“Afai e te fia iloa moni le Atua, ia pipii pea i Molimau a Ieova.” Na faateʻia aʻu ina ua ou faalogo i lenā tala. I lenā taimi, e leʻi leva talu ona matou suʻesuʻe ma Molimau a Ieova. Ae ina ia e malamalama i le māfuaaga na faateʻia ai aʻu, seʻi oʻu faamatala puupuu atu loʻu olaga.

 Na ou fanau i Quezaltepeque, o se taulaga i El Salvador. Ou te lona ono i le matou fanauga e toʻa 15. Na taumafai oʻu mātua e tausia aʻe aʻu ina ia ou faamaoni ma usitaʻi i tulafono. E lē gata i lea, sa asiasi mai Leonardo ma isi Molimau a Ieova e aʻoaʻo i matou i le Tusi Paia. Ae na ou teena mea na aʻoaʻoina ai aʻu, ae ou faia mea leaga. Ina ua 14 oʻu tausaga, na amata ona ou inu ʻava malosi, ma faaaogā fualaau faasāina ma aʻu uō i le aʻoga. Na auauaʻi ona latou tuua le aʻoga ae auai i se kegi, ma na ou mulimuli i a latou taaʻiga leaga. Na matou faaalu le tele o taimi o le aso i magāala e tauanau tupe mai i tagata ma gaoi, ina ia faatau ai fualaau faasāina ma tapaa.

 Na avea le kegi ma oʻu aiga. Na ou faamaoni iā i latou. O se faaaʻoaʻoga, i se tasi aso na osofaʻi ai e se tasi o le matou kegi soʻu tuaoi a o lele i fualaau faasāina. A o fufusu, na puʻe e loʻu tuaoi laʻu uō ma ia viliina leoleo. Na ou ita tele, ma ou sasaina ai le taavale a loʻu tuaoi i se pate ina ia faamaamulu ai laʻu uō. Na ʻaiʻoi mai loʻu tuaoi e taofi, a o oʻu sasaina i lalo faamalama o le taavale ma faaleaga le taavale atoa, ae ou te leʻi fia faalogo i ai.

 Ina ua 18 oʻu tausaga, na tau ai la matou kegi ma leoleo. A o oʻu sauni e togi se pomu, ae pā loa i loʻu lima, ou te leʻi iloa pe na faapefea ona tupu. Na pau le mea ou te manatuaina, o le taape o loʻu alofilima na uu ai le pomu ma ou matapogia ai. Ou te teʻi ane i le falemaʻi, ua leai atoa soʻu alofilima taumatau, pē loʻu taliga taumatau ma na toetoe lē iloa se mea i loʻu mata taumatau.

 E ui i oʻu manuʻaga, ae ina ua ou teʻa mai i le falemaʻi na ou toe alu foʻi i laʻu kegi. E leʻi umi ae puʻe loa aʻu e leoleo ma tuu i le falepuipui. I inā na matuā faamalosia ai la matou faiā ma i isi sui o le matou kegi. Na matou faaalu le aso atoa e faifaimea faatasi ai, e mai lava i le ti o le taeao i le taimi e ula ai a matou mariuana muamua, seʻia oo lava ina matou momoe.

 Na asiasi mai Leonardo iā te aʻu, a o oʻu i le falepuipui. A o ma talanoa, na ia tusi i laʻu peʻa na i loʻu lima taumatau. Na ia fesili mai: “E te iloa le uiga o togitogi na e tolu?” Na ou tali atu, “ioe, o feusuaʻiga, fualaau faasāina ma musika rock and roll.” Ae na tali mai Leonardo: “O aʻu la, e uiga atu i le falemaʻi, falepuipui ma le oti. Na e i le falemaʻi, o lea ua e i le falepuipui. Ua e iloa la le mea o le a sosoo mai.”

 Na matuā faateʻia aʻu i le tala lea a Leonardo. E saʻo lelei Leonardo. Na ou eliina lava e aʻu loʻu tuugamau e ala i le auala na ou ola ai. Na valaaulia aʻu e Leonardo e ma te suʻesuʻe faatasi le Tusi Paia, ma na ou taliaina. O mea na ou aʻoaʻoina mai i le Tusi Paia, na uunaʻia ai aʻu e suia loʻu olaga. O se faaaʻoaʻoga, ua taʻua i le Tusi Paia: “O aumea leaga e faaleagaina ai mea lelei ua masani ai tagata.” (1 Korinito 15:33.) O lea, o le mea muamua na ou faia, o le saʻili lea o ni uō fou. O le iʻuga, na ou lē toe auai i fono a le matou kegi, ae ou auai i sauniga a Molimau a Ieova sa faia i le falepuipui. O sauniga a Molimau a Ieova na ma feiloaʻi ai ma se pagota e igoa iā Andres, na papatiso o se Molimau a Ieova a o iai i le falepuipui. Na ia valaaulia aʻu ina ia fai se ma ti o le taeao. Mulimuli ane, e leʻi toe amataina loʻu aso i le ulaina o se mariuana, ae ua amata i le talatalanoa ma Andres i le Tusi Paia i taeao uma.

