Faamasino 12:1-15
12 Ua faapotopoto faatasi tagata o Efaraima ma sopoʻia le vaitafe ma oo atu ai i Sefono,* ua latou fai mai iā Iefata: “Aiseā e te leʻi amia ai i matou e tatou te ō ina ua e sopo atu e tau ma tagata Amonī?+ O le a matou susunuina lou fale faatasi ma oe.”
2 Ae ua fai atu Iefata iā i latou: “Na matou matuā finau ma tagata Amonī, o aʻu ma oʻu tagata. Na ou alaga atu foʻi iā te outou mo se fesoasoani, ae e tou te leʻi faaolaina aʻu mai i o latou lima.
3 Ina ua ou iloa e tou te lē faaolaina aʻu, ona ou filifili ai lea e tuu loʻu ola i se tulaga lamatia* ma alu atu e tau ma tagata Amonī.+ O lea na tuuina mai ai i latou e Ieova i loʻu lima. Aiseā la ua outou ō mai ai i lenei aso e siitaua mai iā te aʻu?”
4 Ona faapotopoto faatasi loa lea e Iefata o tane uma o Kiliata+ ma ō atu e tau ma Efaraima; ua faato‘ilalo foʻi e tagata Kiliata o Efaraima, auā ua latou faapea ane: “O outou tagata Kiliata o loo i Efaraima ma Manase, ua na o ni tagata fesolasolata‘i mai i Efaraima.”
5 Na maua e Kiliata vaega e sopo‘ia ai le vaitafe* o Ioritana+ o loo i luma o Efaraima; ma ina ua faapea mai tagata o Efaraima na taumafai e sosola ese: “Seʻi oʻu ui atu,” ona fesili ane lea o tagata Kiliata i tagata taʻitasi: “Po o oe o se tagata Efaraima?” Pe a tali mai o ia: “E leai!”
6 ona latou faapea atu lea iā te ia: “Faamolemole, seʻi fai mai, Seepoleta.” Ona ia fai mai lea: “Sepoleta,” auā e lē mafai ona ia taʻu saʻo le upu. Ona latou puʻe lea ma fasioti iā te ia i vaega e sopo‘ia ai le vaitafe o Ioritana. Na fasiotia ai i na aso le toʻa 42,000 o tagata Efaraima.
7 Na faamasino Iefata iā Isaraelu i tausaga e ono, ma ina ua oti Iefata le Kiliata, ona latou tanu ai lea o ia i lona aai i Kiliata.
8 Ua mavae o ia,+ ona faamasino ai lea iā Isaraelu o Ivisona mai i Peteleema.
9 Na iai ona atalii e toʻa 30 ma ona afafine e toʻa 30. Na ia aauina atu ona afafine e faaipoipo i tamāloloa mai i isi aiga, ma aumai fafine e to‘a 30 e faaipoipo i ona atalii. Na ia faamasino iā Isaraelu mo tausaga e fitu.
10 Ua oti Ivisona ona tanu ai lea o ia i Peteleema.
11 Ua mavae o ia, ona faamasino ai lea iā Isaraelu o Aluna le tagata Sepulona. Na ia faamasino iā Isaraelu mo tausaga e sefulu.
12 Ua oti Aluna le tagata Sepulona, ona tanu ai lea i Ailona i le nuu o Sepulona.
13 Ua mavae o ia, ona faamasino ai lea iā Isaraelu o Apetonu le atalii o ʻIleli le tagata Piratonu.
14 Na iai ona atalii e toʻa 40 ma atalii o ona atalii e toʻa 30, o ē na tiʻetiʻe i asini e 70. Ua ia faamasino foʻi iā Isaraelu mo tausaga e valu.
15 Ua oti Apetonu le atalii o ʻIleli le tagata Piratonu, ona tanu ai lea o ia i Piratonu i le nuu o Efaraima i le mauga o tagata Amaleka.+
Faamatalaga Pito i Lalo
^ Pe atonu “sopo‘ia le itu i mātū.”
^ Po o le “tuu lo‘u ola i lo‘u lava lima.”
^ Po o le “Na maua e Kiliata asaga.”
