E tumau ona solitū Molimau a Ieova i mataupu faapolotiki, ona o o latou talitonuga e faavae mai i aʻoaʻoga a le Tusi Paia. E matou te lē faia ni faiga faatosina, palota mo se vaega faaupufai po o se sui tauvā, tauvā i faigāpalota, pe faia se vaega i so o se taumafaiga e suia se faigāmalo. E matou te talitonu o loo i le Tusi Paia māfuaaga maumaututū e tatau ai ona matou solitū.

•   E matou te mulimuli iā Iesu, o lē na teena se tofiga i faiga faapolotiki. (Ioane 6:​15) Na ia taʻu atu i ona soo “e lē o ni tagata o le lalolagi i latou,” ma faailoa manino atu e lē tatau ona latou lagolagoina ni mataupu faapolotiki.​—Ioane 17:14, 16; 18:36; Mareko 12:13-​17.

•   E matou te lagolagoina ma le faamaoni le Malo o le Atua, lea na fetalai ai Iesu: “O le a talaʻiina atu lenei tala lelei o le malo i le lalolagi atoa.” (Mataio 24:14) I le avea ai ma sui o le Malo o le Atua, ia ua faatonuina e faalauiloa atu le oo mai o lenā Malo, e tumau lo matou solitū i mataupu faapolotiki i atunuu uma, e aofia ai ma atunuu o loo matou nonofo ai.​—2 Korinito 5:​20; Efeso 6:​20.

•   O le tumau ona matou solitū, ua matou saʻoloto ai e talanoa atu i so o se tagata e faatatau i le tala lelei o le Malo o le Atua, e tusa po o ā o latou manatu faapolotiki. E matou te taumafai e faailoa atu i a matou upu ma gaoioiga, e matou te faalagolago i le Malo o le Atua e foʻia faafitauli i le lalolagi.​—Salamo 56:11.

•   Talu ai e matou te ʻalofia fevaevaeaʻiga ona o mataupu faapolotiki, ua matou autasi ai o se ʻauuso faavaomalo. (Kolose 3:​14; 1 Peteru 2:​17) I se faaeseesega, o lotu ia e auai i faiga faapolotiki, ua fevaevaeaʻi foʻi o latou sui auai.​—1 Korinito 1:​10.

 Faaaloalo i faigāmalo. E ui e lē faia sa matou vaega i mataupu faapolotiki, ae e matou te faaaloalo i pulega a faigāmalo i atunuu o loo matou nonofo ai. E ōgatusa lenā ma le faatonuga a le Tusi Paia: “Ia gauaʻi tagata uma i faipule silisili.” (Roma 13:1) E matou te usiusitaʻi i tulafono, totogi lafoga, ma lagolagosua i taumafaiga a le malo mo le lelei o tagatānuu. Nai lo le faia o ni vaega i gaoioiga e tetee ai i le malo, e matou te mulimuli i le fautuaga a le Tusi Paia ina ia tatalo mo “tupu ma i latou uma i tulaga maualuluga,” aemaise pe a latou faia ni faaiʻuga e aafia ai le saʻolotoga e tapuaʻi ai.​—1 Timoteo 2:​1, 2.

 E matou te faaaloalo foʻi i aiā tatau a isi e faia ai a latou filifiliga i mataupu faapolotiki. Mo se faataʻitaʻiga, e matou te lē faalavelave i faigāpalota, pe aiā fua i isi ua filifili e palota.

 Po o lo matou solitū o se faatulagaga fou? E leai. Na solitū foʻi le ʻauaposetolo ma isi Kerisiano i le uluaʻi senituri i mataupufai a faigāmalo. Na taʻua i le tusi Beyond Good Intentions: “E ui lava na iā i latou le matafaioi o le faaaloalo i faipule silisili, ae e leʻi talitonu uluaʻi Kerisiano e tatau ona faia so latou sao i faiga faapolotiki.” I se tulaga talitutusa, na taʻua foʻi i le tusi On the Road to Civilization, “e leʻi umia [e uluaʻi Kerisiano] ni tofiga faapolotiki.”

 Pe e aafia le saogalemu o atunuu i lo matou solitū i mataupu faapolotiki? E leai. O i matou o ni tagatānuu filemu ma alolofa, ma e leai se māfuaaga e faapopoleina ai pulega a malo. Mātau se lipoti na saunia e le National Academy of Sciences of Ukraine i le 2001. Na latou taʻua le manatu lenei e faatatau i lo matou solitū: “E ono lē fiafia nisi i aso nei i le tulaga solitū o Molimau a Ieova. O le māfuaaga autū lenā na tuuaʻia ai i latou e pulega sauā a Nasi ma le faa-Komunisi i le taimi ua mavae.” E oo lava foʻi i le taimi o le pulega pulepuletutū a le Soviet Union, na tumau pea ona avea Molimau ma “tagatānuu usiusitaʻi i tulafono. Na latou galulue faamaoni ma le lē manatu faapito i faatoʻaga ma falegaosimea, ma e latou te leʻi faia ni gaoioiga e faapopoleina ai pulega faa-Komunisi.” E faapena foʻi aso nei. O talitonuga ma gaoioiga a Molimau a Ieova, na taʻua i le vaega faaiʻu o le lipoti, e lē o “lamatia ai le saogalemu pe faaalia ai le lē faaaloalo i so o se atunuu.”