A o faaauau pea ona aʻoaʻo atu Iesu i Iutaia, ua ia faauaʻi atu nei lana ʻaufaalogologo i se mea e faigofie ona faaāta i o latou mafaufau, o mamoe ma lotoā o mamoe. Peitaʻi, o loo ia tautala atu i se auala faafaatusa. Atonu o loo manatua e tagata Iutaia upu a Tavita: “O Ieova o loʻu Leoleo Mamoe o ia. E leai se mea ou te mativa ai. E na te ave aʻu i laufanua lauolaola ou te taoto ai.” (Salamo 23:1, 2) I se isi salamo, na ʻaiʻoi atu ai foʻi Tavita i le nuu e faapea: “Ia tatou tootutuli atu i luma o Ieova o Lē na faia i tatou. Auā o lo tatou Atua o ia, o i tatou foʻi o le nuu na ia fafagaina.” (Salamo 95:​6, 7) Ioe, ua leva ona faatusaina tagata Isaraelu o loo ola i lalo o le Tulafono i se lafu mamoe.

Ua iai nei “mamoe” i “le lotoā o mamoe,” auā na fananau mai i latou o ni ē o loo i lalo o le feagaiga o le Tulafono a Mose. Sa avea le Tulafono e pei o se papuipui, lea e vavaeesea ai i latou mai i aafiaga leaga mai i tagata e lē o ola i lalo o le Tulafono. Peitaʻi, e iai lava tagata Isaraelu sa faileagaina le lafu mamoe a le Atua. Ua fetalai atu Iesu: “E moni, e moni, ou te fai atu iā te outou, O lē e lē ui mai i le faitotoʻa o le lotoā o mamoe, ae ui mai i se isi mea, o se tagata gaoi lea ma faomea. A o lē e ui mai i le faitotoʻa, o ia lea o le leoleo o le lafu mamoe.”—Ioane 10:1, 2.

Atonu o loo mafaufau tagata Isaraelu i ē ua faapea mai o i latou o le Mesia, po o le Keriso. O nei tagata ua pei o tagata gāoi ma faomea, ma e lē tatau ona mulimuli i na tagata taufaasesē. Nai lo o lea, e tatau ona latou mulimuli i “le leoleo o le lafu mamoe” e pei ona fetalai ai Iesu e faapea:

“E tatala atu le faitotoʻa iā te ia e le leoleo faitotoʻa, ma e faalogo foʻi mamoe i lona leo, e na te valaau i igoa o ana mamoe ma taʻitaʻi ese atu. Pe a ō mai uma i fafo ana mamoe, ona muamua atu lea o ia, ae mulimuli atu mamoe iā te ia, auā e iloa e mamoe lona leo. E lē mulimuli atu mamoe i se tagata ese, ae sosola ese mai iā te ia, auā e lē iloa e mamoe leo o tagata ese.”—Ioane 10:3-5.

Ua pei Ioane le Papatiso o se leoleo faitotoʻa. Sa ia faailoa atu e tatau ona mulimuli atu nei mamoe faafaatusa, o loo i lalo o le Tulafono iā Iesu. E iai nisi ua pei o ni mamoe i Kalilaia ma Iutaia e iloa le leo o Iesu. O fea o le a “taʻitaʻi” i ai e Iesu nei mamoe? O le ā le iʻuga e oo iai pe afai e mulimuli nei mamoe iā Iesu? Atonu o loo taumānatu faapena nisi o loo faalogologo i lenei talafaatusa, auā ʻe latou te lē iloa le uiga o mea ua ia fetalai atu ai iā i latou.’—Ioane 10:6.

Ua fetalai atu Iesu: “E moni, e moni, ou te fai atu iā te outou, O aʻu o le faitotoʻa o mamoe. O i latou uma ua ō mai ma faaaogā sesē loʻu igoa, o i latou ia o ē e gāoi ma faomea; ae e lē faalogo mamoe iā i latou. O aʻu o le faitotoʻa; o sē e ui mai iā te aʻu, e faaolaina o ia, ma e ulu atu o ia i totonu, ma toe ulufafo, ma maua le vao lelei e ʻai ai.”—Ioane 10:7-9.

E manino mai o loo faailoa atu e Iesu se faatulagaga fou. Ua iloa e lana ʻaufaalogologo e lē o ia o le faitotoʻa i le feagaiga o le Tulafono, lea ua leva ona iai mo le tele o senituri. O lea la, o loo uiga atu lana fetalaiga e faapea, e ō atu mamoe o le a ia “taʻitaʻi ese atu” i se isi lotoā o mamoe. O le ā le iʻuga?

Ua faamatala atili e Iesu lana matafaioi: “Ua ou sau ina ia latou maua le ola, ma saga maua atili ai. O aʻu o le leoleo mamoe lelei; e foaʻi atu e le leoleo mamoe lelei lona ola mo mamoe.” (Ioane 10:10, 11) Sa faamāfanafanaina e Iesu ona soo i se taimi ua mavae e ala i le fetalai atu: “Aua le fefefe le lafu mamoe itiiti e, auā ua finagalo malie lo outou Tamā e tuuina atu le malo iā te outou.” (Luka 12:32) O le mea moni, o i latou o ē e faia aʻe ai le “lafu mamoe itiiti” o i latou ia o le a taʻitaʻiina atu e Iesu i se isi lotoā fou o mamoe, ina ia latou “maua le ola, ma saga maua atili ai.” Maʻeu se faamanuiaga o le avea ma se vaega o lenā lafu!

Peitaʻi, e leʻi māeʻa ai i inā le talanoaina o lea mataupu. Ua toe fetalai atu Iesu: “Ua iā te aʻu isi mamoe, o ē e lē o i lenei lotoā; e tatau foʻi ona ou aumaia i latou, ma latou te faalogo i loʻu leo, ona avea ai lea o i latou ma lafu e tasi, ma le leoleo mamoe e toʻatasi.” (Ioane 10:16) Talu ai ʻe lē o iai i lenei lotoā isi mamoe,’ e tatau la ona iai i latou i se isi lotoā e ese mai i le lotoā o loo iai le “lafu mamoe itiiti,” lea e fai mo latou tofi le Malo. O nei lotoā e lua e eseese o la tofi. Peitaʻi, e maua uma lava e mamoe o loo iai i nei lotoā e lua aogā mai i le matafaioi a Iesu. Ua fetalai atu Iesu: “O le mea lea e alofa ai le Tamā iā te aʻu, auā ou te foaʻiina atu loʻu ola.”—Ioane 10:17.

Ua tali mai nisi o le motu o tagata: “Ua iā te ia se temoni ma ua valea.” Peitaʻi ua faalogologo atu ma le naunau nisi, ma ua lotomalilie e mulimuli atu i le Leoleo Mamoe Lelei. Ua latou faapea atu: “E lē o ni upu nei a se tagata ua iai se temoni. E lē mafai e se temoni ona faapupula mata o se tagata ua tauaso, a ea?” (Ioane 10:20, 21) O loo latou faasino atu i le tamāloa sa fanau mai e tauaso, lea sa faamālōlōina e Iesu.