Faamaumauga a Ioane 14:1-31
14 “Aua neʻi atuatuvale o outou loto.+ Ia faatuatua i le Atua,+ ma ia faatuatua mai foʻi iā te aʻu.
2 E tele mea e nonofo ai i le maota o loʻu Tamā. Ana leai, semanū ou te lē taʻuina atu iā te outou. A o lenei, ou te alu e sauni se nofoaga mo outou.+
3 E lē gata i lea, pe a ou alu ma sauni se nofoaga mo outou, o le a ou toe sau ma talia outou, ina ia outou iai foʻi i le mea ou te iai.+
4 O le mea foʻi ou te alu i ai, ua outou iloa le ala.”
5 Ona fai mai lea o Toma+ iā te ia: “Le Alii e, matou te lē iloa le mea o loo e maliu atu i ai. E faapefea ona matou iloa le ala?”
6 Ua fetalai atu Iesu: “O aʻu o le ala,+ o le upu moni+ ma le ola.+ E leai se tasi e alu atu i le Tamā pe a lē ui mai iā te aʻu.+
7 Afai ua outou iloa aʻu, ua outou iloa foʻi loʻu Tamā; e amata atu nei ona outou iloa o ia ma vāai iā te ia.”+
8 Ua fai mai Filipo: “Le Alii e, ia e faaali mai iā i matou le Tamā, ma ua lava lenā mo i matou.”
9 Ua tali atu Iesu iā te ia: “Filipo e, pe e te leʻi iloa lava aʻu, e ui ua leva ona ou faatasi ma outou? O lē ua vaai mai iā te aʻu, ua vaai foʻi o ia i le Tamā.+ E faapefea la ona e fai mai, ‘Ia faaali mai iā i matou le Tamā’?
10 Pe e tou te leʻi talitonu ea, e autasi aʻu ma le Tamā, ma e autasi foʻi le Tamā ma aʻu?+ O mea ua ou fai atu ai iā te outou, ou te lē tautala atu i ni oʻu lava manatu;+ ae o le Tamā o loo autasi pea ma aʻu, o loo faia ana galuega e ala iā te aʻu.
11 Ia talitonu mai iā te aʻu, o loo autasi aʻu ma le Tamā, o loo autasi foʻi le Tamā ma aʻu; ae a leai, ia outou talitonu ona o galuega.+
12 E moni, e moni, ou te fai atu iā te outou, o lē e faatuatua mai iā te aʻu, e na te faia galuega na ou faia; e na te faia foʻi galuega e sili atu,+ auā ua ou alu atu i loʻu Tamā.+
13 O so o se mea foʻi e tou te talosaga atu ai i loʻu igoa, ou te faia lava, ina ia faamamaluina ai le Tamā ona o le Atalii.+
14 Afai tou te talosaga atu i se mea i loʻu igoa, ou te faia lava.
15 “Afai tou te alolofa iā te aʻu, e tou te tausia la aʻu poloaʻiga.+
16 Ou te talosaga atu foʻi i le Tamā e foaʻi mai iā te outou se isi fesoasoani, ina ia iā te outou e faavavau.+
17 O le agaga lea o le upu moni,+ lea e lē mafai ona talia e le lalolagi, auā e lē vaaia pe iloa foʻi e le lalolagi.+ Ua outou iloa le agaga, auā o loo tumau pea iā te outou, ma o loo i totonu iā te outou.
18 Ou te lē tuua outou e faanoanoa.* O le a ou toe foʻi mai iā te outou.+
19 E toeitiiti ona lē toe vāai mai lea o le lalolagi iā te aʻu, ae tou te vāai mai iā te aʻu,+ auā ou te ola aʻu ma e ola ai foʻi outou.
20 O le a outou iloa ai i lenā aso, e autasi aʻu ma loʻu Tamā, e autasi outou ma aʻu, ma e autasi foʻi aʻu ma outou.+
21 O lē ua iai aʻu poloaʻiga ma tausi i ai, o ia lea e alofa iā te aʻu. O lē e alofa iā te aʻu, e alofa foʻi loʻu Tamā iā te ia. Ou te alofa foʻi iā te ia ma ou te faailoa manino atu aʻu iā te ia.”
22 Ua fai mai Iuta+ iā te ia, e lē o Iuta le Sekara: “Le Alii e, o le ā le mea ua tupu ua e finagalo ai e faailoa manino mai oe iā i matou ae lē i le lalolagi?”
23 Ona tali atu lea o Iesu iā te ia: “Afai e alofa mai se tasi iā te aʻu, e tausia e ia aʻu upu,+ ma e alofa foʻi loʻu Tamā iā te ia. E ma te ō atu foʻi iā te ia ma matou nonofo faatasi ma ia.+
24 O lē e lē alofa iā te aʻu, e na te lē tausia aʻu upu; ma o upu ua outou faalogo i ai, e lē o ni aʻu upu, ae o upu a le Tamā na auina mai aʻu.+
25 “Ua ou tautala atu i nei mea iā te outou, a o ou iai pea ma outou.
26 Ae o le fesoasoani, o le agaga paia lea o le a auina mai e le Tamā i loʻu igoa, o le a aʻoaʻoina outou i mea uma, ma faamanatu atu i o outou mafaufau mea uma na ou taʻuina atu.+
27 Ou te tuuina atu le filemu iā te outou,+ ma ou te avatu iā te outou loʻu filemu. Ou te lē avatua iā te outou e pei ona avatu e le lalolagi. Aua neʻi atuatuvale o outou loto pe faavaivai ona o le fefefe.
28 Ua outou faalogo na ou fai atu, ‘Ou te alu ma ou te toe foʻi mai iā te outou.’ Afai tou te alolofa iā te aʻu, tou te olioli la i loʻu alu atu i le Tamā, auā e sili le Tamā iā te aʻu.+
29 O lea, ua ou taʻu atu iā te outou lenei mea a o leʻi tupu, ina ia outou talitonu ai pe a tupu mai.+
30 E lē toe tele ni upu ou te tautala atu ai iā te outou, auā o loo sau le pule o le lalolagi,+ ae e leai sana pule iā te aʻu.+
31 Ae ina ia iloa e le lalolagi ou te alofa i le Tamā, o lea ua ou faia ai mea e pei lava ona poloaʻiina ai aʻu e le Tamā e fai.+ Ia tutū loa i luga, tatou ō.
Faamatalaga Pito i Lalo
^ Po o le “e pei o ni tamaiti ua mātuaoti.”
