Tanielu 4:1-37
4 “O le feʻau lenei mai i le tupu o Nepukanesa, i nuu uma, o atunuu, ma gagana o loo nonofo i le lalolagi uma: Ia faateleina pea lo outou filemu!
2 Ou te fiafia e faailoa atu faailoga ma mea ofoofogia na faia e le Atua Silisili Ese iā te aʻu.
3 Maʻeu le matagofie o ana faailoga ma le mamana o ana galuega ofoofogia! O lona malo o le malo e faavavau, ma o lana pule e oo i lea tupulaga ma lea tupulaga.+
4 “O aʻu o Nepukanesa, sa ou nofo lelei i loʻu fale ma sa ou manuia foʻi i loʻu maota.
5 Na ou iloa se miti, ma na ou fefe ai. A o oʻu taoto i loʻu moega, na ou fefe i ata ma faaaliga i loʻu mafaufau.+
6 Ona ou avatu lea o se faatonuga ina ia aami mai i oʻu luma o tagata atamamai uma o Papelonia, ina ia latou faamatala mai iā te aʻu le uiga o le miti.+
7 “Ona ō mai ai lea o ositaulaga e faia faiga faaagaga, o ē e valaau i ē ua oti, o le ʻau Kaletaia,* ma ē e saʻiliʻili i fetu.+ Ina ua ou faailoa atu iā i latou le miti, e leʻi mafai ona latou faamatalaina mai iā te aʻu le uiga.+
8 Mulimuli ane, ona sau ai lea o Tanielu i oʻu luma, o lē ua faaigoa iā Peletisara+ e tusa ai ma le igoa o loʻu atua,+ o lē foʻi o loo iai le agaga o atua paia,+ ma na ou faailoa atu iā te ia le miti:
9 “‘Peletisara e, o le pule o ositaulaga e faia faiga faaagaga,+ ua ou iloa lelei ua iā te oe le agaga o atua paia,+ ma e leai se mea lilo e faigatā iā te oe.+ O lea, ia e faamatala mai faaaliga na ou vaai ai i laʻu miti ma lona uiga.
10 “‘O faaaliga na ou iloa i loʻu moega, na ou vaaia ai se laau+ i le ogatotonu o le lalolagi, ma e matuā maualuga lava.+
11 Ua tupu tele ma malosi le laau, ma ua oo lona tumutumu i luga o le lagi, ma ua iloa mai foʻi i le tuluʻiga o le lalolagi.
12 Ua mananaia ona lau, ua anoanoaʻi ona fua, ma ua lava ma totoe meaʻai mo foafoaga uma. E ō mai i ai manu o le fanua i lona paolo, e ofaga mai i ai manulele o le lagi i ona lālā, ma e aai uma ai foafoaga uma.
13 “‘A o oʻu vaai i faaaliga i loʻu mafaufau i luga o loʻu moega, na ou vaaia se leoleo, o sē e paia, ua sau mai i le lagi.+
14 Ua ia alaga mai ma le leotele: “Ia tātuu i lalo le laau,+ ia tipi ese ona lālā, ia lūlū ese ona lau, ma faasalalau solo ona fua! Ia sosola manu o le fanua mai i ona lalo, ma manulele mai i ona lālā.
15 Ae ia tuu pea le pogati ma ona aa* i le eleele, ia fusi i se fusi uʻamea ma le ʻapamemea, i le mutia o le fanua. Ia faasūsūina i le sau o le lagi, ma ia iai pea ma manu o le fanua i vao o le lalolagi.+
16 Ia liua lona loto mai i le loto o le tagata i le loto o se manu, ma ia tuu ai pea seʻia mavae atu taimi e fitu.+
17 O le poloaʻiga lenei a le ʻauleoleo,+ ma le talosaga a le ʻaupaia, ina ia iloa ai e tagata soifua o le Silisili Ese o ia o le Pule i malo o tagata,+ ma e na te avatu le pulega i lē ua ia finagalo i ai, e na te tofia foʻi e pule i ai e oo lava i tagata ua sili ona faatauvaa.”
18 “‘O aʻu o Nepukanesa le tupu, o le miti lenei na ou vaaia; o oe lava Peletisara e, ia e faamatala mai po o le ā le uiga, auā e lē mafai e isi tagata atamamai uma o loʻu malo ona faamatalaina mai iā te aʻu le uiga.+ Ae ua e mafaia, auā ua iā te oe le agaga o atua paia.’
19 “I lenā taimi, na matuā faateʻia ai mo sina taimi Tanielu o lē ua faaigoa foʻi iā Peletisara,+ ma na fefe o ia ona o ona mafaufauga.
“Na faapea atu le tupu, ‘Peletisara e, aua e te fefe ona o le miti ma lona uiga.’
“Na tali mai Peletisara e faapea, ‘Loʻu alii e, tau ina ia faatatau atu le miti i ē ua ʻinoʻino iā te oe, ma lona uiga i ou fili.
