Amos 2:1-16
2 Yehovah taki: ’„Ibri tron baka* Moab+ e opo ensrefi. Den bron den bonyo fu a kownu fu Edom fu meki karki.+ Dati meki mi musu fu strafu den.
2 Mi o seni wan faya go na Moab èn a faya o bron den toren fu Keriot+ pe sma e tan. Te den sma fu Moab o dede, wan bigi babari o de fu yere. Sma o bro tutu èn den o bari,+ fu di den e go na feti.
3 Mi o kiri a krutuman fu den, makandra nanga ala den granman fu den”,+ na so Yehovah taki.’
4 Yehovah taki: ’Ibri tron baka Yuda+ e opo ensrefi. Den trangayesi den wèt fu Yehovah+ èn den no hori den komando fu en. Na presi fu dati den e bribi den srefi leitori+ di den afo fu den ben bribi. Fu dati ede den e wakawaka lontu nomo.+ Dati meki mi musu fu strafu den.
5 Mi o seni wan faya go na Yuda èn a faya o bron den toren fu Yerusalem pe sma e tan.’+
6 Yehovah taki: ’Ibri tron baka Israel+ e opo ensrefi. Den e seri den sma di e du san reti, so taki den kan kisi solfru. Den e seri wan pôti sma gi a moni di sma e pai fu wan susu.+ Dati meki mi musu fu strafu den.
7 Den de nomonomo fu meki den mofina sma trowe finifini doti fu a gron na tapu den eigi ede.+ Den e pusu den safri-ati sma go na wan sei.+ Wan man nanga en eigi papa go na a srefi yongu uma,+ fu di den wani pori mi santa nen.+
8 Na tapu krosi di den teki leki panti, den e didon langalanga+ na sei ibri altari.+ Na ini na oso fu den gado fu den, den e dringi a win fu den wan di pai butu.’+
9 ’Ma na fu mi pipel ede mi ben kiri den Amorietsma+ di langa leki sedrebon èn di stampu leki bigi bon.+ Mi ben pori den froktu nanga den rutu fu den.+
10 Misrefi tyari unu komoto na Egepte+ èn mi meki unu waka fotenti yari na ini a sabana.+ Te fu kaba unu teki a kondre fu den Amorietsma abra.+
11 Ibri tron baka mi meki wan tu manpikin fu unu tron profeiti,+ èn mi meki wan tu fu den yonkuman na un mindri tron Nasireisma.+ A no dati pasa, un Israelsma?’, na so Yehovah taki.
12 ’Ma ibri tron baka unu ben e gi den Nasireisma win fu dringi,+ èn unu ben gi den profeiti wan komando. Unu taigi den: „Unu no musu taki profeititori.”+
13 Luku, mi o meki a gron seki na ondro un futu leki wan wagi di e seki, fu di a furu nanga aleisi di sma koti didyonsro.
14 Nowan sma di man lon esi o feni wan kibripresi.+ Nowan sma di tranga o kisi moro krakti, èn nowan tranga man o man lowe gowe.+
15 Nowan sma di sabi sutu peiri o man tan tanapu. Nowan sma di man lon esi o man lowe gowe. Nowan sma di e rèi na tapu asi o man lowe gowe.+
16 Na a dei dati a tranga man di abi deki-ati o lowe gowe sososkin’,+ na so Yehovah taki.”
