Amos 1:1-15
1 Amos, wan man fu Tekowa+ di ben e kweki skapu, ben kisi wan fisyun di abi fu du nanga Israel.+ Na a ten dati Kownu Usia+ ben e tiri Yuda èn Kownu Yerobeyam,+ a manpikin fu Yoas,+ ben e tiri Israel. Tu yari bifo a gronseki+ Amos kisi a fisyun disi.
2 A taki:
„Neleki wan lew Yehovah o bari komoto fu Sion+ èn en sten o de fu yere komoto fu Yerusalem.+ Meki den weigron fu den skapuman bigin sari èn meki na ede fu Karmel-bergi kon drei.”+
3 „Yehovah taki: ’„Ibri tron baka* Damaskus+ e opo ensrefi. A e masi Gilead+ nanga isri wrokosani di sma e gebroiki fu masi aleisi. Dati meki mi musu fu strafu en.
4 Mi o seni wan faya+ go na a oso fu Hasael+ èn a faya o bron den toren fu Ben-Hadad+ pe sma e tan.
5 Mi o broko den bowtu fu den portu fu Damaskus.+ Mi o kiri den sma fu Bikeyat-Afen nanga a sma di e tyari a kownutiki fu Bet-Eden. Den sma fu Siria o abi fu go leki katiboman na Kir”,+ na so Yehovah taki.’
6 Yehovah taki: ’„Ibri tron baka Gasa+ e opo ensrefi. A meki wan heri pipel tron katiboman+ èn a tyari den go na Edom.+ Dati meki mi musu fu strafu en.
7 Mi o seni wan faya go na a skotu fu Gasa+ èn a faya o bron den toren drape pe sma e tan.
8 Mi o kiri den sma fu Asdod+ nanga a sma di e tyari a kownutiki fu Askelon.+ Mi o strafu+ Ekron,+ èn den Filisteasma di tan abra o dede”,+ na so a Moro Hei Masra Yehovah taki.’
9 Yehovah taki: ’Ibri tron baka Tirus+ e opo ensrefi. A tyari wan heri pipel leki katiboman go na Edom, èn a no memre a frubontu fu den brada.+ Dati meki mi musu fu strafu en.
10 Mi o seni wan faya go na a skotu fu Tirus èn a faya o bron den toren drape pe sma e tan.’+
11 Yehovah taki: ’Ibri tron baka Edom+ e opo ensrefi. Nanga feti-owru a hari go na baka en eigi brada.+ A no abi sari-ati moro.+ Ala ten a e priti sani nanga atibron. Doronomo a de nanga bigi atibron.+ Dati meki mi musu fu strafu en.
12 Mi o seni wan faya go na Teiman+ èn a faya o bron den toren fu Bosra+ pe sma e tan.’
13 Yehovah taki: ’„Ibri tron baka den Amonsma+ e opo densrefi. Fu di den ben wani meki a kondre fu den kon moro bigi,+ meki den go na Gilead èn den priti a bere opo fu den uma di de nanga bere. Dati meki mi musu fu strafu den.+
14 Mi o sutu faya gi a skotu fu Raba.+ Te a faya o bron den toren drape pe sma e tan, dan den o bro wan tutu fu go na feti èn wan draiwinti o kon na a dei te bigi winti e wai.+
15 Dan a kownu fu den musu go na ini katibo, iya, en nanga den granman fu en”,+ na so Yehovah taki.’
Futuwortu
^ Ibri tron te yu e leisi den wortu „ibri tron baka . . . e opo ensrefi”, dan na ini Hebrewtongo a skrifi „fu di . . . opo ensrefi dri leisi, èn fu di a opo ensrefi fo leisi.”
