Ua māeʻa nei le talisuaga o le faamanatuga, ma o loo iai pea Iesu ma ona aposetolo i le potu i luga. Ua ia faalaeiau atu iā i latou: “Aua neʻi atuatuvale o outou loto. Ia faatuatua i le Atua, ma ia faatuatua mai foʻi iā te aʻu.”—Ioane 13:36; 14:1.

Ua faamatala atu e Iesu le māfuaaga e lē tatau ai i ona aposetolo faamaoni, ona atuatuvale i lona tuua o i latou: ʻE tele mea e nonofo ai i le maota o loʻu Tamā. Afai ou te alu ma sauni se nofoaga mo outou, ou te toe sau ona ou talia lea o outou, ina ia iai foʻi outou i le mea ou te iai.’ Peitaʻi, e lē o malamalama le ʻauaposetolo o loo faasino atu Iesu i lona toe afio i le lagi. Ua fesili atu Toma: “Le Alii e, matou te lē iloa le mea e te maliu atu i ai. E faapefea ona matou iloa le ala?”—Ioane 14:2-5.

Ua tali mai Iesu: “O aʻu o le ala, o le upu moni ma le ola.” Seʻi vaganā ua talia e se tasi Iesu, o ana aʻoaʻoga, ma faaaʻoaʻo i le auala sa soifua ai o ia a o iai i le lalolagi, ona faatoʻā mafai lea ona ia ulu atu i le ʻmaota o lona Tamā’ i le lagi. Ua fetalai atu Iesu: “E leai se tasi e alu atu i le Tamā pe a lē ui mai iā te aʻu.”—Ioane 14:6.

A o faalogologo atu ma le naunautaʻi Filipo, ua ia talosaga atu: “Le Alii e, ia e faailoa mai iā i matou le Tamā, ma ua lava lenā mo i matou.” E foliga mai o loo manaʻo Filipo i se faailoga mai i le Atua, e pei o faaaliga na vaaia e Mose, Elia, ma Isaia. Ae e iai se mea e sili atu o loo iai i le ʻauaposetolo i lenā taimi, nai lo o na faaaliga. Ua faamamafa e Iesu lenā vala ina ua ia faapea atu: “Filipo e, ua leva ona ou faatasi ma outou, ae e te leʻi iloa lava aʻu? O lē ua vaai mai iā te aʻu, ua vaai foʻi o ia i le Tamā.” Ua faaatagia atoatoa atu e Iesu uiga o lona Tamā. O lea, o lo latou faifaimea faatasi ma mātau gaoioiga a Iesu, ua pei ai lava ua latou vāai i le Tamā. Peitaʻi o le mea moni, e sili atu le Tamā i lo le Atalii, auā ua fetalai Iesu: “O mea ua ou fai atu ai iā te outou, ou te leʻi tautala atu i ni oʻu lava manatu.” (Ioane 14:8-10) Ua iloa e le ʻauaposetolo o loo avatu e Iesu le viiga uma i lona Tamā, ona o mea o loo ia aʻoaʻo atu.

Ua vāai aposetolo o faia e Iesu galuega mamana, ma faalogo iā te ia a o ia folafolaina atu le tala lelei e uiga i le Malo o le Atua. Ua fetalai atu nei Iesu: “O lē e faatuatua mai iā te aʻu; e na te faia galuega na ou faia, ma na te faia foʻi galuega e sili atu.” (Ioane 14:12) E lē o faapea atu Iesu o le a latou faia ni vavega e sili atu i vavega na ia faia. Nai lo o lea, o le a umi atu le taimi e latou te faia ai le faiva, e tele atu oganuu o le a latou talaʻia, ma o le a toʻatele atu foʻi tagata o le a oo i ai le talaʻiga.

