Esoto 8:1-32
8 Ona fetalai mai lea o Ieova iā Mose: “Ia e alu iā Farao ma e fai atu iā te ia e faapea, ‘O le mea lea ua fetalai mai ai Ieova: “Ia tuu mai loʻu nuu e ō ina ia latou auauna mai iā te aʻu.+
2 Pe afai e faaauau ona e musu e faatagaina i latou e ō, o le a ou faamalaia lou laueleele i rane.+
3 O le a anoanoaʻi rane i le vaitafe o le Naila, e ō mai ma ulu atu i lou fale, i lou potumoe, i lou moega, i fale o au auauna, i luga o ou tagata, i totonu o au ogaumu, ma tanoa e palu ai falaoamata.+
4 E tuli oso atu rane i ou luga, i luga o ou tagata, ma au auauna uma lava.”’”
5 Mulimuli ane, ua fetalai mai Ieova iā Mose: “Ia e fai atu iā Arona, ‘Ia faaloaloa lou lima lea e uu ai le tootoo i luga o vaitafe, i alāvai o le Naila ma taufusi, ina ia ō aʻe ai rane i le laueleele uma o Aikupito.’”
6 Ona faaloaloa lea e Arona o lona lima i luga o vai o Aikupito, ma ō aʻe ai rane ma ua lilo uma ai le laueleele o Aikupito.
7 Peitaʻi, ua faapea foʻi ona faia e ositaulaga* i a latou faiga lilo faaagaga, ma ua ō aʻe ai rane i le laueleele o Aikupito.+
8 Ona aami lea e Farao o Mose ma Arona ma faapea atu: “Ia oulua ʻaiʻoi atu iā Ieova ia aveese rane mai iā te aʻu ma oʻu tagata,+ auā ua ou malie e tuu atu le nuu ia latou ō e fai taulaga iā Ieova.”
9 Ona tali mai lea o Mose iā Farao: “O loʻu faaaloalo ou te fai atu ai, ia e taʻu mai po o afea ou te ʻaiʻoi atu ai ina ia aveese rane mai iā te oe, o au auauna, o lou atunuu, ma ou fale. E na o le vaitafe o le Naila o le a totoe ai rane.”
10 Ua ia fai atu: “O a taeao.” Ua ia tali mai: “O le a faia e tusa ma lau saunoaga, ina ia e iloa ai e leai se isi e tusa ma Ieova lo matou Atua.+
11 E mou ese atu rane mai iā te oe, o ou fale, o au auauna, ma ou tagata. E na o le vaitafe o le Naila o le a totoe ai rane.”+
12 Ona ō ese lea o Mose ma Arona mai i luma o Farao, ma ua ʻaiʻoi atu Mose iā Ieova ona o rane na Ia faaoo iā Farao.+
13 Ua faia e Ieova e tusa ma le talosaga a Mose, ma ua amata ona mamate rane i fale, i lotoā, ma fanua.
14 Ua latou faaputu rane, ua oo ina tele lava faaputuga, ma ua elo ai le atunuu.
15 Ua iloa e Farao ua maua e le atunuu le mapusaga, ona ia faamaaa lea o lona loto;+ ua ia lē faalogo iā i laʻua e pei lava ona fetalai mai ai Ieova.
16 Ona fetalai mai lea o Ieova iā Mose: “Ia fai atu iā Arona, ‘Ia faaloaloa lou tootoo ma taia ai le efuefu o le laueleele, ona avea ai lea ma namu* i le atunuu atoa o Aikupito.’”
17 Ona la faia lea faapea. Ua faaloaloa e Arona lona lima o loo uu ai le tootoo, ua ia taia ai le efuefu o le laueleele, ma ua oo atu namu i luga o tagata ma manu. Ua avea le efuefu uma o le laueleele ma namu i le atunuu atoa o Aikupito.+
18 Ua taumafai ositaulaga e faia faapea i a latou faiga lilo faaagaga,+ ina ia maua mai ai foʻi ni namu, ae ua latou lē mafaia lava. Ua oo atu namu i tagata atoa ma manu.
