O le Tusi i le Faapotopotoga i Kolose 2:1-23
2 Ou te manaʻo ina ia outou iloa le tauiviga tele o loo oʻu faia ona o outou ma i latou o i Laotikaia,+ atoa ma i latou uma e leʻi vāaitino iā te aʻu.
2 Ua ou faia faapea ina ia faamāfanafanaina+ ai o latou loto ma autasi ai i latou i le alofa,+ ma ia maua ai le oloa uma ona o lo latou malamalamaga i le upu moni ma le mautinoa, ina ia iloa lelei le mea lilo paia a le Atua, o le Keriso lea.+
3 Ua matuā natia iā te ia le oloa uma o le atamai atoa ma le poto.+
4 Ua ou fai atu lenei mea, ina ia lē faasesēina outou e se tasi i ana faamatalaga faaōleōle.
5 E ui ina ou lē faatasi ma outou i le tino, ae ou te faatasi pea ma outou i le agaga, ua ou olioli ona ua ou iloa lo outou fai mea maopoopo+ ma le mausalī o lo outou faatuatua iā Keriso.+
6 O lea, e faapei ona outou taliaina le Alii o Keriso Iesu, ia faaauau ona savavali i le autasi ma ia,
7 ia mauaa ma ia atiaʻe outou iā te ia,+ ia mausalī i le faatuatua+ e pei ona aʻoaʻoina ai outou, ma ia outou avatu e lē aunoa le faafetai.+
8 Ia faaeteete ina ia lē maileia* outou e se tasi i filosofia ma manatu taufaasesē e lē aogā+ e tusa ma tū masani a tagata, e tusa ma mataupu faavae a le lalolagi, ae e lē tusa ma aʻoaʻoga a Keriso;
9 auā ua tumu atoatoa o ia i uiga uma o le Atua.+
10 O lea la ua outou maua mea uma e ala iā te ia, o ia o le ulu o malo ma pule uma.+
11 O lo outou aufaatasi ma ia, ua peritomeina ai foʻi outou i le peritomega e leʻi faia e lima, i le toeseina o le tino faaletino+ i le peritomega e pei ona tatau ai mo auauna a Keriso.+
12 Auā na tanumia faatasi outou ma ia i lona papatisoga,+ ma ona o lo outou aufaatasi ma ia, na toe faatutūina+ faatasi ai foʻi outou e ala i lo outou faatuatua i galuega mamana a le Atua, o lē na toe faatūina o ia mai i le oti.+
13 O lea foʻi, e ui ina outou oti i a outou mea sesē ma le lē peritomeina o o outou tino, ae na faaola mai outou e le Atua faatasi ma ia.+ Ua ia faamagalo ma le agalelei a tatou mea sesē uma+
14 ma soloia le tulafono na tusilima+ lea na faia aʻe i poloaʻiga,+ na tetee mai iā i tatou.+ Na Ia aveesea e ala i le tutuʻiina i luga o le laau na faapuapuagatia ai* Iesu.+
15 E ala i lea mea,* ua ia aveesea ai malo ma pule, ma faaalialia le faatoʻilaloina o i latou i luma o le lautele,+ i le taʻitaʻia o i latou i se solo manumalo.
16 O lea la, ia aua neʻi faamasino se tasi iā te outou i a outou meaʻai ma meainu,+ po o le faamanatuina o se tausamiga po o le masina faatoʻā vaaia,+ po o le tausia o le sapati.+
17 O mea na, o le ata o mea o loo i le lumanaʻi,+ a o le mea moni ua i le Keriso lea.+
18 Ia aua neʻi aveesea mai iā te outou le taui+ e se tasi o lē e fiafia e faatagā lotomaulalo, ma e fiafia foʻi i se ituaiga o tapuaʻiga i agelu,* e “tausisi”* o ia i mea ua ia vaai i ai. Ua faafefeteina fua o ia ona o ona lava mafaufauga faaletino,
19 ma ua ia lē pipiimau i le ulu,+ o lē o loo saunia mea uma e manaʻomia e le tino atoa, ma o loo fusia faatasi le tino e ala i sooga ma uaua, ma tupu ai pea ona ua faatupuina e le Atua.+
20 Afai ua outou feoti faatasi ma Keriso e tusa ma mataupu faavae a le lalolagi,+ aiseā la ua outou ola ai pea e peiseaʻī o se vaega o le lalolagi e ala i le saga gauaʻi i poloaʻiga+ e faapea:
21 “Aua le tago atu i ai, aua le tofo i ai, pe paʻi atu i ai,”
22 e faatatau atu i mea uma e faaaogā ma iʻu ina uma, e tusa ma poloaʻiga ma aʻoaʻoga a tagata?+
23 E ui o na mea uma e foliga mai o ni gaoioiga atamai i se tagata e tapuaʻi e tusa ma ona lava manatu, ma le faatagā lotomaulalo, ma ua faaleaga ai le tino,+ ae e lē aogā na mea i le taofiofia o tuʻinanauga o le tino.
Faamatalaga Pito i Lalo
^ Po o le “ina ia lē ave faapagota.”
^ Tagaʻi i le Uiga o Upu.
^ Pe atonu “E ala iā te ia.”
^ Po o “se ituaiga o tapuaʻiga a agelu.”
^ Ele., “e tū atu.” O loo faaaogā i inei e Paulo se faaupuga e fesootaʻi atu i faiga faalotu faapaupau.
