PE E te iloaina le mafuaaga ua saei ai e lenei tamaloa lona ofu? Na fai atu i ai Ieova e fai. O ia o le perofeta a le Atua, o Akia. Pe e te iloa o le a le perofeta? O le tagata lea e taʻuina muamua i ai e le Atua mea o le a tutupu.

O loo tautala atu Akia i a Ierepoamo. O Ierepoamo sa tuuina e Solomona na te vaavaaia le galuega o le faia o ni fale. Ina ua fetaui Akia ma Ierepoamo i inei i le auala, ona faia lea e Akia se mea uiga ese. Na ia toeseina mai le ofu fou na ia ofuina ma saei i vaega e 12. Ua ia fai atu i a Ierepoamo: ‘Ia ave ma oe vaega e 10.’ Pe e te iloa ai se ā na tuuina atu ai e Akia vaega ofu e 10 mo Ierepoamo?

Na faamatala atu e Akia o le a aveeseina mai e Ieova le malo mai i a Solomona. Na ia faapea atu o le a tuuina atu e Ieova ituaiga e 10 i a Ierepoamo. O lona uiga e na o le lua ituaiga o le a totoe e pule ai le atalii o Solomona o Reopoamo.

Ina ua iloa e Solomona upu a Akia i a Ierepoamo, sa ita o ia. Na ia taumafai e fasioti i a Ierepoamo. Ae na sola Ierepoamo i Aikupito. Ina ua mavae sina taimi, ona oti ai lea o Solomona. Na tupu o ia mo le 40 tausaga, ma ua avea nei Reopoamo ma tupu. Ina ua faalogo Ierepoamo ua oti Solomona, ona ia toe foi mai lea i Isaraelu.

O Reopoamo e le o se tupu lelei. Ua sili atu lona saua i tagata na i lona tamā o Solomona. Na o atu Ierepoamo ma isi tamaloloa i a Reopoamo ma fai atu i ai e agalelei i tagata. Ae sa le faalogo Reopoamo. O le mea moni ua atili ai ona saua na i lo le taimi muamua. Ona tofia, lea e tagata Ierepoamo e fai ma tupu i luga o ituaiga e 10, ae o ituaiga e lua o Peniamina ma Iuta na latou taofia pea Reopoamo e fai ma tupu.

Na le manao Ierepoamo i ona tagata e o atu i Ierusalema e tapuai i le malumalu o Ieova. Ona ia fausia lea o ni tamai povi auro se lua ma faatapuai i ai ituaiga e sefulu o le malo. E lei umi a e tumu le laueleele i solitulafono ma le amioleaga.

Ua i ai foi ni faalavelave ile ituaiga e lua o le malo. E itiiti i le lima tausaga talu ona fai Reopoamo ma tupu, a e sii tau atu le tupu o Aikupito faasaga i Ierusalema. Na ia aveesea ni mea tāua se tele mai le malumalu o Ieova. Na o sina taimi puupuu na tumau ai le malumalu i lona tulaga e pei ona fausia ai.