19 Ona fai mai lea o ositaulaga iā Farao: “O le aao* o le Atua!”+ Ae ua maaa pea le loto o Farao, ma ua lē faalogo iā i laʻua e pei lava ona fetalai mai ai Ieova.
20 Ua fetalai mai Ieova iā Mose: “Ia e usupō i le taeao ma tū i luma o Farao. Faauta! O le a alu atu o ia i le vai. Ona e fai atu lea iā te ia, ‘O le mea lenei ua fetalai mai ai Ieova: “Ia tuu mai loʻu nuu e ō ina ia latou auauna mai iā te aʻu.
21 Ae pe afai e te lē tuu mai loʻu nuu e ō, o le a ou faaoo atu iā te oe, i au auauna, i ou tagata, ma i totonu o ou fale o lago taufeū; ma o le a tumu ai fale o tagata Aikupito i lago taufeū, ma o le a lilo uma ai le laueleele ua latou tutū ai.
22 I lenā aso ou te vavaeese ai lava le laueleele o Kosena, le mea ua nonofo ai loʻu nuu. E lē oo i ai ni lago taufeū,+ ma o lenei mea o le a e iloa ai o aʻu lava o Ieova, o loo o‘u iai i lenei laueleele.+
23 Ou te faaesea loʻu nuu mai i ou tagata. O le a tupu lenei faailoga a taeao.”’”
24 Ua faapea lava ona faia e Ieova; ua mumu atu le anoanoaʻi o lago taufeū i le fale o Farao, i fale o ana auauna, ma le atunuu atoa o Aikupito.+ Ua faaleagaina le atunuu atoa ona o lago taufeū.+
25 Mulimuli ane, ona aami lea e Farao o Mose ma Arona ma faapea atu: “Ia ō e fai taulaga i lo outou Atua i lenei atunuu.”
26 Ae ua fai mai Mose: “E lē mafai ona matou faia faapea, auā o le mea e matou te faia ai le taulaga iā Ieova lo matou Atua e ʻinoʻino i ai tagata Aikupito.+ Pe a matou faia i luma o tagata Aikupito le taulaga e latou te ʻinoʻino i ai, pe e latou te lē fetogia ai i matou i maa?
27 E matou te ō i se malaga e tolu aso i le toafa, ma fai ai taulaga iā Ieova lo matou Atua, e pei ona ia fetalai mai ai iā i matou.”+
28 Ua faapea atu Farao: “Ou te tuuina atu outou e ō e fai taulaga iā Ieova lo outou Atua i le toafa. Ae tau lava ina ia aua neʻi outou ō mamao. Ia oulua ʻaiʻoi atu mo aʻu.”+
29 Ona tali mai lea o Mose: “Ou te alu ese mai iā te oe, ou te ʻaiʻoi atu foʻi iā Ieova, ma o le a ō ese lago taufeū mai iā Farao, o ana auauna, ma ona tagata a taeao. Ae ia aua ne‘i toe faaʻoleʻole mai Farao iā i matou, ma lē tuuina mai le nuu e ō e fai taulaga iā Ieova.”+
30 Ona alu ese lea o Mose mai iā Farao ma ʻaiʻoi atu iā Ieova.+
31 Ua faia e Ieova e pei o upu a Mose, ua ō ese lago taufeū mai iā Farao, o ana auauna, ma ona tagata. E leai ma se lago taufeū na totoe.
32 Peitaʻi, ua toe faamaaa foʻi e Farao lona loto ma lē tuuina mai ai le nuu e ō.
Faamatalaga Pito i Lalo
^ Po o “ositaulaga o ē e faia faiga faaagaga.”
^ O se ituaiga iniseti e tai pei o namu ia sa masani ona iai i Aikupito.
^ Epe., “tamatamaʻilima.”
