O le Tusi i Kerisiano Eperu 13:1-25
13 Ia faaauau ona faaalia lo outou alofa faaleuso.+
2 Aua neʻi galo le agaga talimālō,*+ auā o le faia faapea na talimālō ai isi i agelu e aunoa ma le iloa.+
3 Ia manatua i latou o loo i le falepuipui*+ e peiseaʻī ua saisaitia faatasi outou,+ ma ē ua faileagaina, auā o loo iai pea outou i le tino.*
4 Ia faamamaluina e tagata uma le faaipoipoga, ma ia aua neʻi faaleagaina le moega o le faaipoipoga,+ auā e faamasino e le Atua o ē e faia amioga lē mamā taufeusuaʻiga* ma ē e mulilulua.+
5 Ia aunoa o outou olaga ma le manaʻo tele i tupe,+ ae ia outou lotomalilie i mea ua iā te outou.+ Auā na fetalai o ia: “Ou te lē tuua lava oe, ma ou te lē tuulafoaʻia lava oe.”+
6 Ia tatou lototetele ma faapea atu: “O Ieova* o loʻu fesoasoani ia; ou te lē fefe lava. O le ā se mea e mafai ona faia e tagata iā te aʻu?”+
7 Ia manatua i latou o loo taʻimua iā te outou,+ o ē o loo taʻutaʻu atu le afioga a le Atua iā te outou, ma ia outou mātauina iʻuga o a latou amio, ina ia faaaʻoaʻo i lo latou faatuatua.+
8 E lē sui lava Iesu Keriso e pei ona sa iai ananafi, ma le asō, ma e faavavau lava.
9 Aua neʻi taʻitaʻisesēina outou i mataupu eseese ma aʻoaʻoga ese, auā e sili atu pe a faamalosia le loto e le agalelei faifua o le Atua nai lo o meaʻai,* ia e lē aogā i ē o loo pupū tele i ai.+
10 Ua iā i tatou le fata faitaulaga e lē tatau ona aai ai i latou ua faia le auaunaga paia i le faleʻie.+
11 Auā o tino o manu ua aveina e le ositaulaga sili o latou toto i le mea paia e fai ma taulaga mo agasala, ua susunuina i tua o le togālauapi.+
12 O lea la, na faapuapuagatia foʻi Iesu i tua o le faitotoʻa o le aai,+ ina ia mafai ona faapaiaina tagata i lona lava toto.+
13 Inā tatou ō atu ia iā te ia i tua o le togālauapi, ma tauave le faalumaina na ia tauaveina,+
14 auā e lē o iā i tatou se aai e tumau pea, ae o loo tatou faatalitali atu ma le naunau i le aai o le a oo mai.+
15 E ala iā Iesu, seʻi o tatou ofo atu e lē aunoa i le Atua taulaga o viiga,+ o le fua lea o o tatou laugutu,+ e faailoa atu ai i tagata lona suafa.+
16 E lē gata i lea, aua neʻi galo le faia o mea lelei, ma le tufa atu o mea i isi,+ auā o taulaga faapena e matuā fiafia i ai le Atua.+
17 Ia usiusitaʻi i ē o taʻimua iā te outou+ ma ia gauaʻi+ iā i latou, auā o loo leoleoina e i latou o outou ola talu ai e tatau ona latou fai atu se tala,+ ina ia latou faia ma le olioli ae e lē ma le ōi, auā e leaga lea mo outou.
18 Ia tatalo pea mo i matou, auā ua matou talitonu ua iā i matou se lotofuatiaifo lelei,* ona e matou te mananaʻo ina ia faia mea uma ma le faamaoni.+
19 Ae ou te matuā ʻaiʻoi atu iā te outou e tatalo ina ia vave ona ou toe faatasi atu iā te outou.
20 A o le Atua o le filemu, o lē na toe faatūina mai i le oti le leoleo mamoe sili,+ o lo tatou Alii o Iesu, faatasi ma le toto o le feagaiga e faavavau,
21 tau ina ia lava saunia e ia outou i mea lelei uma ina ia faia lona finagalo, ia galue o ia i totonu iā i tatou e ala iā Iesu Keriso ina ia faia mea e finagalo malie i ai o ia, ia faamamaluina o ia e faavavau, faavavau lava. Amene.
22 O lenei, ou te ʻaiʻoi atu iā te outou le ʻauuso e, ina ia outou faalogologo ma le onosaʻi i nei upu faalaeiau, auā e puupuu laʻu tusi ua fai atu iā te outou.
23 Ou te manaʻo ia outou iloa ua faasaʻolotoina lo tatou uso o Timoteo. Pe afai e vave ona sau o ia, ona ma ō atu faatasi lea e feiloaʻi ma outou.
24 Ia momoli atu oʻu alofaaga i ē uma o taʻimua iā te outou ma le ʻaupaia uma. O loo alolofa atu foʻi i latou o i Italia+ iā te outou.
25 Ia iā te outou uma le agalelei faifua o le Alii.
Faamatalaga Pito i Lalo
^ Po o le “agalelei i tagata ese.”
^ Ele., “i latou o loo saisaitia.”
^ Pe atonu “e peiseaʻī o loo faapuapuagatia faatasi outou.”
^ Tagaʻi i le Uiga o Upu.
^ E faasino atu i tulafono e faatatau i meaʻai.
^ Po o le “mamā.”
