Esoto 39:1-43
39 Ua latou faia ofu ua lelei ona lalagaina mo le auaunaga i le mea paia i filo lanu moana, i fulufulu mamoe lanu violē, ma mea ua vali mūmū sesega.+ Ua latou faia ofu paia mo Arona+ e pei ona poloaʻi mai ai Ieova iā Mose.
2 Ua ia faia le efota+ i le auro, i filo lanu moana, i fulufulu mamoe lanu violē, i mea ua vali mūmū sesega, ma ʻie lino ua lelei ona milo ona filo.
3 Ua latou sasa faamafolafola auro ia faamanifinifi, ona ia tipi lea o auro e pei o ni filo ina ia suʻi faatasi ma filo lanu moana, o fulufulu mamoe lanu violē, o mea ua vali mūmū sesega, ma ʻie lino lelei, ma suʻi ai teuteu.
4 Ua latou faia fasi ʻie o le tauʻau o le efota, ia e sosoo faatasi i ona pito e lua i luga.
5 Ua iai le fusi ua teuteuina ua suʻiina i le efota ina ia mau lelei ai le efota,+ ua faia i ia lava mea, o le auro, o le filo lanu moana, o le fulufulu mamoe lanu violē, o mea ua vali mūmū sesega, ma le ʻie lino ua lelei ona milo ona filo, e pei ona poloaʻi mai ai Ieova iā Mose.
6 Ona latou faamau lea o maa soama i teuteu auro, ma ua latou vane ai igoa o atalii o Isaraelu, e pei ona latou vaneina o se faamaufaailoga.+
7 Ua ia tuu ia maa i luga o tauʻau o le efota e fai ma maa e manatua ai atalii o Isaraelu,+ e pei ona poloaʻi mai ai Ieova iā Mose.
8 Ona ia faia lea o le ufifatafata+ i le galuega a le tagata suʻi teuteu, e pei foʻi o le faiga o le efota, i le auro, i le filo lanu moana, i le fulufulu mamoe lanu violē, i mea ua vali mūmū sesega, ma le ʻie lino ua lelei ona milo ona filo.+
9 E faatafafā le ufifatafata pe a faasautualua. Ua latou faia le ufifatafata ma pe a faasautualua, e aga* lona umi, e aga foʻi lona lautele.
10 Ona latou faamauina ai lea o maa tāua i laina e fā. O le laina muamua ua iai maa o le salikea, o le topasi, ma le samaraki.
11 O le laina lona lua ua iai maa o le nofeka, o le safaira, ma le ialoma.
12 O le laina lona tolu ua iai maa o le lesema,* o le sevo, ma le aselama.
13 O le laina lona fā ua iai maa o le tasesa, o le soama, ma le iasepi. Ua faamau ia maa i totonu o teuteu auro.
14 E tasi le maa mo atalii taʻitasi o Isaraelu, ma ua vaneina nei maa taʻitasi e pei o le vaneina o se faamaufaailoga, o maa taʻitasi ua vaneina ai igoa taʻitasi o ituaiga e 12.
15 Ona latou faia lea i luga o le ufifatafata o filifili ua fili e pei o se maea i le auro māoʻi.+
16 Ua latou faia o teuteu auro e lua ma mama auro e lua, ona tuu lea o mama e lua i pito e lua o le ufifatafata.
17 Ua latou faamau maea auro e lua i mama e lua i pito o le ufifatafata.
18 Ua latou faamau pito e lua o maea e lua i teuteu auro e lua, ona latou faamau lea o ia mea i tauʻau o le efota, ina ia tautau le ufifatafata i luma o le efota.
19 Ona latou faia lea o mama auro e lua ma tuu i pito e lua o le ufifatafata, i le pito i lalo lea e ū i le efota.+
20 Ua latou faia isi mama auro e lua ma tuu i luma o le efota i le pito i lalo o tauʻau e lua o le efota, e lata i le mea e sosoo ai, i luga aʻe o le fusi ua teuteuina o le efota.
21 Mulimuli ane, ua latou nonoa maea lanu moana i mama o le ufifatafata, ona nonoa lea i mama o le efota ina ia lē see ese ai le ufifatafata mai i lona tulaga i le efota, i luga aʻe o le fusi ua teuteuina, e pei ona poloaʻi mai ai Ieova iā Mose.
22 Ua ia faia atoa le ofu talaloa lima pupuu o le efota i le filo lanu moana, o le galuega a se tagata e lalagaina ʻie.+
23 Ua iai le ua i le ogatotonu o le ofu talaloa lima pupuu, e pei o le ua o le ofutau ʻapamemea. Ua afe faataamilo le ua, ina ia lē masae ai.
