Ua oo nei i le taimi e sauni ai Iosefa ma lona aiga, faapea a latou uō ma tauaiga e faimalaga atu i Ierusalema, e pei ona masani ai i tausaga taʻitasi. E latou te ō atu i inā e faamanatu ai le Paseka, e pei ona faatonuina i le Tulafono. (Teuteronome 16:16) Pe tusa ma le 75 maila (120 km) le mamao e faimalaga ifo ai mai Nasareta e agaʻi i Ierusalema. O se vaitaimi pisi ma fiafia lea mo tagata uma. Ua 12 nei tausaga o Iesu, ma ua ia tulimataʻia lenei faatasiga faapea le avanoa e toe asiasi atu ai i le malumalu.

E manatu Iesu ma lona aiga, e lē na o le tasi le aso e faia ai le Paseka. Pe a māeʻa le Paseka, o le aso e sosoo ai e amata ai aso e fitu o le Tausamiga o Falaoa e Lē Faafefeteina. (Mareko 14:1) E manatu i lenā Tausamiga, o se vaega e aofia i totonu o le vaitaimi o le Paseka. O lea, pe tusa ma le lua vaiaso e faaalu i le malaga mai i Nasareta, nonofo ai i Ierusalema, ma toe foʻi ai i o latou aiga. Peitaʻi, o lenei tausaga ua umi teisi la latou malaga, ona o se mea ua tupu iā Iesu, lea faatoʻā iloa a o toe foʻi atu i Nasareta.

A o alu la latou faigāmalaga i le itu i mātū, ua manatu Iosefa ma Maria o loo iai Iesu faatasi ma o latou tauaiga ma uō. Ae ina ua latou mālōlō i le pō, ua la iloa ai e lē o iai o ia i inā. Ua la ō atu ma saʻili i le ʻaumalaga, peitaʻi e leʻi maua o ia. Ua matuā lē iloa lava po o fea o iai le la tama. O lea, ua toe foʻi ai loa Iosefa ma Maria i Ierusalema e saʻili Iesu.

Ua alu le aso o la saʻilia le la tama, ae e leʻi maua lava o ia, ma e faapena foʻi i le aso lona lua. Peitaʻi, i le aso lona tolu ua la maua ai o ia i le malumalu, o loo nonofo faatasi ma nisi o aʻoaʻo Iutaia. O loo ia faalogologo ma tuufesili atu iā i latou, ma ua matuā ofo i latou uma i lona malamalama.

Ua faapea atu Maria: “Laʻu tama e, o le ā le mea ua e faapea mai ai iā i maʻua? Ua ma fiu ma lou tamā e suʻe oe.”—Luka 2:48.

Ua maofa Iesu i lo la lē iloa o le mea e maua ai o ia, ma ua ia faapea atu: “Aiseā na lua suʻeina ai aʻu? Pe lua te lē iloa ea e tatau ona ou iai i le fale o loʻu Tamā?”—Luka 2:49.

Ua toe foʻi atu nei Iesu ma ona mātua i Nasareta, ma ua faaauau pea ona ia gauaʻi atu iā i laʻua. Ua faasolosolo ona tuputupu aʻe lona atamai ma lona tino. E ui i lona talavou, ae ua alofagia o ia e le Atua faapea ma tagata. O le mea moni, talu mai lava lona tamaitiiti, ua faataatia e Iesu se faaaʻoaʻoga lelei o le naunau i mataupu faaleagaga, faapea le faaalia o le faaaloalo i ona mātua.