Zvapupu zvaJehovha zvinofarira kuudza vanhu vese mashoko ari muBhaibheri, kusanganisira vaya vakambotaura kuti, “Hatifariri zvamunoparidza.” Chinoita kuti Zvapupu zvidaro ndechekuti zvinoda Mwari uye zvinoda muvakidzani. (Mateu 22:37-39) Kuda kwatinoita Mwari kunoita kuti titeerere murayiro weMwanakomana wake wekuti ‘tipupure kwazvo.’ (Mabasa 10:42; 1 Johani 5:3) Kuti tikwanise kupupura kwazvo, tinoendesera vanhu mashoko aMwari kanopfuura kamwe chete, sezvaingoitwawo nevaprofita vaMwari vakararama kare. (Jeremiya 25:4) Tinoedzawo kuudza munhu wese “mashoko akanaka oumambo” ayo anoponesa upenyu, kusanganisira vaya vasina kuafarira pekutanga, nekuti tinoda vavakidzani vedu.​—Mateu 24:14.

 Tinowanzowana vanhu vanofarira zvatinoparidza patinodzokera padzimba dzatakambosangana nevanhu vaiti havafariri mashoko edu. Chinoita kuti tidaro ndechekuti:

•   Vanhu vanotama.

•   Vamwe vanenge vari pamba ipapo vanogona kufarira mashoko atinoparidza.

•   Vanhu vanochinja. Zvinhu zviri kuitika munyika kana kuti zvinoitika muupenyu hwevanhu zvingaita kuti vamwe vawedzere ‘kuziva zvinodiwa zvavo zvomudzimu’ kureva kuti vawedzere kuda zvekunamata, votanga kufarira mashoko ari muBhaibheri. (Mateu 5:3) Kunyange vaya vanopikisa vanogona kuzochinja mwoyo, sezvakaita muapostora Pauro.​—1 Timoti 1:13.

 Kunyange zvakadaro, hapana munhu watinomanikidza kuti ateerere mashoko atinoparidza. (1 Petro 3:15) Tinodavira kuti munhu mumwe nemumwe anofanira kuzvisarudzira zvaanoda panyaya yekunamata.​—Dheuteronomio 30:19, 20.