Faamaumauga a Ioane 21:1-25
21 Ua mavae lenei mea, ona toe faaali atu lea o Iesu i le ʻausoo i le sami o Tiperia. O le auala lenei ua faaali atu ai o ia.
2 Ua faapotopoto faatasi Simona Peteru, o Toma (o lē ua taʻua o le Masaga),+ o Natanielu+ mai i Kana i Kalilaia, o atalii o Sepetaio,+ ma isi ona soo e toʻalua.
3 Ua fai atu Simona Peteru iā i latou: “Ou te alu ou te fagota.” Ua latou fai mai iā te ia: “Matou te ō foʻi ma oe.” Ona latou ō atu lea ma feosofi i le vaa, ae latou te leʻi maua ni iʻa i lenā pō.+
4 Ae ina ua oo i le taeao, ua tū mai Iesu i le matafaga, ae ua lē iloa e soo, o Iesu lea.+
5 Ona fetalai atu lea o Iesu iā i latou: “Si aʻu fanau e, po o iai ni a outou meaʻai?”* Ua latou tali mai iā te ia: “E leai!”
6 Ua ia fetalai atu iā i latou: “Ia lafo le upega i le itu taumatau o le vaa, ona outou maua ai lea o iʻa.” Ona latou lafo lea o le upega, ae ua lē mafai ona latou toso mai i luga, auā ua matuā tele lava iʻa.+
7 Ona fai atu lea o le soo o lē e alofa i ai Iesu+ iā Peteru: “O le Alii!” Ina ua faalogo Simona Peteru e faapea o le Alii lea, ona tago lea o ia ma ofu lona ofu tele, auā sa faasausau o ia, ma oso i le sami.
8 Ae ua ō mai isi soo i le tamaʻi vaa, ma toso mai le upega o loo tumu i iʻa, auā e lē o toe mamao mai i le matafaga, pe ā ma le 300 futu.*
9 Ina ua latou ō ese mai i le vaa, ona latou iloa ai lea o se afi ua mālala, ma iʻa o loo taatitia ai i luga, ma falaoa.
10 Ua fai atu Iesu iā i latou: “Ia aumai ni iʻa na outou maua.”
11 Ona alu lea o Simona Peteru i le vaa, ua toso mai i uta le upega ua tumu i iʻa e 153. E ui lava i le tele o iʻa, ae e leʻi masae ai le upega.
12 Ua faapea atu Iesu iā i latou: “Ō mai loa e aai.” Ae e leai se tasi o le ʻausoo na mafai ona fesili mai iā te ia: “O ai oe?” auā ua latou iloa, o le Alii lea.
13 Ua sau Iesu ma ave le falaoa ma avatu iā i latou, faapea foʻi ma iʻa.
14 O le faatolu ai lea+ ona faaali atu Iesu i le ʻausoo, ina ua mavae lona toetū mai i le oti.
15 Ua uma ona latou aai, ona fesili atu lea o Iesu iā Simona Peteru: “Simona e, le atalii o Ioane, pe e sili ea lou alofa* iā te aʻu nai lo o lou naunau i nei mea?” Ua tali mai o ia: “Ioe le Alii e, ua e silafia ou te alofa faapelepele* iā te oe.” Ua fetalai atu o ia: “Ia e fafaga i aʻu tamaʻi mamoe.”+
16 Ua ia toe fetalai faalua atu iā te ia: “Simona e, le atalii o Ioane, pe e te alofa* iā te aʻu?” Ua ia tali mai iā te ia: “Ioe le Alii e, ua e silafia ou te alofa faapelepele* iā te oe.” Ua ia fetalai atu iā te ia: “Ia e leoleo i aʻu tamaʻi mamoe.”+
17 Ua ia fetalai faatolu atu iā te ia: “Simona e, le atalii o Ioane, pe e te alofa faapelepele* iā te aʻu?” Ua oo ina tigā Peteru ona ua ia fesili atu iā te ia i le taimi lona tolu: “Pe e te alofa faapelepele iā te aʻu?” Ona fai mai lea o ia: “Le Alii e, ua e silafia mea uma; ua e silafia foʻi ou te alofa faapelepele* iā te oe.” Ona faapea atu lea o Iesu iā te ia: “Ia fafaga i aʻu tamaʻi mamoe.+
18 E moni, e moni, ou te fai atu iā te oe, a o e tauleʻaleʻa e masani ona e faia ou lava ofu, ma e alu i le mea e te loto i ai. Ae pe a oo ina e toeaina, e te faaloaloa atu ou lima, ma e faaofu oe e se isi tagata, ma ave oe i le mea e te lē o manaʻo ai.”
19 Ua ia fai atu nei mea e faailoa atu ai le auala e oti ai Peteru, lea e faamamaluina ai le Atua. Ina ua uma ona ia fetalai i lenei mea, ona ia faapea atu lea iā Peteru: “Ia e mulimuli mai pea iā te aʻu.”+
20 Ua faliu Peteru ma iloa atu ai, o loo mulimuli mai le soo lea e alofa i ai Iesu.+ O ia lea na faalagolago i le fatafata o Iesu a o faia le talisuaga afiafi, ma faapea mai iā te ia: “Le Alii e, o ai ea e na te faalataina oe?”
21 Ina ua vaai atu Peteru iā te ia, ona fai mai lea o Peteru iā Iesu: “Le Alii e, o le ā le mea o le a tupu i lenei tagata?”
22 Ua faapea atu Iesu: “Afai ou te loto ina ia tumau pea o ia seʻia ou sau, o le ā le mea e te popole ai fua? Ia e mulimuli mai pea iā te aʻu.”
23 O lea, ua salalau atu ai le tala i le ʻauuso e faapea, e lē oti lenā soo. Peitaʻi, e leʻi fetalai atu Iesu iā te ia e faapea, e lē oti o ia, ae na ia faapea atu: “Afai ou te loto ina ia tumau pea o ia seʻia ou sau, o le ā le mea e te popole ai fua?”
24 O le soo lenei+ na molimau i nei mea, ma na ia tusia nei mea, ma ua outou iloa e faamaoni lana molimau.
25 O le mea moni, e tele foʻi isi mea na faia e Iesu, ou te manatu afai e tusia uma i ni tusi tāʻai, e lē mafai ona ofi nei tusi tāʻai uma i le lalolagi.+
Faamatalaga Pito i Lalo
^ Po o “iʻa.”
^ E mai i le upu Eleni, a·ga·pa′o.
^ E mai i le upu Eleni, phi·le′o.
^ E mai i le upu Eleni, a·ga·pa′o.
^ E mai i le upu Eleni, phi·le′o.
^ E mai i le upu Eleni, phi·le′o.
^ E mai i le upu Eleni, phi·le′o.
