Na talanoa le aposetolo o Paulo e faatatau i faamasinoga i le va o uso talitonu, e pei ona tusia i le 1 Korinito 6:1-8. Na faateʻia o ia i nisi o Kerisiano i Korinito o ē ʻna mafai ona ō atu i luma o faamasino e lē amiotonu.’ (Fuaiupu 1) Na taʻua e Paulo ni māfuaaga lelei e lē tatau ai i Kerisiano ona molia e le tasi le isi i faamasinoga a le lalolagi, ae ia faaaogā faatulagaga a le faapotopotoga e foʻia ai finauga. Seʻi o tatou tilofaʻia nisi o māfuaaga na aumai ai lenei fautuaga mai le Atua, ma talanoaina nisi o tulaga e lē o aofia ai i lenei faatonuga.

Afai e iai se mataupu faapisinisi o loo tatou finau ai ma se uso talitonu, e muamua lava ona tatou taumafai e taulima le mataupu i le auala a Ieova, ae e lē o la tatou auala. (Faataoto 14:12) E pei ona faaalia e Iesu, e sili atu ona lelei le vave foʻia o se feeseeseaʻiga a o leʻi oo ina matuiā le mataupu. (Mataio 5:23-26) O le mea e faanoanoa ai, ua finauvale nisi o Kerisiano ma faaoo atu ai a latou finauga i faamasinoga a le lalolagi. Ae na faapea mai Paulo: “Ua outou toʻilalo ona ua molia e le tasi le isi i le tulafono.” Aiseā? O se tasi o māfuaaga autū, ona o faamasinoga faapena e ono taʻuvalea ai le faapotopotoga ma le Atua o loo tatou tapuaʻi ai. O lea la, e tatou te utagia le fesili a Paulo: “Aiseā e tou te lē onosaʻi ai pe a agaleagaina outou?”​—Fuaiupu 7.

Na taʻua foʻi e Paulo, ua tuuina mai e le Atua se faatulagaga lelei i le faapotopotoga e foʻia ai le tele o finauga. O toeaina, o ni tane Kerisiano ua atamamai ona ua popoto i upu moni o le Tusi Paia, ma na faapea mai Paulo e “mafai ona [latou] faamasino i . . . uso” i “mataupu o lenei olaga.” (Fuaiupu 3-5) Na faaalia e Iesu o finauga e aofia ai ni mea sesē matuiā e pei o le faitala taufaaleaga ma faiga faagaoi, e tolu laasaga e foʻia ai: muamua, ia taumafai e foʻia le faafitauli tau lava o ē e toʻalua o loo aafia ai; lona lua, afai e lē taulau le uluaʻi laasaga, ona aumai lea o se molimau e toʻatasi pe toʻalua; lona tolu, afai e lē taulau le laasaga lona lua, ona avatu lea o le mataupu i  le faapotopotoga, lea e avea toeaina ma ona sui.​—Mataio 18:15-17.

O le mea moni, e lē tau avea le ʻautoeaina Kerisiano ma lōia po o ni tagata faipisinisi, ma e lē o sa latou matafaioi lenā. E latou te lē faia ni tuutuuga e foʻia ai ni finauga faapisinisi i le va o uso. Nai lo lea, e latou te saʻili e fesoasoani i ē uma o loo aafia ai ina ia faatatau fautuaga a le Tusi Paia, ma ia malilie uma i se vaifofō toʻafilemu. Afai o ni mataupu faigatā, e mafai ona latou soālaupule le mataupu ma le ovasia matagaluega, po o le ofisa o le lālā o Molimau a Ieova. Ae e iai tulaga e lē o aofia ai i le fautuaga a Paulo. O ā nisi o na tulaga?

E manaʻomia ona faia se faamasinoga i nisi taimi, ona o se faatulagaga masani pe ona e manaʻomia e le tulafono, ina ia maua ai ni iʻuga filemu ma lelei mo ē ua aofia ai. O se faaaʻoaʻoga, atonu o le faia o se faamasinoga, e pau lenā o le auala e maua ai se poloaʻiga faaletulafono e tatala ai se faaipoipoga, e maua ai le aiā tatau e tausi ai tamaiti, e fuafua ai le tupe e totogi i le paaga pe a teteʻa, e maua ai tupe o le inisiua, e tusia ai le igoa i ē e tatau ona totogi i ai tupe pe a gau se pisinisi, pe e faamaonia ai foʻi le moni o se mavaega. E ono iai foʻi se tulaga e tulaʻi mai, ua manatu ai se uso e tatau ona faia sana lava tagi i luma o le faamasinoga e puipuia ai o ia pe a aafia i se moliaga. *

Afai e tuuina atu se mataupu faapena e taulima e le faamasinoga e aunoa ma se agaga finau o ē o loo aafia ai, atonu e lē solia ai le agaga o le fautuaga a Paulo. * E ui i lea, o le mea e sili ona tāua i se Kerisiano, o le faapaiaina lea o le suafa o Ieova ma le filemu ma le autasi o le faapotopotoga. O le vala autū e mātaulia ai soo o Keriso, o lo latou alofa ma o “le alofa . . . e lē saʻili mo lona lava lelei.”​—1 Korinito 13:4, 5; Ioane 13:34, 35.