LESONA 32
Ua Pule Nei le Malo o le Atua!
Na amata ona pule le Malo o le Atua i le lagi i le 1914. O le taimi foʻi lenā na amata mai ai aso e gata ai o pulega a tagata. E faapefea ona tatou iloa? Seʻi iloilo valoaga o le Tusi Paia, o mea o loo tutupu i le lalolagi, ma amioga a tagata talu mai le 1914.
1. O le ā na valoia e le Tusi Paia?
Na faailoa mai e le tusi o Tanielu, o le a amata ona pule le Malo o le Atua, pe a mavae atu “taimi e fitu.” (Tanielu 4:16, 17) I senituri mulimuli ane, na taʻua e Iesu na taimi, o “taimi atofaina o nuu ese.” Na ia faailoa mai foʻi e leʻi oo i le faaiʻuga o na taimi. (Luka 21:24) O le a tatou aʻoaʻoina mai i lenei lesona, na faaiʻuina taimi e fitu i le tausaga 1914.
2. O ā mea ua tutupu ma amioga a tagata ua vaaia talu mai le 1914?
Na fesili atu soo o Iesu iā te ia: “O le ā foʻi le faailoga o lou faatasi mai, ma le taufaaiʻuiʻuga o le faiga o mea a le lalolagi?” (Mataio 24:3) Na faailoa atu e Iesu iā i latou le tele o mea o le a tutupu, pe a amata ona pule o ia i le lagi o se Tupu o le Malo o le Atua. O nisi o nei mea e aofia ai taua, oge ma mafuiʻe. (Faitau le Mataio 24:7.) Na valoia mai foʻi e le Tusi Paia, o amioga a tagata i “aso e gata ai” o le a oo mai ai aso e “sili ona faigatā.” (2 Timoteo 3:1-5) O nei mea uma ua tutupu ma amioga a tagata, na amata ona vaaia talu mai le 1914.
3. Aiseā ua matuā leaga ai le tulaga o le lalolagi talu ona pule le Malo o le Atua?
E leʻi leva talu ona avea Iesu ma Tupu o le Malo o le Atua, ae ia tauina loa se taua i le lagi faasaga iā Satani ma ana temoni, ma faatoʻilaloina ai Satani. Ua taʻua i le Tusi Paia “ua lafo ifo o ia i le lalolagi, ua lafo ifo foʻi ana agelu faatasi ma ia.” (Faaaliga 12:9, 10, 12) Ua matuā lotoa Satani ona ua ia iloa o le a faaumatia o ia. O lea, ua ia faapogaia ai tigā ma mafatiaga i le lalolagi atoa. E lētioa la a matuā leaga le tulaga o le lalolagi! Ae o le a aveesea e le Malo o le Atua nei faafitauli uma.
SAʻILIʻILI ATILI
Iloilo pe faapefea ona tatou iloa na amata ona pule le Malo o le Atua i le 1914, ma pe faapefea ona tatou aafia ai.
4. Ua faailoa mai i le faasologa o taimi o le Tusi Paia, na amata pule le Malo o le Atua i le 1914
Na faapogaia e le Atua le miti a Nepukanesa le tupu o Papelonia, e faailoa mai ai mea o le a tutupu i le lumanaʻi. O le faamatalaina o lenā miti i le tusi o Tanielu, e iloa ai o loo faatatau atu i le pulega a Nepukanesa ma le Malo o le Atua.—Faitau le Tanielu 4:17. a
Faitau le Tanielu 4:20-26, ma faaaogā le siata e tali ai fesili nei:
-
(A) O le ā na vaaia e Nepukanesa i lana miti?—Tagaʻi i fuaiupu 20 ma le 21.
-
(E) O le ā na tupu i le laau?—Tagaʻi i le fuaiupu 23.
-
(I) O le ā na tupu i le iʻuga o “taimi e fitu”?—Tagaʻi i le fuaiupu 26.
Le Fesootaʻiga o le Miti a Nepukanesa i le Laau, ma le Malo o le Atua
VALOAGA (Tanielu 4:20-36)
Pulega
(A) Se laau telē
Taofia le pulega
(E) “Tātuu i lalo le laau,” seʻia ‘mavae taimi e fitu’
Toe faafoʻisia le pulega
(I) ‘E te toe maua lou malo’
I le faataunuuga muamua o lenei valoaga . . .
-
(O) O ai na faaata mai e le laau?—Tagaʻi i le fuaiupu 22.
-
(U) Na faapefea ona taofia lana pulega?—Faitau le Tanielu 4:29-33.
-
(F) O le ā na tupu iā Nepukanesa ina ua mavae “taimi e fitu”?—Faitau le Tanielu 4:34-36.
FAATAUNUUGA MUAMUA
Pulega
(O) Nepukanesa le tupu o Papelonia
Taofia le pulega
(U) Ina ua mavae le 606 T.L.M., na lē lelei le mafaufau o Nepukanesa ma lē mafai ai ona faaauau lana pulega mo le fitu tausaga
Toe faafoʻisia le pulega
(F) Na toe lelei le mafaufau o Nepukanesa ma toe faafoʻisia ai lana pulega
I le faataunuuga lona lua o le valoaga . . .
