Ua alu atu Iesu i Ierusalema mo le Tausamiga o le Faapaiaga (po o le Hanuka). E faamanatuina i lenei tausamiga le toe faapaiaga o le malumalu. I le silia ma le selau tausaga ua mavae, sa fausia ai e le tupu o Suria o Atioko IV (Epiphanes), se fata faitaulaga i luga aʻe o le fata faitaulaga sili i le malumalu o le Atua. Mulimuli ane, na toe pulea Ierusalema e atalii o se ositaulaga Iutaia ma toe faapaia le malumalu iā Ieova. Talu mai lenā taimi, e faia i tausaga uma se tausamiga i le masina o Kiselu 25, lea e fetaui lelei ma le faaiʻuga o Novema ma le amataga o Tesema.

Ua oo nei i le vaitau mālūlū, ma o loo savali Iesu i le malumalu i le faapaologa o Solomona. Ua siʻomia o ia e tagata Iutaia ma fesili atu iā te ia: “O afea ea e te taʻu mai ai iā i matou? Afai o oe o le Keriso, ia taʻu saʻo mai.” (Ioane 10:22-24) O le ā nei le auala o le a tali atu ai Iesu? Ua ia fetalai atu iā i latou: “Ua ou taʻu atu iā te outou, ae tou te lē talitonu.” E leʻi taʻu saʻo atu e Iesu e faapea o ia o le Keriso, e pei ona ia faamatalaina atu i le fafine Samaria i le vaieli. (Ioane 4:25, 26) Peitaʻi ua ia faailoa atu o ia, e ala i le faapea atu: “A o leʻi iai Aperaamo, a ua leva ona ou iai.”—Ioane 8:58.

E finagalo Iesu ina ia faamaonia e le tagata lava ia o Ia o le Keriso, e ala i le faatusatusa o ana galuega ma mea sa valoia o le a faia e le Keriso. O le māfuaaga lea e fetalai atu ai o ia i ona soo i nisi taimi, e aua le taʻuina atu i se isi o ia o le Mesia. Peitaʻi o lea ua ia fetalai tuusaʻo atu i nei tagata Iutaia tetee: “O galuega ia ou te faia i le suafa o loʻu Tamā, ua molimau iā te aʻu. Peitaʻi, tou te lē talitonu lava.”—Ioane 10:25, 26.

Aiseā e latou te lē talitonu ai o Iesu o le Keriso? Ua fetalai atu Iesu: “Tou te lē talitonu lava, auā e lē o outou o ni aʻu mamoe. E faalogo aʻu mamoe i loʻu leo, ua latou iloa aʻu, ma ua latou mulimuli mai iā te aʻu. Ua ou foaʻi atu foʻi iā i latou le ola e faavavau, ma o le a lē faaumatia lava se tasi o i latou, ma e leai se tasi e faoa i latou mai i loʻu lima. O i latou ua foaʻi mai e loʻu Tamā iā te aʻu, e sili atu ona tāua nai lo o isi mea uma.” Ona faailoa atu lea e Iesu iā i latou le māfana o le la faiā ma lona Tamā e faapea: “E tasi i maʻua ma le Tamā.” (Ioane 10:26-30) O loo iai Iesu i le lalolagi, ae o loo afio i le lagi lona Tamā. E manino mai la, e lē o uiga atu le fetalaiga a Iesu e faapea, o i laʻua ma lona Tamā o le tino e tasi. Peitaʻi, e tasi i laʻua i fuafuaga, o lea e autasi i laʻua.

O upu nei a Iesu ua matuā feita ai tagata Iutaia, ma ua latou toe fetagofi ai i maa e fetogi iā te ia. Peitaʻi e lē o fefe ai Iesu i lea gaoioiga. Ua fetalai atu o ia iā i latou: “Na ou faaalia le tele o galuega lelei mai i loʻu Tamā iā te outou. O lē fea la o na galuega e tou te fetogia ai aʻu?” Ua latou tali mai: ʻE lē o ni galuega lelei e matou te fetogia ai oe, a o le upuleaga, auā ua e faia oe ma atua.’ (Ioane 10:31-33) E leʻi iai lava se taimi na faapea atu ai Iesu o ia o se atua. Ae aiseā la ua latou faia ai nei tuuaʻiga?

Ua faapea atu Iesu e iai lona mana, lea e talitonu tagata Iutaia e na o le Atua lava e tatau ona iai. O se faaaʻoaʻoga, na ia fetalai e faatatau i “mamoe” e faapea “ua ou foaʻi atu foʻi iā i latou le ola e faavavau,” o se mea e lē mafai e se tagata ona faia. (Ioane 10:28) E lē o amanaʻia e tagata Iutaia le taʻutinoga a Iesu e faapea, ua ia maua le pule mai i lona Tamā.

Ina ia faamaonia le sesē o a latou tuuaʻiga, ua fesili atu Iesu: “Pe e lē o tusia ea i la outou Tulafono [i le Salamo 82:6], ʻUa ou fai atu: “O atua outou”’? Afai ua ia taʻua o ʻatua’ i latou o ē ua oo atu i ai le afioga a le Atua, . . . pe tou te fai mai la iā te aʻu o lē ua faapaiaina ma auina mai e le Tamā i le lalolagi, ʻUa e upuleaga i le Atua,’ auā ua ou fai atu, o aʻu o le Atalii o le Atua?”—Ioane 10:34-36.

Ioe, o loo faamatalaina i Tusitusiga Paia faamasino lē tonu faaletagata o ni “atua.” E faapefea la i nei tagata Iutaia ona tuuaʻia Iesu i lona fetalai atu “o aʻu o le Atalii o le Atua”? Ua ia faauaʻi atu i latou i se manatu e mafai ona faatalitonuina ai: “Afai ou te lē o faia galuega a loʻu Tamā, aua tou te talitonu mai iā te aʻu. Ae afai o oʻu faia ia galuega, e tusa lava pe tou te lē talitonu iā te aʻu, ae ia outou talitonu i galuega, ina ia outou iloa, ma iloa ai pea, e autasi le Tamā ma aʻu, o aʻu foʻi e autasi ma le Tamā.”—Ioane 10:37, 38.

O lea, ua taumafai ai tagata Iutaia e puʻe iā te ia, peitaʻi ua maliu ese Iesu mai i lea nofoaga. Ua ia tuua Ierusalema ma malaga atu i le isi itu o le vaitafe o Ioritana, i le vaipanoa lea sa faia muamua ai e Ioane le papatisoga i le toetoe fā tausaga ua mavae. E foliga mai e lē mamao lenei nofoaga mai i le itu i saute o le sami o Kalilaia.

Ua ō ane le toʻatele o tagata iā Iesu ma faapea atu: “E leʻi faia e Ioane se faailoga e tasi, ae e moni uma lava le tele o mea na fai mai ai Ioane e uiga i lenei tagata.” (Ioane 10:41) O lea, ua faatuatua ai le toʻatele o tagata Iutaia iā Iesu.