20 “‘O le laau na e silasila i ai, na tupu tele ma ua malosi, ua oo lona tumutumu i le lagi, ua iloa mai foʻi i tuluʻiga uma o le lalolagi,+
21 ua mananaia ona lau, ua anoanoaʻi ona fua, ma ua lava ma totoe meaʻai mo foafoaga uma, e nonofo i ona lalo ifo manu o le fanua, ma e ofaga i ai manulele o le lagi i ona lālā,+
22 le tupu e, o oe lava lea, auā ua e tupu tele ma malosi, ua tupu foʻi lou mamalu ma ua oo i le lagi,+ ua oo foʻi lau pule i tuluʻiga o le lalolagi.+
23 “‘Na silafia foʻi e le tupu se leoleo, o sē e paia,+ ua sau mai i le lagi, o lē na faapea mai: “Ia tātuu i lalo le laau ma ia faatamaʻia, ae ia tuu pea le pogati ma ona aa* i le eleele, ma ia fusi i le fusi uʻamea ma le ʻapamemea, i le mutia o le fanua. Ia faasūsūina i le sau o le lagi, ma ia iai pea ma manu o le fanua seʻia mavae atu taimi e fitu.”+
24 Le tupu e, o le uiga lenei ma le poloaʻiga a le Silisili Ese e ao ona oo atu i loʻu alii le tupu.
25 O le a tuliesea oe mai i tagata, ma e te nofo faatasi ma manu o le fanua, e te ʻai foʻi i le vao e pei o povi poʻa; e te susū i le sau o le lagi,+ e mavae atu taimi e fitu,+ seʻia oo ina e iloa o le Silisili Ese, o ia o le Pule i malo o tagata, ma e na te avatu le pule i lē ua ia finagalo i ai.+
26 “‘Ae talu ai na latou faapea mai ia tuu ai pea le pogati o le laau ma ona aa,*+ e te toe maua la lou malo pe a e iloa o loo pule le Atua i le lagi.
27 O lea, le tupu e, tau ina ia e talia mai laʻu fautuaga. Ia liliuese mai i au agasala e ala i le faia o le mea tonu, ma liliuese mai i au amio faapiʻopiʻo i le faaalia o le alofa mutimutivale i ē e matitiva. Atonu o le a faaumiumi ai lou manuia.’”+
28 Na oo nei mea uma lava iā Nepukanesa le tupu.
29 Ua mavae masina e 12, ona savali lea o ia i le taualuga o le maota o le tupu o Papelonia.
30 Na faapea ane le tupu: “Pe e lē o Papelonia Tele ea lenei na ou fausia i loʻu malosi tele e fai ma fale o le tupu ina ia viia ai loʻu mamalu?”
31 A o iai pea le upu i le fofoga o le tupu, na tulei mai se siʻufofoga mai i le lagi: “Nepukanesa e le tupu, o le feʻau lenei mo oe, ‘Ua aveesea lou malo mai iā te oe,+
32 ma e tuliesea oe mai i tagata. E te nofo faatasi ma manu o le fanua, ma e te ʻai i le vao e pei o povi poʻa, e mavae atu foʻi taimi e fitu, seʻia oo ina e iloa o le Silisili Ese, o ia o le Pule i malo o tagata, ma e na te avatu le pule i lē ua ia finagalo i ai.’”+
33 Na faataunuuina i lenā lava taimi le upu iā Nepukanesa. Na tuliesea o ia mai i tagata, ma na ʻai o ia i le vao e pei o povi poʻa, na susū foʻi lona tino i le sau mai i le lagi, seʻia oo ina uumi lona lauulu e pei o fulufulu o aeto, ma ona atigivae ma atigilima e pei o matiuu o manulele.+
34 “Ina ua oo i le faaiʻuga o lenā taimi,+ o aʻu o Nepukanesa, na ou tepa aʻe i le lagi, ma ua toe lelei loʻu mafaufau; na ou vivii atu i le Silisili Ese, o Lē o loo soifua e faavavau, na ou vivii ma faamamaluina o ia, auā o lana pule o le pulega e faavavau, ma o lona malo e oo i lea tupulaga ma lea tupulaga.+
35 E faatauvaa tagata uma lava i le lalolagi, ma o loo ia faia mea e tusa ma lona finagalo i ʻau o le lagi ma tagata o le lalolagi. E leai lava se tasi e mafai ona taofia o ia*+ pe fai atu iā te ia, ‘O le ā le mea ua e faia?’+
36 “I lenā lava taimi ua toe lelei ai loʻu mafaufau, ma ua ou toe maua le matagofie o loʻu malo, o loʻu mamalu, ma loʻu malosi.+ Ua matuā saʻili mai iā te aʻu oʻu tagata maualuluga ma oʻu alii, ua toe faafoʻisia aʻu i loʻu malo, ma ua faaopoopo iā te aʻu le mamalu tele.
37 “O lea, o aʻu o Nepukanesa, ua ou vivii ma faaeaina ma faamamaluina le Tupu o le lagi,+ auā e moni ana galuega uma, ma e tonu ona ala,+ e mafai foʻi ona ia faamaulaloina o ē o loo savavali ma le faamaualuga.”+
Faamatalaga Pito i Lalo
^ E faasino atu i se vaega e tomai i valovaloga faataulāitu ma saʻili i fetu.
^ Po o le “Ae ia tuu pea le tagutugutu o le pogati.”
^ Po o le “ae ia tuu pea le tagutugutu o le pogati.”
^ Po o le “ia tuu pea le tagutugutu o le pogati o le laau.”
^ Po o le “taofia lona aao.”
