Esekielu 19:1-14
-
Se pese faanoanoa mo taʻitaʻi o Isaraelu (1-14)
19 “Ia e usu se pese faanoanoa* e faatatau i taʻitaʻi o Isaraelu
2 ma fai atu,‘O ai lou tinā? O le leona fafine faatasi ma leona poʻa.
Na taooto faatasi o ia ma tamaʻi leona malolosi* ma tausia lana fanau.
3 Na ia tausia aʻe se tasi o ana tama, ma ua avea ma tamaʻi leona malosi.+
Na ia aʻoaʻoina le auala e saeia ai manu e ʻai,Na ia faatamaʻia foʻi tagata.
4 Na logotala nuu e faatatau iā te ia ma puʻeina o ia i a latou lua,Ona latou avatu lea o ia i le nuu o Aikupito e ala i mātau.+
5 Na ia faatalitali ma iloa ai ua siliga se faamoemoe e toe foʻi mai lana tama.
Ona ia ave lea o se tasi o ana tama ma aʻoaʻo ina ia avea o se tamaʻi leona malosi.
6 Na feoaʻi foʻi o ia faatasi ma isi leona, ma ua avea o se tamaʻi leona malosi.
Na ia aʻoaʻoina le auala e saeia ai manu e ʻai, ma na ia faatamaʻia foʻi tagata.+
7 Na ia faataamilo i ʻolo malupuipuia na nonofo ai tagata ma faatamaʻia o latou aai,Ina ia faatumulia ai le laueleele ua faagaogaoina, i le leo o lana tagi.+
8 Ua ō mai nuu mai i itumalo na siʻomia ai e faasagatau iā te ia, ina ia lafo a latou upega i ona luga,Ma na puʻea o ia i a latou lua.
9 Na latou tuuina o ia i le pā e ala i mātau ma avatu o ia i le tupu o Papelonia.
O i inā na latou taofia ai o ia, ina ia lē toe lagona ai lona leo i mauga o Isaraelu.
10 Na pei lou tinā o se vine*+ na totōina i autafa o vai.
Na ia fuaina mai ni fua ma na tele ona lālā ona o le tele o vai.
11 Na tupu mai ai ni lālā* malolosi, lea e talafeagai e fai ma tootoo o tupu.
Na tupu le vine ma ua maualuga atu i lo o isi laau,Ma na iloa atu ona o lona umī ma le tele o ona lau lauusiusi.
12 Ae na liaʻiina+ ma lafoina o ia i le eleele ona o le ita tele,Ma na mamago ona fua ona o le matagi mai i sasaʻe.
Na gausia ona lālā malolosi ma ua mamago ai,+ ma na faatamaʻia i le afi.+
13 A o lenei ua totōina le vine i le toafa,I le laueleele naumati e leai se vai.+
14 Na sosolo le afi mai i ona lālā* ma faatamaʻia ai ona tātupu ma ona fua,Ma ua leai se lālā malosi ua totoe, ua leai se tootoo e pule ai.+
“‘O le pese faanoanoa lenā, ma e avea pea o se pese faanoanoa.’”
Faamatalaga Pito i Lalo
^ Po o “se pese o auega.”
^ Po o “tamaʻi leona taanoa.”
^ Epe., “vine i lou toto.”
^ Po o “tootoo.”
^ Po o “tootoo.”
