Faamaumauga a Ioane 16:1-33
16 “Ua ou tautala atu i nei mea iā te outou, ina neʻi mou atu lo outou faatuatua.*
2 E tuliesea outou e tagata mai i le sunako.+ O le mea moni, e oo mai le taimi e manatu ai so o se tasi e fasiotia outou,+ ua ia faia se auaunaga paia i le Atua.
3 Ae o le a latou faia nei mea, auā latou te lē iloa le Tamā po o aʻu foʻi.+
4 Peitaʻi, ua ou taʻuina atu nei mea iā te outou, ina ia outou manatua ai pe a oo ina taunuu, na ou taʻuina atu nei mea iā te outou.+
“Ou te leʻi taʻuina atu muamua nei mea iā te outou, auā sa ou faatasi pea ma outou.
5 A o lenei, o le a ou alu atu i Lē na auina mai aʻu,+ ae e lē o fesili mai se tasi o outou iā te aʻu, ‘O fea e te alu i ai?’
6 Ae ona ua ou taʻu atu nei mea iā te outou, ua mafatia ai o outou loto.+
7 E ui i lea, ou te taʻu atu iā te outou le mea moni, e aogā iā te outou loʻu alu ese. Auā afai ou te lē alu ese, e lē oo mai le fesoasoani+ iā te outou. Ae afai ou te alu ese, ona ou auina mai ai lea iā te outou.
8 Pe a oo mai lea fesoasoani, o le a ia avatu se faamaoniga manino i le lalolagi e faatatau i le agasala, le amiotonu, ma le faamasinoga.
9 O le a ia faaalia manino le agasala+ a le lalolagi, auā ua latou lē faatuatua mai iā te aʻu.+
10 O le a ia faaalia atu i le lalolagi o loo ou faia le amiotonu, auā o le a ou alu atu i le Tamā, ona outou lē toe vāai mai lea iā te aʻu.
11 O le a ia faaalia manino mai foʻi po o ai o loo faamasinoina e le Atua, auā ua uma ona ia faamasinoina le pule o lenei lalolagi.+
12 “O loo tele pea mea ou te fia taʻu atu iā te outou, ae e lē mafai ona outou malamalama i na mea uma i le taimi nei.
13 Peitaʻi, pe a oo mai lenā fesoasoani, o le agaga lea o le upu moni,+ ona ia taʻitaʻi lea o outou i upu moni uma. Auā e lē tautala o ia e tusa ma ona lava manatu, ae o mea ua ia faalogo i ai e tautala ai o ia, e taʻu atu foʻi e ia iā te outou mea o le a oo mai.+
14 O le a ia faamamaluina aʻu,+ auā o le a ia taʻu atu iā te outou mea ua ia maua mai iā te aʻu.+
15 O mea uma o i loʻu Tamā, o aʻu mea ia.+ O le mea lea ua ou fai atu ai, e na te taʻu atu iā te outou mea ua ia maua mai iā te aʻu.
16 E toeitiiti ona outou lē toe vāai mai lea iā te aʻu,+ ae e toeitiiti foʻi ona outou vāai mai lea iā te aʻu.”
17 Ona talatalanoa lea o nisi o ona soo e faapea: “O le ā le uiga o ana fetalaiga iā i tatou, ‘E toeitiiti ona outou lē toe vāai mai lea iā te aʻu, ae e toeitiiti foʻi ona outou vāai mai lea iā te aʻu,’ ma ‘ou te alu i le Tamā’?”
18 Ona latou faapea ane lea: “O le ā le uiga o lana fetalaiga, ‘e toeitiiti’? E tatou te lē malamalama i le mea o loo ia fetalai mai ai.”
19 Ua silafia e Iesu ua latou mananaʻo e fesili atu iā te ia, ona ia faapea atu lea iā i latou: “Po ua outou tuufesili le tasi i le isi, ona ua ou fai atu: ‘E toeitiiti ona outou lē toe vāai mai lea iā te aʻu, ae e toeitiiti foʻi ona outou vāai mai lea iā te aʻu’?
20 E moni, e moni, ou te fai atu iā te outou, e tou te fetagisi ma tagituʻi, ae e olioli le lalolagi. E tou te matuā tigā lava, ae e liua lo outou tigā i le olioli.+
21 Pe a fanau se fafine, e tigā o ia, auā ua oo mai lona taimi e fanau ai; ae a fanau mai e ia lana tama, e lē toe manatua lona tigā, auā ua ia olioli ina ua fanau mai se tagata i le lalolagi.
22 E faapena foʻi outou, o loo outou tigā i le taimi lenei; ae o le a tatou toe feiloaʻi ma o le a olioli ai o outou loto,+ ma e lē mafai e se tasi ona aveesea lo outou olioli.
23 I lea aso, tou te lē toe fesili mai lava iā te aʻu i se mea. E moni, e moni, ou te fai atu iā te outou, afai e tou te talosaga atu i le Tamā i se mea,+ e na te foaʻi mai iā te outou i loʻu igoa.+
24 E oo mai i le taimi lenei, e tou te leʻi talosaga atu i se mea e tasi i loʻu igoa. Ia talosaga atu, ona outou maua ai lea, ina ia faaatoatoaina ai lo outou olioli.
25 “Ua ou tautala atu iā te outou i nei mea i talafaatusa. Ae e oo mai le taimi, ou te lē toe tautala atu ai iā te outou i talafaatusa, ae ou te tautala tuusaʻo atu iā te outou e uiga i le Tamā.
26 I lenā aso, tou te talosaga atu ai i le Tamā i loʻu igoa; e lē faapea o le uiga o lenei mea, ou te talosaga atu i le Tamā mo outou.
27 Auā e alofa faapelepele le Tamā iā te outou, ona na outou alolofa faapelepele mai iā te aʻu,+ ma talitonu na ou sau e fai ma sui o le Atua.+
28 Na ou sau e fai ma sui o le Tamā ma ua ou oo mai i le lalolagi. A o lenei, o le a ou tuua le lalolagi ma ou alu atu i le Tamā.”+
29 Ua fai mai ona soo: “Tagaʻi foʻi! O lea ua e fetalai tuusaʻo mai, ma e te lē o faaaogāina ni talafaatusa.
30 O lea ua matou iloa nei, e te silafia mea uma ma e lē tatau ona suʻesuʻevale se tasi iā te oe. O le mea lea ua matou talitonu ai, na e maliu mai i le Atua.”
31 Ua tali atu Iesu iā i latou: “Po ua outou talitonu nei ea?
32 Faauta! E oo mai le taimi ma ua oo mai lava, o le a taʻitasi ai outou ma sola i lona lava aiga, ae tuua na o aʻu.+ Peitaʻi, e lē na o aʻu auā o loo ma faatasi ma le Tamā.+
33 Ua ou fai atu nei mea iā te outou, ina ia outou maua ai le filemu ona o aʻu.+ O le a puapuagatia outou i le lalolagi, ae ia lototetele! Ua ou manumalo i le lalolagi.”+
Faamatalaga Pito i Lalo
^ Ele., “ina neʻi outou tautevateva.”
