I le 2011, na sau ai se tamāloa sulufa‘i mai i Eritrea i Nouē. Ina ua latou feiloa‘i ma Molimau a Ieova, na ia fai i ai na iai Molimau a Ieova i lona atunuu na feiloa‘i i ai. Na ia ta‘ua, a o iai i le vaega‘au na ia mātauina ai ni Molimau a Ieova na faafalepuipui ona o lo latou faatuatua, lo latou lē taliaina o le auai i se vaega‘au, e ui lava ina ia faileagaina i latou.

 Na iai se mea na tupu na faafalepuipui ai le tamāloa. O i inā na falepuipui faatasi ai le tamāloa ma ni Molimau se to‘atolu e igoa iā Paulos Eyasu, Negede Teklemariam, ma Isaac Mogos, o ē na faafalepuipui talu mai le 1994 ona o lo latou solitū.

 A o faafalepuipui le tamāloa, na ia mātauina ai e faatatau e Molimau a Ieova i o latou olaga mea e latou te a‘oa‘oina ai isi. Na ia mātauina lo latou faamaoni ma e latou te tufa atu fo‘i a latou mea‘ai i isi pagota. Na ia mātauina fo‘i le auala na su‘esu‘e ai e pagota Molimau a Ieova le Tusi Paia i aso ta‘itasi, ma valaaulia isi e latou te su‘esu‘e faatasi. Ae na latou teena le faasa‘olotoina o i latou, pe a latou sainia se pepa e faailoa atu ai le lē toe avea o i latou ma Molimau a Ieova.

 O mea na mātauina e lenei tamāloa lotofaamaoni i le falepuipui na matuā pā‘ia ai lona loto. Ina ua taunuu i Nouē na ia fia iloa atili le māfuaaga e malosi ai le faatuatua o Molimau a Ieova. O lea, ina ua latou feiloa‘i ma Molimau a Ieova, na vave lava ona ia su‘esu‘eina le Tusi Paia ma auai i sauniga.

 Iā Setema 2018, na papatiso ai o ia o se tasi o Molimau a Ieova. I le taimi lenei, ua faaaogā e lenei tamāloa avanoa uma e faafesoota‘i ai tagata mai i Eritrea ma Sudan ma faalaeiau i latou e su‘esu‘e le Tusi Paia ma atia‘e se faatuatua malosi.