24 Ua latou faia i le afe pito i lalo o le ofu talaloa lima pupuu o rimoni i le filo lanu moana, o le fulufulu mamoe lanu violē, ma mea ua vali mūmū sesega, ua milo faatasi.
25 Ua latou faia foʻi logo i le auro māoʻi ma tuu e tovā ma rimoni, e faataamilo i le afe o le ofu talaloa lima pupuu, ua tovā ma rimoni;
26 ua sosoo le logo ma le rimoni, o le logo ma le rimoni ua faataamilo i le afe o le ofu talaloa lima pupuu ua faaaogā mo le auaunaga, e pei ona poloaʻi mai ai Ieova iā Mose.
27 Ona latou faia lea o ofu talaloa mo Arona ma ona atalii,+ i ʻie lino lelei, o le galuega a se tagata e lalagaina ʻie,
28 ma le pulou ʻie+ ua faia i ʻie lino lelei, o pulou teuteu+ ua faia i ʻie lino lelei, o ofuvae pupuu+ ua faia i ʻie lino ua lelei ona milo ona filo,
29 ma le fusi ʻie ua faia i ʻie lino ua lelei ona milo ona filo, i filo lanu moana, i fulufulu mamoe lanu violē, ma mea ua vali mūmū sesega ua lalagaina, e pei ona poloaʻi mai ai Ieova iā Mose.
30 Mulimuli ane, ua latou faia i le auro māoʻi se pale iila, o le faailoga paia o le tuuina atu,* ma ua vane ai se faaupuga e pei o le vaneina o se faamaufaailoga, “E paia lava Ieova.”+
31 Ua latou tuu i ai se manoa e faia mai i le filo lanu moana, ina ia faamau ai le pale iila i le pulou ʻie, e pei ona poloaʻi mai ai Ieova iā Mose.
32 Ona māeʻa lea o le galuega atoa mo le faleʻie paia, o le fale‘ie lea o le feiloaʻiga, ma ua faia e le fanauga a Isaraelu o mea uma na poloaʻi mai ai Ieova iā Mose.+ Ua faapea lava ona latou faia.
33 Ua latou aumaia le faleʻie paia+ iā Mose, o le faleʻie+ ma mea uma e faaaogā ai: o ona lave,+ o auivi laupapa,+ o pou faalava,+ o poutū, o lagolago;+
34 o ufiufi ua faia i paʻu mamoe poʻa ua vali mūmū,+ atoa ma ufiufi o paʻu takesa, ma le ʻie puipui e vaelua ai;+
35 o le atolaau o le feagaiga,* o ona amo+ ma le ufiufi;+
36 o le laulau, ma mea uma e faaaogā ai+ ma le falaoa e laulauina;
37 o le tuugāmolī ua faia i le auro māoʻi, ma ona molī+ ua faasolosolo i se laina, ma mea uma e faaaogā ai+ ma le suāuu e faamalamalama ai;+
38 o le fata faitaulaga+ auro, o le suāuu e faauu ai,+ o le mea manogi lelei e mū,+ o le ʻie pupuni+ o le faitotoʻa o le faleʻie;
39 o le fata faitaulaga ʻapamemea+ ma lona lagolago valavala e faia i le ʻapamemea, o amo,+ ma mea uma e faaaogā ai,+ o le faatanoa ma lona tulaga;+
40 o ʻie e tautau i le lotoā, o ona poutū, o ona lagolago,+ o le ʻie pupuni+ o le faitotoʻa o le lotoā, o maea o le faleʻie, o pine o le faleʻie,+ ma mea uma e faaaogā ai mo le auaunaga i le faleʻie paia, o le faleʻie lea o le feiloaʻiga;
41 o ofu ua lelei ona lalaga mo le auaunaga i le mea paia, o ofu paia mo Arona le ositaulaga,+ ma ofu o ona atalii o ē e auauna o ni ositaulaga.
42 E tusa ma mea uma na poloaʻi mai ai Ieova iā Mose, ua faapea lava ona faia le galuega e le fanauga a Isaraelu.+
43 Ina ua asiasi e Mose a latou galuega uma, ua ia vaaia ua latou faia e pei lava ona poloaʻi mai ai Ieova; ma ua faamanuia Mose iā i latou.
Faamatalaga Pito i Lalo
^ E lē māiloa po o le ā lea maa tāua.
^ Po o “o le pale paia.”
^ Epe., “atolaau o le Molimau.”