O le afio o Iesu i le lagi e lē faapea ai ua ia tuulafoaʻia i latou, auā ua ia folafola atu: “Afai tou te talosaga atu i se mea i loʻu igoa, ou te faia lava.” Ua ia toe fetalai atu foʻi: “Ou te talosaga atu i le Tamā e foaʻi mai iā te outou se isi fesoasoani, ina ia iā te outou e faavavau. O le agaga lea o le upu moni.” (Ioane 14:14, 16, 17) Ua ia faamautinoa atu o le a latou maua le agaga paia, o le isi fesoasoani lea. O le mea lenā o le a tupu i le aso o le Penetekoso.

Ua fetalai atu Iesu: “E toeitiiti ona lē toe vāai mai lea o le lalolagi iā te aʻu, ae tou te vāai mai iā te aʻu, auā ou te ola aʻu ma e ola ai foʻi outou.” (Ioane 14:19) Ioe, pe a toe faatūina mai Iesu, o le a ia faaali atu i ona aposetolo i se tino faaletino. Ae mulimuli ane, o le a ia toe faatutūina i latou ina ia faatasi ma ia i le lagi i ni tino agaga.

Ua faamatala atu nei e Iesu se upu moni manino: “O lē ua iai aʻu poloaʻiga ma tausi i ai, o ia lea e alofa mai iā te aʻu. O lē e alofa mai iā te aʻu, e alofa foʻi loʻu Tamā iā te ia. Ou te alofa iā te ia ma ou te faailoa manino atu foʻi aʻu iā te ia.” Ua fesili atu le aposetolo o Iuta o lē ua igoa foʻi iā Tataio: “Le Alii e, o le ā le mea ua tupu ua e finagalo e faailoa manino mai ai oe iā i matou ae lē i le lalolagi?” Ua tali mai Iesu: ʻAfai e alofa mai se tasi iā te aʻu, e tausia e ia aʻu upu, ma e alofa foʻi loʻu Tamā iā te ia. O lē e lē alofa iā te aʻu, e lē tausia e ia aʻu upu.’ (Ioane 14:21-24) I le lē pei o soo o Iesu, e lē o amanaʻia e le lalolagi Iesu o ia o le ala, le upu moni ma le ola.

O lea o le a tuua e Iesu ona soo. E faapefea la ona latou manatua mea uma na ia aʻoaʻoina atu? Ua fetalai atu Iesu: “O le fesoasoani, o le agaga paia lea e auina mai e le Tamā i loʻu igoa, e aʻoaʻo iā te outou i mea uma, ma faamanatu atu i o outou mafaufau mea uma na ou taʻu atu.” O lenei faamautinoaga ua faamāfanafanaina ai le ʻauaposetolo, auā na latou vāai i auala mamana na galue ai le agaga paia. Ua toe fetalai atu Iesu: ʻOu te tuuina atu le filemu iā te outou, ma ou te avatu iā te outou loʻu filemu. Aua neʻi atuatuvale o outou loto pe faavaivai ona o le matataʻu.’ (Ioane 14:26, 27) E leai la se māfuaaga e atuatuvale ai soo o Iesu, auā o le a latou maua le taʻitaʻiga ma le puipuiga a lona Tamā.

E lē o toe umi ona vaaia lea o le faamaoniga o le puipuiga a le Atua. Ua fetalai atu Iesu: “O loo sau le pule o le lalolagi, ae e leai sana pule iā te aʻu.” (Ioane 14:30) Sa mafai ona ulu le Tiapolo iā Iuta ma pulea o ia. Ae e leai se vaivaiga o Iesu e mafai ona faaaogā e Satani, ina ia liliuese ai o ia mai i le Atua. E lē mafai foʻi e le Tiapolo ona taofia le toe faatūina mai o Iesu. Aiseā? Ua fetalai atu Iesu: “Ua tuuina mai e le Tamā iā te aʻu poloaʻiga ina ia ou faia, o lea ua ou faia ai.” Ua mautinoa e Iesu o le a toe faatūina o ia e lona Tamā.—Ioane 14:31.