Kirasi yechi129 Inopedza Kudzidza kuGiriyedhi

“Nhasi Izuva Renyu”

MUSI wa11 September 2010, vanhu vanenge 8 000 vakaunganira zuva rinokosha rokupedza kudzidza kweKirasi Yechi129 Yechikoro cheBhaibheri cheWatchtower cheGiriyedhi. Samuel Herd weDare Rinodzora reZvapupu zvaJehovha akaudza vadzidzi vacho kuti: “Nhasi izuva renyu. Tauya kuzofara nemi!”

“Nzeve Inonzwa”

Hama Herd vakavhura purogiramu yacho nokukurukura kuti vaKristu vose vanofanira kuteerera Shoko raMwari kuratidza kuti vari kushandisa zvakanaka “nzeve inonzwa.” (Zvirevo. 20:12) Vakaudza kirasi yacho kuti: “Mumwedzi mishomanana yapfuura manga makapa Jehovha nzeve dzenyu uye mucharamba muchidaro nokusingaperi.”

Mamishinari matsva angashandisa sei nzeve dzawo zvakanaka? Hama Herd vakataura kuti vangaita izvi “kana vakateerera Shoko raMwari.” Vakawedzera kuti: “Papurogiramu yanhasi pane zvakawanda zvichataurwa, izvo zvichaita kuti mugadzirire basa renyu semamishinari kwemakore anotevera.”

“Vimba naJehovha Nomwoyo Wako Wose”

Gerrit Lösch weDare Rinodzora, akakurukura hurukuro iyi inotokonya pfungwa kuvadzidzi vacho. Akarondedzera zvakaitika zvakawanda zvinoratidza kuti kubvira kare vanhu vaJehovha vaivimba naye, uye nanhasi vachiri kudaro.

Hama Lösch vakabva vati, “Mamishinari anofanirawo kuvimba naye pavanenge vachiita basa ravo.” Vakaenderera mberi vachiti: “Somuenzaniso munganetseka kuti, ‘Ndichanozvikwanisa here zvokudzidzira mutauro mutsva? Tsika dzeko ndichanodzigona here? Ndichakwanisa here kunogara kure nokumusha kwangu ndisinganyanyi kusuwa kumba?’” Ungaita sei pakadai? Hama Lösch vakakurudzira kirasi yacho ‘kuvimba naJehovha.’

Hama Lösch vakaverengawo Zvirevo 14:26, iyo inoti: “Mukutya Jehovha mune chivimbo chakasimba.” Kuvimba kwatinoita naMwari kuchawedzera kana tikafunga nezvenzira dzakawanda dzaakatikomborera nadzo.

Bhaibheri rinoti munhu anovimba naJehovha “achava somuti wakadyarwa pedyo nemvura, unoendesa midzi yawo kurwizi chaiko; uye haazooni panouya kupisa, asi mashizha ake achava akasvibirira.”—Jeremiya 17:7, 8.

Zvinorehwa apa zviri pachena. Hama Lösch vakati: “Pasinei nezvamuchanotarisana nazvo, munofanira kuvimba naJehovha.”

“Tevedzera Ngirozi Dzakatendeka”

Uyu ndiwo wakanga uri musoro wehurukuro yakapiwa naHama Stephen Lett veDare Rinodzora. Ngirozi dzinotiratidza muenzaniso wakanaka chaizvo. Hama Lett vakati: “Zvakakodzera kuti titevedzere zvose zvinotaurwa neBhaibheri nezvengirozi.” Vakabva vataura zvinhu zvina zvinoitwa nengirozi zvatinofanira kutevedzera zvinoti: Kutsungirira, kuzvininipisa, kubatsira kwadzinoita uye kuperera kwadzo kuna Mwari.

Bhaibheri rinotaura kuti imwe ngirozi yakarwisa ‘muchinda wePezhiya,’ kureva dhimoni rine simba, kwemazuva 21. (Dhanieri 10:13) Ngirozi iyoyo yakaratidza kutsungirira. VaKristu vari ‘kurwawo nemasimba emidzimu yakaipa,’ vakadaro Hama Lett. (VaEfeso 6:12) Vakaudza  vadzidzi vacho kuti: “Rwisai nesimba kuti murambe muri mubasa renyu.”

Manoa, baba vaSamsoni pavakabvunza zita rengirozi, ngirozi yacho yakaramba kuvaudza. Zvayakaita izvi kwaiva kuzvininipisa. (Vatongi 13:17, 18) Hama Lett vakaudza kirasi yacho kuti: “Kana mumwe munhu akaedza kukurumbidzai kana kuti kuramba ongotaura nezvemano enyu, itai kuti arumbidze Jehovha nesangano rake, kwete imi.”—1 VaKorinde 4:7.

Kwasara nguva pfupi kuti Jesu afe paakanga ari mubindu reGetsemane, “ngirozi yakabva kudenga yakabva yazviratidza kwaari, ikamusimbisa.” (Ruka 22:43) Ngirozi iyi yakaratidza kuti yaida kubatsira. Hama Lett vakati: “Kuti uzive kuti ndezvipi chaizvo zvinodiwa nevanhu vari mundima yako nyengetera, wobva wabatsirwa naJehovha kuti uzviite.”

