Na ini Bijbel, a wortu di vertaal nanga „opobaka” komoto fu a Griki wortu a·naʹsta·sis. A Griki wortu dati wani taki ’a e opo baka’ noso ’a e opo fu tanapu baka’. Te wan sma kisi wan opobaka dan a e komoto fu dede, dan a e kisi libi baka leki a sma di a ben de fosi a dede.​—1 Korentesma 15:12, 13.

 Aladi a wortu „opobaka” no skrifi na ini den Hebrew Buku fu Bijbel di sma e kari furu tron na Owru Testamenti, toku a leri dati de drape tu. Fu eksempre, Gado pramisi nanga yepi fu a profeiti Hosea: „Na ini Grebi mi o puru den. Mi o puru den na dede.”​—Hosea 13:14; Yob 14:13-​15; Yesaya 26:19; Danièl 12:​2, 13.

 Pe sma o kisi wan opobaka? Wan tu sma o opo baka fu libi na ini hemel, èn fu tiri makandra nanga Krestes (2 Korentesma 5:1; Openbaring 5:​9, 10). Bijbel e kari disi „a fosi opobaka” nanga „den fosiwan di o opo baka”, èn disi e sori taki wan tra opobaka musu de tu (Openbaring 20:6; Filipisma 3:​11). A tra opobaka sa de te sma o kisi libi na grontapu baka. Dati sa de na opobaka di furu sma o kisi.​—Psalm 37:29.

 Fa sma o opo baka? Gado gi Yesus a makti fu gi sma libi baka (Yohanes 11:25). Yesus sa gi „ala den sma di de na ini den grebi” wan opobaka (Yohanes 5:​28, 29). Te den sma disi kisi wan opobaka, dan den sa de a srefi sma, nanga a denki èn nanga den fasi di den ben abi fosi den dede. Den wan di o kisi wan opobaka fu go na hemel sa kisi wan yeye skin, ma den wan di o kisi wan opobaka fu libi na grontapu o kisi wan gosontu libisma skin di bun srefisrefi.​—Yesaya 33:24; 35:​5, 6; 1 Korentesma 15:42-​44, 50.

 Suma sa kisi wan opobaka? Bijbel e taki dati „Gado sa gi wan opobaka na den sma di du san reti èn na den sma di no du san reti” (Tori fu den apostel 24:15). Den sma di du san reti na sma soleki Noa, Sara nanga Abraham (Genesis 6:9; Hebrewsma 11:11; Yakobus 2:​21). Den sma di no du san reti na den sma di no du san Gado taki, ma di no ben kisi na okasi tu fu leri fu Gado èn fu du san a taki.

 Ma den wan di ben ogri so te taki noiti den ben o man kenki den libi, no sa kisi wan opobaka. Te den sortu sma disi e dede, dan den e dede sondro howpu, bika den dede fu têgo.​—Mateyus 23:33; Hebrewsma 10:26, 27.

 O ten na opobaka o de? Bijbel ben taki na fesi dati na opobaka fu sma di o libi na ini hemel ben o bigin na ini 1914 di Krestes ben o bigin tiri leki Kownu(1 Korentesma 15:21-​23). Na opobaka fu sma di o libi na grontapu sa feni presi na ini a pisi ten fu a Dusun Yari Tiri fu Yesus Krestes, te grontapu sa kenki kon tron wan paradijs.​—Lukas 23:43; Openbaring 20:​6, 12, 13.

 Fu san ede wi kan bribi na ini na opobaka? Bijbel e fruteri finifini fu neigi sma di kisi wan opobaka èn di trawan ben si baka di den kon na libi baka (1 Kownu 17:17-​24; 2 Kownu 4:​32-​37; 13:20, 21; Lukas 7:​11-​17; 8:​40-​56; Yohanes 11:38-​44; Tori fu den apostel 9:​36-​42; Tori fu den apostel 20:​7-​12; 1 Korentesma 15:​3-6). Na opobaka di Yesus ben gi Lasarus ben de wan spesrutu opobaka, fu di Lasarus ben dede fo dei kaba, èn furu sma ben de drape di Yesus ben gi Lasarus wan opobaka (Yohanes 11:39, 42). Srefi den wan di ben teige Yesus no ben taki dati na opobaka disi no ben feni presi, dati meki den ben suku fu kiri Yesus nanga Lasarus.​—Yohanes 11:47, 53; 12:​9-​11.

 Bijbel e sori wi taki Gado abi a makti fu gi sma wan opobaka, ma sosrefi taki a e angri fu gi sma wan opobaka. Gado e memre finifini fa ibri sma ben de. A o gebroiki a makti fu en fu gi den wan opobaka (Yob 37:23; Mateyus 10:30; Lukas 20:37, 38). Gado man gi dedesma libi baka, èn a wani du dati tu! Yob e taki fu a ten te Gado o gi sma wan opobaka: „Yu o angri fu si mi, a sani di yu meki nanga yu eigi anu.”​—Yob 14:15.

Fowtu denki di sma abi fu na opobaka

 Fowtu denki: Na opobaka na te a sili e tron wán nanga a skin baka.

 San tru: Bijbel e leri wi taki a sili na a sma srefi, a no den wan pisi di e tan na libi baka te wan sma dede (Genesis 2:7, luku a futuwortu; Esekièl 18:4). Wan sma di kisi wan opobaka a no wan sma di de wán baka nanga en sili, ma na wan sma di Gado meki leki wan libilibi sili.

 Fowtu denki: Son sma o kisi wan opobaka, ma baka dati wantewante Gado o kiri den.

 San tru: Bijbel e taki dati „den sma di du takru sani, o opo baka fu kisi krutu” (Yohanes 5:​29). Ma a krutu di den o kisi no de fu san den du fosi den kisi wan opobaka, ma fu den sani di den sa du baka te den kisi wan opobaka. Yesus ben taki: „Den dede sma o yere a sten fu a Manpikin fu Gado èn den wan di poti prakseri, o kon na libi” (Yohanes 5:​25). Den wan ’di poti prakseri’, noso di gi yesi, na den wan di gi yesi na san den leri baka te den kisi wan opobaka, na so fasi den sa kisi wan opobaka pe den nen sa skrifi na ini ’a bukulolo fu libi’.​—Openbaring 20:12, 13.

 Fowtu denki: Te wan sma kisi wan opobaka, dan a o kisi a srefi skin di a ben abi fosi a dede.

 San tru: Baka te wan sma dede, a skin fu en e pori èn a skin e tron doti baka.​—Preikiman 3:​19, 20.