-
(G) O ai sa faaata mai e le laau?—Faitau le 1 Nofoaiga a Tupu 29:23.
-
(L) Na faapefea ona taofia le latou pulega? E faapefea ona tatou iloa na taofia pea lenā pulega a o iai Iesu i le lalolagi?—Faitau le Luka 21:24.
-
(M) O anafea ma o fea na toe faafoʻisia ai lenā pulega?
FAATAUNUUGA LONA LUA
Pulega
(G) Na faaata mai e tupu o Isaraelu le pulega a le Atua
Taofia le pulega
(L) Faatoʻilaloina Ierusalema ma taofia ai le faasologa o tupu o Isaraelu mo le 2,520 tausaga
Toe faafoʻisia le pulega
(M) Amata ona pule Iesu i le lagi o se Tupu o le Malo o le Atua
O le ā le umi o taimi e fitu?
E fesoasoani mai isi vaega o le Tusi Paia, e malamalama ai i isi vaega. Mo se faataʻitaʻiga ua taʻua i le Tusi o Faaaliga, o le tolu ma le afa taimi e tutusa ma le 1,260 aso. (Faaaliga 12:6, 14) O lona uiga, pe a faaluaina lenā numera, o le a maua ai taimi e fitu po o le 2,520 aso. E faasino atu e le Tusi Paia i nisi taimi le aso i le tausaga. (Esekielu 4:6) E faapena le valoaga lenei i le tusi o Tanielu. O loo faasino atu taimi e fitu i le 2,520 tausaga.
5. Ua suia le lalolagi talu mai le 1914
Na valoia e Iesu mea o le a tutupu i le lalolagi, pe a avea o ia ma Tupu. Faitau le Luka 21:9-11, ona talanoa lea i le fesili lenei:
-
O fea o nei mea o loo e vaai ma faalogo i ai?
Na faamatala mai e le aposetolo o Paulo uiga faaalia o tagata i aso e gata ai. Faitau le 2 Timoteo 3:1-5, ona talanoa lea i le fesili lenei:
-
O fea o nei uiga o loo faaalia e tagata i aso nei?
6. Talu ai ua pule le Malo o le Atua, o le ā e tatau ona tatou faia?
Faitau le Mataio 24:3, 14, ona talanoa lea i fesili nei:
-
O le ā le galuega e sili ona tāua e iloa ai ua pule le Malo o le Atua?
-
E faapefea ona faia sou sao i lenei galuega?
Ua pule nei le Malo o le Atua, ma ua lata mai le taimi e na te pulea ai le lalolagi atoa. Faitau le Eperu 10:24, 25, ona talanoa lea i le fesili lenei:
-
O le ā e tatau iā i tatou taʻitoʻatasi ona faia, a o “iloa ua matuā latalata mai lava le aso”?
Pe a e iloa se mea e mafai ona fesoasoani ai i isi ma faasaoina ai o latou ola, o le ā e uunaʻia oe e faia?
E ONO FESILI MAI SE TASI: “Aiseā e manatu ai Molimau a Ieova o le 1914 o se tausaga e sili ona tāua?”
-
O le ā lau tali?
AOTELEGA
O valoaga o le Tusi Paia, o le faasologa o taimi na tutupu ai na valoaga, ma mea o tutupu i le lalolagi, ua faamaonia ai ua pule nei le Malo o le Atua. E faaalia lo tatou talitonu i nei mea, e ala i le talaʻi atu ma auai i sauniga a le faapotopotoga.
Fesili Autalu
-
O le ā na tupu ina ua faaiʻuina taimi e fitu lea na valoia mai i le tusi o Tanielu?
-
Aiseā e te mautinoa ai na amata ona pule le Malo o le Atua i le 1914?
-
E faapefea ona faailoa atu ua e talitonu ua pule nei le Malo?
MANATU FAAOPOOPO
Iloilo faamatalaga a tusitala o le talafaasolopito ma isi, e faatatau i suiga o le lalolagi talu mai le 1914.
“Le Vaitaimi na Amata ai Ona Paʻū Maulalo Tapulaa Tau Amio” (Mataupu o le Ala Mai!)
Iloilo pe na faapefea ona suia le olaga o se tamāloa, i le valoaga o loo i le Mataio 24:14.
E faapefea ona tatou iloa o le valoaga o loo faamauina i le Tanielu mataupu e 4, e faatatau atu i le Malo o le Atua?
“O Anafea na Amata Pule ai le Malo o le Atua? (Vaega 1)” (Le Olomatamata, Oketopa 1, 2014)
E faapefea ona tatou iloa na faaiʻuina i le 1914, taimi e fitu ia e taʻua i le Tanielu mataupu e 4?
“O Anafea na Amata Pule ai le Malo o le Atua? (Vaega 2)” (Le Olomatamata, Novema 1, 2014)
a Tagaʻi i mataupu mulimuli e lua o le vaega Manatu Faaopoopo o lenei lesona.
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