Sezvo kuchingova nengirozi shomanana dzakabatana naSatani pakupanduka, tinogona kutaura kuti gurumwandira redzimwe ngirozi mienzaniso yakanaka yokuperera kuna Mwari.—Zvakazarurwa 12:4.

Hama Lett vakakurudzira vadzidzi vachiti: “Sezvinoitwa nengirozi idzodzo dzakatendeka, dzivisai Dhiyabhorosi.” “Rwisanai naDhiyabhorosi, uye iye achakutizai.”—Jakobho 4:7.

Dzimwe Pfungwa Huru Nhatu Dzakakurukurwa Mupurogiramu Yacho

“Ramba Uchiita Kuti Jehovha Ave Dombo reMwoyo Wako.” Vachikurukura musoro iwoyo unobaya mwoyo, unotorwa pana Pisarema 73:26, Hama Gary Breaux, veDare reBazi rokuUnited States, vakabatsira vadzidzi kuti vaone kukosha kwokuvimba naJehovha. Jehovha anofananidzwa nedombo pakudini? Hama Breaux vakati: “Dombo rinogona kutsikirira bepa kuti risatorwa nemhepo. Saka Jehovha anogonawo kuita sedombo iroro pakuti anogona kurinda mwoyo wako.” Ichokwadi kuti mwoyo unogona kutinyengera patinosangana nemiedzo inoda kuti titsungirire. (Jeremiya 17:9) Chimwe chezvinhu zvingaita kuti munhu afunge kusiya basa iri mamiriro okunze aanenge asina kujaira, chikafu chaasati ambodya, uye mamwe mamishinari aanenge achigara nawo. Hama Breaux vakati: “Pachasvika nguva yokuti muchada kuita zvisarudzo. Muchasarudza zvichafadza Jehovha here? Kana mukadaro, Jehovha achava ‘dombo remwoyo yenyu.’ Achakutungamirirai pane zvamunoita.”

“Une Kutenda Kwakasimba Zvokuti Unogona Kunyorovesa Tsoka Dzako Here?” Hurukuro iyi yakavakirwa pana Joshua chitsauko 3, yakakurukurwa naSam Roberson, mumwe murayiridzi weGiriyedhi. Mamiriyoni evaIsraeri aizoyambuka sei Rwizi rwaJodhani irwo rwakazara? Jehovha akaudza Joshua kuti arayire vapristi kuti ‘vamire muJodhani.’ Mwari akavavimbisa kuti: “Tsoka dzevapristi vakatakura areka . . . padzinongotsika mumvura yaJodhani, mvura yaJodhani ichaganhuka, . . . uye ichamira sedziva rimwe.” (Joshua 3:8, 13) Hama Roberson vakataurira vadzidzi kuti: “Muupenyu hwenyu muchasangana nematambudziko angafananidzwa nerwizi ‘rwaJodhani’ angakutadzisai kuwana zvikomborero.” Somuenzaniso, munganetsana nemamwe mamishinari. Moita sei pakadaro? “Fungai nezvebasa racho, kwete vanhu vari kuriita.” Hama Roberson vakakurudzira kirasi yacho vachiti: “Kana mukava nokutenda kwakasimba zvokuti munogona kunyorovesa tsoka dzenyu, Jehovha achakubatsirai kukurira matambudziko amuchasangana nawo semamishinari.”

“Simbisa Zvirongwa Zvako.” Hurukuro iyi yakakurukurwa naHama William Samuelson, mumwe murayiridzi weGiriyedhi. Yaibva pana Zvirevo 16:3 inoti: “Isa mabasa ako kuna Jehovha uye zvirongwa zvako zvichasimbiswa kwazvo.” Hama Samuelson vakabvunza vadzidzi kuti: “Saka rugwaro urwu rwunoreva here kuti imi chenyu ‘kungoisa mabasa enyu’ kuna Jehovha  makapeta zvenyu maoko?” Aiwa, nokuti Zvirevo 16:1 inoti: “Zvinorongwa nomwoyo ndezvomunhu wepanyika.” Hama Samuelson vakati: “Jehovha haakurongerei zvinodiwa nemwoyo yenyu. Asi munofanira kuva nechokwadi chokuti muri kuita zvakarurama. Kana mukaramba muchidzidza, muchinyengetera uye makati kwati-kwati nehofisi yebazi rekwamuchaenda, mwoyo yenyu icharamba ichikutungamirirai zvakanaka uye Jehovha achasimbisa zvirongwa zvenyu.”

Kubvunzurudzwa Uye Kurondedzera Zvakaitika

Imwe nzira inodzidziswa nayo vokuGiriyedhi ndeyokuitawo basa rokuparidza neungano dzeZvapupu zvaJehovha dzavanenge vachipinda nadzo. Hama Mark Noumair, mumwe murayiridzi weGiriyedhi akabvunzurudza vadzidzi vakati wandei nezvezvakaitika pavaiparidza. Chinhu chakanyanya kusimbiswa pane zvakaitika izvi, kushanda kunoita munyengetero pakutsvaka vane mwoyo unoda kudzidza mundima yavanenge vachiparidza.

