PACHITSUWA chidiki cheSangir Besar chiri kuIndonesia, panogara hanzvadzi dzedu nhatu. Makore adarika vaishanda pamwe chete pamahombekombe egungwa. Vanozivikanwa chaizvo pachitsuwa ichi nekuparidza kwavanoita vachibatsira vanhu kuti vanzwisise Bhaibheri. Asi panguva iyoyo vaiita rimwe basa risiri rekuparidza.

Vaitanga nekupinda mugungwa, votakura matombo anorema vachidzoka nawo kumahombekombe. Mamwe ematombo acho ainge akakura sebhora renhabvu. Vakadzi vacho vaizogara pazvigaro zvakagadzirwa nemiti, vopwanya matombo acho nesando kusvikira aita madiki semazai ehuku. Vaibva vatakura matombo iwayo madiki ari mumabhaketi, vokwidza nawo masitepisi vachienda kwavanogara. Vaibva vazoisa matombo iwayo mumasaga mahombe ayo aizotakurwa nemota uye aizoshandiswa pakugadzira mugwagwa.

Mumwe wehanzvadzi idzi ndiHulda. Ndiye aiita nguva yakawanda kupfuura vamwe achiita basa iri. Aiwanzoshandisa mari yese yaaiwana kuti ariritire mhuri yake. Asi iye zvino akanga ava kushanda aine chimwezve chinangwa. Aida kutenga tablet kuitira kuti ave neJW Library. Hulda aiziva kuti mavhidhiyo uye zvimwe zvinhu zviri paJW Library zvaizomubatsira muushumiri uye kuti anzwisise Bhaibheri.

Hulda akazowedzera kushanda kwemaawa maviri mangwanani ega ega kwemwedzi nehafu achipwanya matombo anozadza karori kadiki. Mari yake yekutenga tablet yakazokwana.

Hulda anoti, “Kunyange zvazvo ndainge ndaparara nekuneta uye kurwadziwa nekupwanya matombo, ndakakurumidza kuzvikanganwa zvese izvozvo pandakanga ndava kushandisa tablet iri idzva kuti ndiwedzere unyanzvi hwangu muushumiri, uye pakugadzirira misangano yechiKristu zviri nyore.” Hulda akatiwo tablet iri rakamubatsira pakatanga chirwere cheCOVID-19, sezvo zvinhu zvakawanda zvine chekuita nekunamata zvakanga zvava kuitirwa mumafoni. Tinofara chaizvo kuti Hulda akakwanisa kuzadzisa chinangwa chake.