A JE i sfilitur nga ndjenjat negative, si trishtimi, zemërimi ose keqardhja? Nëse po, nuk të mbetet edhe aq kohë e fuqi për gjërat vërtet të rëndësishme për ty. Çfarë të bësh? *

Mbreti David përjetoi një sërë ndjenjash, si ankth e hidhërim. Çfarë e ndihmoi të ecte përpara? I la gjërat në dorë të Zotit. (1 Samuelit 24:12, 15) Madje i hodhi në letër ato që ndiente. Dhe ngaqë kishte besim te Perëndia, lutej pareshtur. *

Siç thamë në artikullin e parë, Gregori vuan nga një çrregullim ankthi. Ai thotë: «Ankthi që më zinte, i kapërcente kufijtë e arsyes dhe e humbja toruan.» Si e mori situatën nën kontroll? Gregori shpjegon: «Që të rifitoja ekuilibrin, pranova ndihmën e dashur të gruas dhe të miqve. Madje kërkova edhe ndihmën e mjekut dhe u informova më tepër për gjendjen time. Pasi bëra ca ndryshime në mënyrën e jetesës, ndjeva sërish se e kisha unë jetën në dorë dhe jo ajo mua. Edhe pse akoma kam kriza ankthi të përkohshme, tani e kuptoj më mirë se çfarë i shkakton dhe di si të veproj në këto raste.»

Nëse ndjenjat negative të kanë vënë përfund, provo sugjerimet e mëposhtme.

• Në një ditar shkruaj çdo ditë si ndihesh.

• Fol me një të afërm a mik të ngushtë.

• Mendo nëse ndjenjat e tua negative janë me vend. Për shembull, pyet veten: «A është vërtet e justifikueshme pikëpamja negative që kam për veten?»

• Mos mbaj ankth e mëri dhe mos u zemëro. Përdori energjitë për diçka më të dobishme. *

Përfundimi: Shpesh ndjenjat negative nuk vijnë nga faktorë të jashtëm, por vijnë nga ne, nga mënyra si i konceptojmë ato.