Somuenzaniso mumwe murume nomudzimai wake vakanga vari pane imwe resitorendi. Mumwe mushandi wepo akavaona vachinyengetera chinyararire. Akavabvunza kana vaiva Zvapupu zvaJehovha. Paakaziva kuti vakanga vari Zvapupu, mushandi uyu akatsanangura kuti aivawo Chapupu kubvira achiri muduku asi akazosiya zvokunamata. Akanga ambopara mhosva akatombovharirwa mujeri. Saka iye zvino mukomana uyu wechiduku akanga ava kudazve kuva noukama naJehovha. Akataurawo kuti vasati vasvika paresitorendi iyi, akanga achinyengetera kuna Mwari achitaura nezvechido chake chokuti amubatsire kuti agadzirise mararamiro ake. Saka munyengetero wake wakanga wapindurwa!

Muhurukuro yavo yaiti, “Ravirai Henyu Muone Kuti Jehovha Akanaka,” Hama Rudi Hartl vedhipatimendi rokunyora mhinduro dzemibvunzo yeBhaibheri kana kuti mabhuku anotsanangura Bhaibheri inobva kuvaverengi, vakabvunzurudza Wayne Wridgway wokuMozambique, Jason Reed wokuChile, uye Kenji Chichii wokuNepal. Vose vari vatatu vakapinda chikoro cheGiriyedhi. Hama idzi hadzina kuvanza matambudziko avakasangana nawo vachangotanga basa roumishinari anosanganisira kudzidza mumwe mutauro, kudzidza tsika dzevamwe uye kukurira dambudziko rokusuwa kumusha. Hama Chichii vakati: “Chimwe chakatibatsira ndechokuti patakangosvika muungano takabva tatsvaka shamwari. Pataiumba ushamwari nevanhu vari muungano, zvaitibatsira kuti tisanyanya kusuwa kumba.”

Vadzidzi vacho 56 vachangopedza kupiwa zvitupa zvavo, mumwe wacho akaverenga tsamba yokuonga yaibaya mwoyo yakanyorwa nekirasi yacho. Tsamba yacho muchidimbu yaitenda Dare Rinodzora ichiti: “Kirasi yedu yaita zvokuzvionera rudo rwamunarwo uye kushanda nesimba kwamakaita muchitirongera zvidzidzo zvedu, muchitishanyira, uye muchitipa mirayiridzo yakanaka ine chokuita nokunamata. Nokuti makatiratidza rudo, patichasvika kwatanzi tiende tichaita nepose patinogona kutevedzera rudo rwenyu, mwoyo murefu, kuzvininipisa, uye kuda vanhu.”

[Mashoko okukwezva vaverengi ari papeji 28]

“Kana mumwe munhu akaedza kukurumbidzai . . . , itai kuti arumbidze Mwari nesangano rake”

[Mashoko okukwezva vaverengi ari papeji 29]

“Muupenyu hwenyu muchasangana nematambudziko angafananidzwa nerwizi ‘rwaJodhani’”

 [Chati/Mepu iri papeji 31]

ZVAKAITA KIRASI YACHO

9 nhamba yenyika dzaimirirwa

56 vadzidzi vose

28 vakaroorana

33.0 avhareji yezera

17.9 avhareji yemakore kubvira pakubhabhatidzwa

13.3 avhareji yemakore omuushumiri hwenguva yakazara

[Mepu]

(Kana uchida mashoko azere, ona bhuku racho)

Vaiva mukirasi yacho vakaendeswa kunyika 25 dziri pasi apa:

NYIKA DZAKATUMIRWA MAMISHINARI

BOLIVIA

BOTSWANA

BULGARIA

CONGO (KINSHASA)

CÔTE D’IVOIRE

GAMBIA

GERMANY

INDIA

INDONESIA

KENYA

LIBERIA

MACEDONIA

MADAGASCAR

MALAYSIA

MOZAMBIQUE

PANAMA

PERU

POLAND

ROMANIA

SERBIA

SIERRA LEONE

SWAZILAND

TANZANIA

UGANDA

ZIMBABWE

[Mufananidzo uri papeji 30]

Vadzidzi veGiriyedhi vachienzanisira zvakaitika pavaiparidza

[Mufananidzo uri papeji 31]

Kirasi Yechi129 Yechikoro cheBhaibheri cheWatchtower cheGiriyedhi Inopedza Kudzidza

Pane zvakarongwa pasi apa, mitsetse yakarongwa ichibva mberi ichidzoka shure, uye mazita akarongwa kubva kuruboshwe zvichienda kurudyi mumutsetse woga woga.

(1) Munaretto, R.; Olofsson, Y.; Budden, K; Najdzion, L.; Moya, G.; Treviño, G.; Dion, A.; Fleegle, A.

(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.

(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.

(4) Fitzpatrick, M.; Najdzion, B.; Skallerud, L.; Harris, A.; Harris, S.; Budden, R.; Paramo, Y.; Skallerud, K.

(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.

(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.

(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.