Isaia 36:1-22
36 O le tausaga lona 14 o le nofoaiga a le tupu o Esekia, na alu aʻe ai Sanerivi le tupu o Asuria,+ ua siitaua atu i aai malupuipuia uma o Iuta ma faoa na aai.+
2 Ua aauina mai foʻi e le tupu o Asuria o le Ravesaki,*+ ma se ʻautau toʻatele mai i Lakisa+ i le tupu o Esekia i Ierusalema. Ua latou tutū i autafa o le alāvai o le vaieli pito i luga,+ lea o loo i le ala tele o le fanua o le tagata tā ofu.+
3 Ona ō atu lea iā te ia o Eliakimo+ le atalii o Hilikia o lē na vaavaaia le aiga o le tupu,* o Sevena+ le failautusi, ma Ioaa le atalii o Asafo o lē e faia faamaumauga.
4 Ona fai mai lea o le Ravesaki iā i latou: “Faamolemole, ia fai atu iā Esekia, ‘O le mea lenei ua fai mai ai le tupu sili, le tupu o Asuria: “Aiseā ua e matuā mautinoa ai?+
5 Ua e fai mai, ‘Ua iā te aʻu le poto ma le malosi mo le taua,’ ae ua na o ni upu lava. O ai ea ua e faatuatua i ai, ua e tofotofo ai e te fouvale mai iā te aʻu?+
6 Faauta! ua e faatuatua i le lagolagosua a lenei ū ua nutililii o Aikupito, lea afai e totoo i ai se tagata, e tuia lava lona lima ma ati ai. E faapena lava Farao le tupu o Aikupito i ē uma e faatuatua iā te ia.+
7 Ae afai e tou te faapea mai iā te aʻu, ‘E matou te faatuatua iā Ieova lo matou Atua,’ pe e lē o ia ea e ona mea maualuluga ma fata faitaulaga na aveesea e Esekia,+ ae ua ia faapea atu iā Iuta ma Ierusalema, ‘Ia outou ifo i lenei fata faitaulaga’?”’+
8 O lenei, ia fai se petipetiga ma loʻu alii le tupu o Asuria:+ O le a ou avatu iā te oe solofanua e 2,000, pe afai e mafai ona e tuu i ai ni tagata tiʻetiʻe.
9 E tusa pe e tuu lou faatuatuaga iā Aikupito e maua ai kariota ma tagata ti‘eti‘e solofanua, ae pe e mafai ea ona e tulia, e oo lava i se kovana e to‘atasi, o sē e sili ona faatauvaa o auauna a lo‘u alii?
10 O lenei, pe na ou sau e aunoa ma le pule mai iā Ieova e tau ma lenei nuu ma faaumatia ai? O Ieova lava ia na fetalai mai iā te aʻu, ‘Ia e alu aʻe e tau ma lenei atunuu, ma faaumatia ai.’”
11 Ona fai atu lea o Eliakimo, o Sevena,+ ma Ioaa i le Ravesaki:+ “Faamolemole, ia e fai mai i au auauna i le gagana Arama,*+ auā e matou te malamalama i ai; ae aua e te fai mai iā i matou i le gagana a tagata Iutaia, a o faalogo le nuu o loo i luga o le pā.”+
12 Ae ua tali mai le Ravesaki: “Pe e na o lou alii ea ma oe, na auina mai ai aʻu e loʻu alii e taʻu atu i ai nei upu? Pe e lē o tagata ea fo‘i o loo nonofo i luga o le pā, o ē o le a aai i o latou otaotavale ma feinu i o latou lava feʻaulata, faatasi ma outou?”
13 Ua tū pea le Ravesaki ma valaau mai ma le leotele i le gagana a tagata Iutaia,+ e faapea: “Ia outou faalogologo mai i le upu a le tupu sili, o le tupu o Asuria.+
14 O le mea lenei ua fai mai ai le tupu, ‘Aua neʻi ʻolegia outou e Esekia, auā e lē mafai ona ia laveaʻi outou.+
15 Aua fo‘i neʻi faatupuina e Esekia lo outou faatuatuaina o Ieova,+ e ala i le faapea ane: “E laveaʻia lava i tatou e Ieova, e lē tuuina atu foʻi lenei aai i lima o le tupu o Asuria.”
16 Aua neʻi faalogo iā Esekia, auā o le mea lenei ua fai mai ai le tupu o Asuria: “Ia faia se leleiga ma a‘u ma ia outou siilima,* ona taʻitasi lea o le tagata ma ʻai mai i lona lava vine ma lona lava mati, ma inu mai i lona lava vaieli,
17 seʻia ou alu atu ma ave outou i le laueleele e pei o lo outou lava laueleele,+ o le laueleele o saito ma uaina fou, o le laueleele o falaoa ma togāvine.
18 Aua le faalogo iā Esekia, auā ua ia faasesēina outou e ala i le faapea mai, ‘E laveaʻiina i tatou e Ieova.’ Pe na laveaʻia ea e atua o nuu o latou lava nuu mai i lima o le tupu o Asuria?+
19 O fea o iai atua o Amato ma Arepa?+ O fea o iai atua o Sefavaima?+ Pe na latou laveaʻiina Samaria mai i loʻu lima?+
20 O ai fo‘i i atua uma o nei nuu, na mafai ona lavea‘iina o latou nuu mai i lo‘u lima, e mafai ai e Ieova ona lavea‘iina Ierusalema mai i lo‘u lima?”’”+
21 Ae ua fifilemu pea i latou, ua lē tali atu iā te ia i se upu, auā ua poloaʻi mai le tupu: “Aua tou te tali atu iā te ia.”+
22 Ae ua ō mai iā Esekia o Eliakimo le atalii o Hilikia o lē na vaavaaia le aiga o le tupu,* ma Sevena+ le failautusi, ma Ioaa le atalii o Asafo o lē e faia faamaumauga, ma o latou ofu ua saeia, ua faamatala mai iā te ia upu a le Ravesaki.
Faamatalaga Pito i Lalo
^ Po o “le pule o le ʻautautū uaina.”
^ Po o “le maota o le tupu.”
^ Po o le “gagana Suria.”
^ Epe., “Ia faia se faamanuiaga ma aʻu ma ia ō mai iā te aʻu.”
^ Po o “le maota o le tupu.”
