Failauga 9:1-18
9 Na ou manatunatu i nei mea uma i loʻu loto ma ou malamalama ai, ua i aao o le Atua moni o ē ua amiotonu ma ē ua atamamai atoa ma a latou galuega.+ Ua lē iloa foʻi e tagata le alofa po o le ʻinoʻino na iai a o leʻi iai i latou.
2 E tasi le i‘uga e oo i tagata uma,+ o le tagata amiotonu ma le tagata amioleaga,+ o le tagata lelei ma le tagata mamā ma le tagata e lē mamā, o ē e faia taulaga ma ē e lē faia taulaga. E tutusa le tagata lelei ma le tagata agasala; e tutusa foʻi le tagata e tautō ma lē e faaeteete e faia se tautoga.
3 O le mea lenei ua fai ma mala i mea uma ua faia i lalo o le lā: Talu ai e tasi le iʻuga o i latou uma,+ ua tumu ai loto o tagata i mea leaga; ua iai foʻi le valea i o latou loto i aso uma o o latou olaga, ona latou feoti lea!*
4 Ua iai le faamoemoe mo lē ua faatasi ma ē o loo ola, auā e sili le taʻifau ua ola nai lo o le leona ua mate.+
5 Auā o ē ua ola ua latou iloa e oti i latou,+ a o ē ua oti latou te lē iloa se mea,+ ua lē toe maua foʻi e i latou se taui,* auā ua faagalogaloina mea uma e manatua ai i latou.+
6 Ua mavae atu fo‘i lo latou alofa, o lo latou ita ma lo latou lotoleaga, ma e lē toe iai lava sa latou vaega i so o se mea e faia i lalo o le lā.+
7 Inā alu ia ma ʻai lau meaʻai ma le olioli ma inu lau uaina ma le lotofiafia,+ auā ua finagalo malie le Atua moni i au galuega.+
8 Ia papa‘e* ou ofu i taimi uma, ma ia lē aunoa ona uu lou ulu i le suāuu.+
9 Ia e olioli i lou ola faatasi ma lau avā pele+ i aso uma o lou olaga puupuu,* ia ua tuuina mai e Ia iā te oe i lalo o le lā, o ou aso puupuu uma, auā o lou tofi lea i le olaga ma au galuega mamafa ua e tigāina ai i lalo o le lā.+
10 O mea uma ua e iloa e faia e ou lima, inā faia ia ma lou malosi atoa, auā e leai se galuega, po o ni fuafuaga, po o le poto, po o le atamai i le Tuugamau*+ o loo e alu atu i ai.
11 Na ou vaaia foʻi se isi mea i lalo o le lā, e lē manumalo i taimi uma i le tuuga o ē e saoasaoa, pe e manumalo ē e malolosi i le taua,+ pe e iai foʻi i taimi uma i ē e atamamai meaʻai, pe e maua i taimi uma e i latou e popoto le tamaoaiga,+ pe e taulau foʻi i taimi uma i latou ua popoto,+ auā e tutupu faafuaseʻi mea iā i latou uma i le taimi e leʻi faatalitalia.
12 Auā e lē iloa e le tagata lona taimi.+ E pei o iʻa ua maua i se upega e mate ai, ma manulele ua maileia i se mailei, e faapea foʻi ona maileia le fanau a tagata i se taimi o mala, pe a tutupu faafuaseʻi iā i latou.
13 Na ou mātauina foʻi i lalo o le lā lenei mea e faatatau i le atamai, ma na ou maofa ai:
14 Na iai se tamaʻi aai, ma e toʻalaiti ni tane na iai; na alu atu i ai se tupu malosi ma siʻomia ma fausia ni puipui tetele e faasagatau i ai.
15 Na iai foʻi i le aai se tamāloa e mativa ae e atamai, ma o lona atamai na ia faasaoina ai le aai. Ae ua leai se tasi e manatuaina lea tamāloa mativa.+
16 Ona ou faapea ifo lea: ‘E sili ona lelei o le atamai nai lo o le malosi;+ peitaʻi e inosia le atamai o le tagata mativa, ma e lē utagia e se tasi ana upu.’+
17 E sili ona utagia upu filemu a tagata atamamai, nai lo o alaga a lē o loo pule i tagata vālea.
18 E sili ona lelei le atamai nai lo o auupega o le taua, ae e tele mea lelei e faaleagaina e na o se tagata agasala e to‘atasi.+
Faamatalaga Pito i Lalo
^ Epe., “ma mulimuli ane ua latou ō atu i ē ua feoti!”
^ Po o le “totogi.”
^ E faasino atu i ofu sesega e faaalia ai le fiafia, ae e lē o ofu o le faavauvau.
^ Po o le “iʻuvale.”
^ Po o “Seoli.” Tagaʻi i le Uiga o Upu.
