.+
3 Efu den go kibri na a ede fu Karmel-bergi, dan mi o suku bun teleki mi feni den èn mi o puru den fu drape.+ Efu den go kibri gi mi na tapu a gron fu se,+ dan mi o seni wan sneki go drape fu beti den.
4 Efu den feanti fu den tyari den go na ini katibo, dan mi o seni wan feti-owru fu kiri den.+ Nowan bun mi o tyari kon gi den. Soso ogri mi o tyari kon gi den.+
5 A Moro Hei Masra Yehovah di e tiri den legre na a sma di e fasi a kondre meki a smèlter.+ Ala den sma na ini a kondre o sari.+ A kondre, iya, a heri kondre o kren neleki a watra fu Nijl-liba. A o saka neleki a watra fu Nijl-liba na Egepte.+
6 ’Yehovah na a nen+ fu a sma di e bow en trapu na hemel.+ Na en bow sani na tapusei fu a grontapu di ensrefi meki.+ En na a sma di e kari a watra fu se kon,+ so taki a kan kanti en trowe na grontapu.’+
7 Yehovah taki: ’Un Israelsma, mi e si unu leki den Kus-sma. A no mi tyari den Israelsma komoto fu a kondre Egepte?+ A no mi tyari den Filisteasma+ komoto fu Kreita? A no mi tyari den Siriasma komoto fu Kir?’+
8 ’Iya, mi, a Moro Hei Masra Yehovah, poti prakseri na a kownukondre disi di e sondu.+ Mi o figi en puru na grontapu.+ Ma toku mi no o kiri ala den sma fu Yakob’,+ na so Yehovah taki.
9 ’Mi e gi wan komando. Mi o seki den Israelsma puru na mindri den tra pipel,+ neleki fa wan sma e seki aleisi na ini wan manari fu puru den ston na ini. Nowan ston e fadon na gron.
10 Nanga feti-owru sma o kiri den, iya, den o kiri ala den sma fu mi pipel di e du sondu+ èn di e taki: „A rampu no o pasa krosibei fu wi èn nowan rampu o miti wi.”’+
11 ’Na a ten dati mi o bow+ a broko kampu+ fu David baka,+ èn mi o tapu den olo di de na ini den skotu fu den foto fu den. Mi o meki den brokopresi fu den foto kon bun baka èn mi o bow den foto neleki fa den ben de fositen.+
12 Dan den o teki san tan abra fu Edom+ èn san tan abra fu ala den trakondre sma di e kari mi nen’,+ na so Yehovah di e du den sani disi, taki.
13 Yehovah taki: ’Luku, wan ten o kon pe sma no o kaba koti nyanyan, fosi a ten doro baka fu plugu a gron.+ Sma no o kaba sai siri, fosi den musu masi droifi baka.+ Switi win o dropu fu den bergi+ èn furu win o lon komoto fu ala den pikin bergi.+
14 Mi o tyari mi pipel Israel di go na ini katibo, kon baka na a kondre fu den.+ Dan den o bow den foto baka pe nowan sma ben e tan èn den o tan na ini.+ Den o prani droifidyari èn den o dringi a win fu den droifi dati. Den o prani froktubon na ini den dyari èn den o nyan den froktu fu den.’+
15 ’Mi o prani den na den eigi gron èn nowan sma o rutu den puru moro na a gron di mi gi den’,+ na so Yehovah yu Gado taki.”
