O le Tusi Lona Lua o Tupu 11:1-21
11 Ua iloa e Atalia+ le tinā o Aasaia ua oti lana tama,+ ona tulaʻi lea o ia ma fasiotia fanau uma lava a le tupu.+
2 A o Iosape le afafine o le tupu o Ioramo, le tuafafine o Aasaia, ua ia ave Ioasa+ le atalii o Aasaia, ma ave faananā o ia mai i atalii o le tupu o ē na tatau ona fasiotia, o ia ma lana tausitama, ua ia ave i laʻua i le potumoe i totonu. Ua latou faalafi iā te ia ina neʻi iloa e Atalia, ma e leʻi fasiotia ai o ia.
3 Ua iai pea o ia ma le tausitama i le fale o Ieova, ua lafi ai mo tausaga e ono, a o pule Atalia i le nuu.
4 I le tausaga lona fitu, na alu atu ai le feʻau a Ioiata i taʻitaʻi o le taʻitoʻaselau, o ē na vaavaaia leoleo o le ʻau Keri ma leoleo o le maota o le tupu,*+ ina ia latou ō mai iā te ia i le fale o Ieova. Ua ia osia se feagaiga ma i latou ma faatautō i latou i le fale o Ieova, ona ia faailoa atu lea iā i latou le atalii o le tupu.+
5 Ua ia poloaʻi atu iā i latou: “O le mea lenei e tou te faia: O le tasi vaetolu o le vaega lea e tiute i le aso Sapati, e latou te leoleoina lelei le fale o le tupu,+
6 o le isi tasi vaetolu e iai i le faitotoʻa ua taʻua o le Faavae, ma le isi tasi vaetolu e iai i le faitotoʻa i tua o leoleo o le maota o le tupu. Ia outou feauauaʻi e leoleoina le fale.
7 O vaega e lua, o ē e lē tiute i le aso Sapati, e tatau ona latou leoleo lelei le fale o Ieova, ina ia puipuia ai le tupu.
8 Ia outou siʻosiʻomia le tupu i itu uma, ma ia tofu le tagata ma lana auupega i lona lima. O so o se tasi e sau i le laina o fitafita, e fasiotia lava o ia. Ia outou faatasi pea ma le tupu i so o se mea e alu i ai.”*
9 Ua faia e taʻitaʻi o le taʻitoʻaselau+ mea uma na poloaʻi atu ai Ioiata le ositaulaga. Ua latou taʻitasi ma ave i ona tagata o ē na tiute i le aso Sapati, faatasi ma i latou o ē e lē tiute i le aso Sapati, ma ua latou ō mai iā Ioiata le ositaulaga.+
10 Ona avatu lea e le ositaulaga i taʻitaʻi o le taʻitoʻaselau, o tao ma talita lapotopoto a le tupu o Tavita sa i le fale o Ieova.
11 Ua tutū foʻi leoleo o le maota o le tupu+ e taʻitasi ma lana auupega i lona lima, e mai i le itu taumatau o le fale e oo i le itu tauagavale o le fale, i tafatafa ane o le fata faitaulaga+ ma le fale, e siʻosiʻomia ai le tupu.
12 Ona aumaia lea e Ioiata o le atalii o le tupu+ ma faaee iā te ia le palealii ma le Tusi o le Tulafono;*+ ua latou faia o ia ma tupu ma faauuina o ia. Ua patipati o latou lima ma faapea atu: “Ia soifua le tupu!”+
13 Ina ua faalogo Atalia i le leo o le fetaufetuliaʻi ma le vāvāō o le nuu, ona sau ai lea o ia i le nuu i le fale o Ieova.+
14 Ona ia vaaia lea o le tupu o loo tū i tafatafa o le poutū e tusa ai ma tū masani.+ Ua iai foʻi le tupu faatasi ma taʻitaʻiʻau ma ē e iliina pū,+ ma o loo fiafia le nuu uma ma ili a latou pū. Ona saeia lea e Atalia o ona ofu, ua alaga: “O le fouvalega! O le fouvalega!”
15 Ae ua poloaʻi atu Ioiata le ositaulaga i taʻitaʻi o le taʻitoʻaselau,+ o ē ua tofia e vaavaaia le ʻautau, ua faapea atu iā i latou: “Inā ave ia o ia i fafo mai i le laina o fitafita, ma o so o se tasi foʻi e mulimuli atu iā te ia, ia fasiotia i le pelu!” Auā ua faapea atu le ositaulaga: “Aua neʻi fasiotia o ia i le fale o Ieova.”
16 Ua latou puʻea o ia, ma ina ua oo mai i le nofoaga e ui mai ai solofanua i le fale o le tupu,+ ona fasiotia lea o ia i inā.
17 Ona faia lea e Ioiata se feagaiga i le vā o Ieova ma le tupu ma le nuu,+ ina ia avea pea i latou ma nuu o Ieova; na ia faia foʻi se feagaiga i le vā o le tupu ma le nuu.+
18 Mulimuli ane, ua ō atu le nuu uma i le fale* o Paala ma talepe i lalo ana fata faitaulaga;+ ua latou matuā nutililiia foʻi ona faatusa,+ ma fasiotia Matana le ositaulaga a Paala,+ i luma o fata faitaulaga.
Ona tofia lea e le ositaulaga o ovasia e vaavaaia le fale o Ieova.+
19 Ua ia ave foʻi taʻitaʻi o le taʻitoʻaselau,+ o leoleo o le ʻau Keri, o leoleo o le maota o le tupu,+ ma tagata uma o le nuu, ina ia latou ave ifo le tupu mai i le fale o Ieova; ua latou ō ifo i le fale o le tupu, e ui mai i le faitotoʻa o leoleo o le maota o le tupu. Ona nofo ai lea o ia i le nofoālii o tupu.+
20 Ua olioli pea tagata o le nuu ma ua filemu foʻi le aai, auā ua latou fasiotia Atalia i le pelu i le fale o le tupu.
21 E fitu tausaga o Ioasa+ ina ua fai o ia ma tupu.+
Faamatalaga Pito i Lalo
^ Epe., “o le ʻaufaafeao.”
^ Epe., “i lona ulufafo atu ma lona ulufale mai.”
^ Atonu o se tusi tāʻai o loo iai le Tulafono a le Atua.
^ Po o le “malumalu.”
