Iosua 3:1-17
-
Sopoʻia Ioritana e Isaraelu (1-17)
3 Ona tulaʻi lea o Iosua ma le fanauga uma a Isaraelu* i le taeaopō, ua ō ese mai i Setima+ ma ō atu agaʻi i le vaitafe o Ioritana; ma momoe ai i inā i le pō a o latou leʻi sopoʻia atu.
2 Ina ua mavae aso e tolu, ona ō atu lea o alii+ i totonu o le togālauapi
3 ma poloaʻi atu i le nuu: “Pe a outou vaaia loa le atolaau o le feagaiga a Ieova lo outou Atua ua ave e ositaulaga sa Levī,+ ona outou ō ese mai lea i mea o loo outou nonofo ai ma mulimuli atu i ai.
4 Tau lava ia iai se vā o outou ma le atolaau, pe tusa e 2,000 kupita* le mamao; aua neʻi faalatalata atu foʻi i ai. O le faia faapea e tou te iloa ai le ala e ui ai, auā tou te leʻi uia muamua lenei ala.”
5 Ona fai atu lea o Iosua i le nuu: “Inā sauni* ia outou,+ auā o taeao e faia ai e Ieova o mea ofoofogia i o outou luma.”+
6 Ona fai atu lea o Iosua i ositaulaga: “Ia outou ave le atolaau+ o le feagaiga ma muamua atu i luma o le nuu.” Ona latou ave lea o le atolaau o le feagaiga ma ō atu e muamua i luma o le nuu.
7 Ua fetalai mai foʻi Ieova iā Iosua: “E amata atu i le aso nei ona ou faamamaluina oe i luma o Isaraelu uma,+ ina ia o latou iloa ai, e pei lava ona ou faatasi ma Mose,+ e faapea foʻi ona ou faatasi ma oe.+
8 A o oe, ia e poloaʻi atu i ositaulaga o loo aveina le atolaau o le feagaiga e faapea, ‘Pe a outou oo atu i le auvai o le vaitafe o Ioritana, e ao ona outou ō atu i le vai ma tutū ai i inā.’”+
9 Ona fai atu lea o Iosua i le fanauga a Isaraelu: “Inā ō mai ia i inei ma faalogologo mai i afioga a Ieova lo outou Atua.”
10 Ona faapea atu lea o Iosua: “O le mea lenei e tou te iloa ai ua iā te outou le Atua soifua,+ ma o le a ia tuliesea mai i o outou luma tagata Kanana, o tagata Hetī, o tagata Hivī, o tagata Perisē, o tagata Kirekasē, o tagata Amorī, ma tagata Iepusē.+
11 Faauta! Ua muamua atu i o outou luma le atolaau o le feagaiga a le Alii o le lalolagi uma i le vaitafe o Ioritana.
12 O lea, ia outou ave ni tamāloloa se toʻa 12 mai i ituaiga o Isaraelu, e taʻitoʻatasi mai i le ituaiga.+
13 O le taimi lava e papaʻi ai i vai o Ioritana alofivae o ositaulaga o loo aveina le Atolaau a Ieova le Alii o le lalolagi uma, ona lē toe tafe lea o vai o Ioritana o loo tafe mai i luga, ae o le a fatu aʻe e pei o se pā puipui.”*+
14 Ina ua ō ese le nuu mai i o latou faleʻie ma a o leʻi sopoʻia atu le vaitafe o Ioritana, ona muamua atu lea o ositaulaga o loo aveina le atolaau+ o le feagaiga i luma o le nuu.
15 Ina ua oo atu ositaulaga o loo aveina le Atolaau i le vai o Ioritana, ma ua papa‘i o latou vae i le vai (e lofia auvai o le vaitafe+ i aso uma o le seleselega),
16 ona lē toe tafe ai lea o le vai o loo tafe ifo mai i luga. Ua fatu aʻe le vai e pei o se pā puipui,* i se mea mamao i le aai o Atamu, lea e lata i Saretana, ae ua mamate vai o loo tafe agaʻi i le sami o Arapa, o le Sami Oona* lea. Ua lē toe tafe le vai ma ua ui atu le nuu i le vaega e faafesaga‘i ma Ieriko.
17 Ona tutū ai lea ua lē toe gaoioi ositaulaga o loo aveina le atolaau a Ieova, i le ilitivai* mātūtū+ i le ogatotonu o Ioritana, a o savavali atu Isaraelu uma i le ilitivai mātūtū,+ seʻia sopoʻia Ioritana e le nuu atoa.
Faamatalaga Pito i Lalo
^ Epe., “atalii uma o Isaraelu.”
^ Epe., “faapaia.”
^ Po o “se mea maupuʻepuʻe.”
^ Po o “se mea maupuʻepuʻe.”
^ E faasino atu i le Sami Mate.
^ E faasino atu i le eleele i lalo ifo o le vai.