 Na vave ona mātauina e sui o le kegi suiga iā te aʻu. O le iʻuga, na faapea mai se taʻitaʻi o le kegi e fia talanoa mai. Na ou fefe. Ou te lē iloa le mea e na te faia pe ia iloa loʻu faanaunauga auā e matuā faigatā pe a tuua le kegi. Na ia faapea mai: “Ua matou mātauina ua e lē toe auai i a tatou fono ae ua e auai i sauniga a Molimau a Ieova. O le ā lau fuafuaga lenā ua i ai?” Na ou taʻu i ai ou te manaʻo e faaauau ona ou suʻesuʻeina le Tusi Paia ma sui loʻu olaga. Na faateʻia aʻu ina ua faapea mai, e talia e le kegi laʻu faaiʻuga pe a e faamaoni e avea moni oe o se Molimau a Ieova. Ona ia faapea mai lea: “Afai e te fia iloa moni le Atua, ia pipii pea i Molimau a Ieova. E matou te faatalitalia o le a e lē toe faia ni mea leaga. Ou te faamālō atu iā te oe. O le mea saʻo lenā e te faia. E mafai moni lava ona fesoasoani atu Molimau iā oe. Sa fai e Molimau a Ieova laʻu suʻesuʻega a o ou i ai i le Iunaite Setete, ma e Molimau a Ieova nisi o le matou aiga. Aua e te fefe. Ia faaauau pea.” Ae na iai pea oʻu lagona fefe ae i le taimi e tasi, na ou matuā fiafia. Na ou faafetai iā Ieova le Atua i loʻu loto. Na pei aʻu o se manulele ua tatala mai i se pā na loka ai, ma na ou malamalama i faaupuga a Iesu: “E iloa e outou le upu moni, e tuusaʻoloto foʻi outou e le upu moni.”​—Ioane 8:​32

 Na tofotofo aʻu e nisi o aʻu uō e ala i le ofo mai o fualaau faasāina, ma i nisi taimi na ou lolo atu ai. I se taimi mulimuli ane, ina ua māeʻa le tele o aʻu tatalo faatauanau, na mafai loa ona ou teena aʻu masaniga leaga.​—Salamo 51:10, 11.

 Ina ua tatala aʻu mai i le falepuipui, e toʻatele na talitonu o le a ou toe foʻi i loʻu olaga tuai sa i ai, ae e leai. Nai lo o lea, e masani na ou alu i le falepuipui i le tele o taimi, e suʻesuʻe ma isi pagota mea na ou aʻoaʻoina mai i le Tusi Paia. O le iʻuga, na talitonu moni aʻu uō na iai muamua ua suia loʻu olaga. E faanoanoa, ona e leʻi faapena le vaaiga a oʻu fili.

 I se tasi aso a o oʻu talaʻi, na faafuaseʻi ona siʻoina i maʻua ma laʻu paga e se kegi leaga sa masani ona matou fetauaʻi, ma na latou mananaʻo e fasioti aʻu. Na lototele laʻu paga e faamatala atu ma le faaaloalo iā i latou, ou te lē o toe auai i se kegi. Ae i le taimi lenā, o loo oʻu taumafai ou te toʻa. Na fasi aʻu ma lapataʻi mai e aua neʻi ou toe oo i lo latou vaipanoa, ma na tuu loa i lalo a latou auupega ma faatonu i maʻua e ō ese. Ua matuā suia moni e le Tusi Paia loʻu olaga. I taimi ua teʻa, a tupu se mea faapea, ou te suʻea le auala e taui atu ai. Ae o le taimi lenei, ua ou faatatauina le fautuaga i le 1 Tesalonia 5:​15: “Aua neʻi taui atu e se tasi o outou le leaga i le leaga i se tasi, ae ia tausisi pea e faia le mea lelei e le tasi i le isi, atoa ma isi tagata uma lava.”

 Talu ona avea aʻu ma Molimau a Ieova, ua ou taumafai e avea o se tagata faamaoni. E lē faigofie. Ae e ui i lea, o le fesoasoani a Ieova le Atua, o fautuaga a le Tusi Paia ma le lagolagosua a aʻu uō fou, ua ou taulau ai i le avea ma tagata faamaoni. Ou te lē toe fia foʻi i loʻu olaga tuai.​—2 Peteru 2:​22.

 Na avea aʻu ma se tagata sauā ma ita tele. Ou te taʻutino atu, e faapenei ua ou oti pe ana ou mulimuli pea i oʻu ala leaga. Na matuā suia lava aʻu i mea na ou aʻoaʻoina mai i le Tusi Paia. Na ou teena ai masaniga leaga. Na ou aʻoaʻoina foʻi e tatau ona tausia le filemu ma oʻu fili. (Luka 6:​27) Ma ua ou fiafia i faauōga e fesoasoani e atiaʻe ai uiga lelei. (Faataoto 13:20) Ua ou ola i se olaga fiafia e iai sona fuafuaga, o le auauna lea i le Atua, o lē e nofosauni e faamagalo mea leaga uma na ou faia.​—Isaia 1:​18.

 I le 2006, na ou auai ai i se Aʻoga Faale-Tusi Paia mo Uso Nofofua. Mulimuli ane, na ou faaipoipo i laʻu avā lalelei ma tausia aʻe le ma tama teine. I le taimi nei, o loo oʻu faaaluina le tele o loʻu taimi e aʻoaʻo ai isi i mataupu silisili o le Tusi Paia, lea na fesoasoani iā te aʻu. O loo oʻu auauna foʻi o se toeaina i le faapotopotoga, ma o loo oʻu fesoasoani i talavou ia ʻalofia mea sesē na ou faia a o oʻu pei o i latou. Nai lo o le eliina o loʻu lava tuugamau, ua ou atiaʻe nei se lumanaʻi e faavavau e pei ona folafola mai e le Atua i le Tusi Paia.