Amos 8:1-14
8 Ne a Moro Hei Masra Yehovah meki mi si wan baskita nanga froktu di e gro na ini a waran ten fu a yari.+
2 Dan a taki: „San yu e si,+ Amos?” Mi taki: „Wan baskita nanga froktu di e gro na ini a waran ten fu a yari.”+ Ne Yehovah taigi mi: „Wan kaba o kon na mi pipel Israel.+ Mi no o sari den moro.+
3 ’Na presi fu singi, sma o bari krei na ini a tempel na a dei dati,’+ na so a Moro Hei Masra Yehovah taki. ’Bun furu dedeskin o de.+ Na ibri presi sma o trowe den go na dorosei èn ala sma o tan pî!’
4 Arki, un man di e suku fu nyan den pôti sma,+ èn di e suku fu figi den safri-ati sma puru na ini a kondre.+
5 Unu e taki: ’O langa wi musu wakti fosi a nyun mun pasa,+ so taki wi kan seri nyanyan?+ O langa wi musu wakti fosi Sabat-dei pasa,+ so taki wi kan seri aleisi? Dan wi kan meki den baki nanga den wegiston di wi e gebroiki fu marki sani, kon moro pikin,+ so taki wi kan seri den sani moro diri. Na so wi kan bedrigi sma nanga den wegi fu wi.+
6 Nanga solfru wi o bai den mofina sma leki srafu, èn wi o bai den pôti sma gi a moni fu wan susu. Na a aleisi di no bun wi o seri gi sma tu.’+
7 Yehovah, a Glori fu Yakob,+ sweri na en eigi nen: ’Noiti mi o frigiti den sani di den du.+
8 Na fu a sani disi ede a kondre o bruya.+ Ibri sma di e tan na ini a kondre o abi fu sari.+ A kondre, iya, a heri kondre o kren neleki a watra fu Nijl-liba. A o sekiseki èn a o saka neleki a watra fu Nijl-liba na Egepte.’+
9 A Moro Hei Masra Yehovah taki: ’Na a dei dati mi o meki son dongo na brekten yuru.+ Mi o meki a kondre kon dungru, aladi a de bigibigi dei ete.
10 Mi o meki den fesa fu unu kon de neleki te unu e row,+ èn den singi fu unu o de sari singi. Ibri sma o weri rowkrosi èn den o krebi den ede.+ A o de neleki den e row gi a wan-enkri manpikin fu den.+ A heri dei o de wan bita dei.’
11 A Moro Hei Masra Yehovah taki: ’Luku, wan ten o kon pe mi o meki angriten kon na ini a kondre. Angri o kiri unu, ma a no fu di brede no de. Watra o kiri unu, ma a no fu di watra no de. Na presi fu dati unu o angri fu yere den wortu fu Yehovah.+
12 Sma o tingatinga fu a wan se te go miti a tra se èn fu noordsei te go miti a tra sei pe son e opo. Den o wakawaka lontu fu suku den wortu fu Yehovah, ma den no o feni dati.+
13 Na a ten dati, den moi nyunwenke nanga den yonkuman o flaw, fu di watra o kiri den.+
14 Den sma di e sweri na den falsi gado fu Samaria,+ o taki: „Yu musu sweri na a libi fu yu gado, Dan!”+ èn: „Sweri na a pasi fu Berseiba!”+ Den o fadon èn den no o opo moro.’”+
