O le Tusi Muamua o Tupu 15:1-34
15 O le tausaga lona 18 o le nofoaiga a le tupu o Ierepoamo+ le atalii o Nepata, na fai ai Aviama ma tupu i Iuta.+
2 E tolu tausaga na pule ai o ia mai i Ierusalema. O le igoa o lona tinā o Maaka,+ o le tama a le afafine o Apisaloma.
3 Na ia faia agasala uma na faia e lona tamā na muamua atu iā te ia; e leʻi atoatoa* foʻi lona loto iā Ieova lona Atua, e pei o le loto o lona augātamā o Tavita.
4 Ae ona o Tavita,+ na foaʻi mai ai e Ieova lona Atua iā Aviama se molī* i Ierusalema,+ e ala i le tofia o lona atalii e fai ma tupu ina ua mavae atu o ia, ma faatumauina pea Ierusalema.
5 Auā na faia e Tavita le mea tonu i luma o Ieova, e leʻi liliuese foʻi o ia mai i mea uma na Ia poloaʻi mai ai iā te ia i aso uma o lona ola, se‘i vaganā ai le mea na ia faia iā Uria le tagata Hetī.+
6 Na iai pea taua i le vā o Reopoamo ma Ierepoamo i aso uma o lona ola.+
7 A o le olaga uma o Aviama, ma mea uma na ia faia, po ua lē o tusia ea i le tusi o talafaasolopito o tupu o Iuta?+ Sa iai foʻi taua i le vā o Aviama ma Ierepoamo.+
8 Ona taoto lea o Aviama faatasi ma ona augātamā, ua latou tanu foʻi o ia i le Aai a Tavita; ma ua avea Asa+ lona atalii ma tupu e sui iā te ia.+
9 O le tausaga lona 20 o le pulega a Ierepoamo le tupu o Isaraelu, na pule ai Asa e fai ma tupu o Iuta.
10 E 41 tausaga na pule ai o ia i Ierusalema. O le igoa o le tinā o lona tinā, o Maaka,+ o le tama a le afafine o Apisaloma.
11 Ua faia e Asa le mea tonu i le silafaga a Ieova,+ e pei o Tavita lona augātamā.
12 Na ia aveesea mai i le nuu o tamāloloa talitane i le malumalu,+ ma aveesea tupua inosia* uma na faia e ona augātamā.+
13 Na ia aveesea fo‘i Maaka+ le tinā o lona tinā, mai i lona tulaga maualuga,* auā na ia faia se tupua matagā e tapuaʻi ai i le pou paia.* Ona tā lea i lalo e Asa o lana tupua matagā,+ ma susunu i le vanu o Ketarono.+
14 Ae e leʻi aveesea mea maualuluga.+ E ui i lea, na atoatoa* le loto o Asa iā Ieova i lona olaga atoa.
15 Ua ia aumaia foʻi i le fale o Ieova mea na la faapaiaina ma lona tamā, o siliva, o auro, ma isi ipu.+
16 Na iai pea taua i le vā o Asa ma Paasa+ le tupu o Isaraelu.
17 Ona alu aʻe lea o Paasa le tupu o Isaraelu e tau ma Iuta, ma ia fausia* Rama,+ ina ia leai se tasi e mafai ona alu i fafo pe sau i totonu iā* Asa le tupu o Iuta.+
18 Ona tago lea o Asa i siliva uma ma auro na totoe i potu teuoloa o le fale o Ieova ma le fale o le tupu, ma tuu atu i lima o ana auauna. Ua aauina atu e le tupu o Asa i latou i le tupu o Suria+ o Peniata le atalii o Taperimoni le atalii o Hesiona, o lē na nofo i Tamaseko, ua faapea atu:
19 “O loo iai se maliega* i lo ta vā, ma le vā o loʻu tamā ma lou tamā. O lenei ua ou avatu iā te oe meaalofa o siliva ma auro. Inā maliu mai ia e tatala la oulua maliega* ma Paasa le tupu o Isaraelu, ina ia alu ese ai o ia mai iā te aʻu.”
20 Ona faalogo lea o Peniata i le tupu o Asa, ua ia aauina atu foʻi taʻitaʻi o ana ʻautau e faasagatau i aai o Isaraelu, ma ua latou faatoʻilalo Iono,+ o Tanu,+ o Apelapete-maaka, o Kinereta uma, ma le nuu uma o Nafatali.
21 Ina ua faalogo i ai Paasa, ona ia tuua loa lea o le fausiaina* o Rama, ae ua nofo pea i Tiresa.+
22 Ua aami foʻi e le tupu o Asa o Iuta uma, e leai se tasi e leʻi amia, ma ua latou ave maa ma laupapa na fausia ai Rama e Paasa; ma ua faaaogā e Asa nei mea e fausia* ai Kepa+ i Peniamina, ma Mesepa.+
23 A o le olaga uma o Asa, o lona malosi uma, o mea uma na ia faia, ma aai na ia fausia,* po ua lē o tusia ea i le tusi o le talafaasolopito o tupu o Iuta? Ae ina ua toeaina o ia, ona mamaʻi ai lea o ona vae.+
24 Ona taoto lea o Asa faatasi ma ona augātamā, ma ua tanu o ia faatasi ma i latou i le Aai a Tavita lona augātamā; ma ua avea Iosefatu+ lona atalii ma tupu e sui iā te ia.
25 Ua fai Natapu+ le atalii o Ierepoamo ma tupu o Isaraelu, i le tausaga lona lua o le nofoaiga a Asa le tupu o Iuta, ma ua pule o ia iā Isaraelu mo tausaga e lua.
26 Na ia faia pea mea leaga i le silafaga a Ieova, ua savali foʻi o ia i le ala o lona tamā, ma faia fo‘i agasala na faia e lona tamā,+ ia na faapogaia ai le agasala o Isaraelu.+
27 Ona fouvale lea o Paasa le atalii o Akia o le aiga o Isakara faasaga iā Natapu, ma ua fasiotia o ia e Paasa i Kipetonu,+ o le aai o Filisitia, a o osofaʻia e Natapu ma Isaraelu uma o Kipetonu.
28 Ua fasiotia o ia e Paasa i le tausaga lona tolu o le nofoaiga a Asa le tupu o Iuta, ma avea ai Paasa ma tupu e sui iā te ia.
29 Ina ua fai Paasa ma tupu, ona ia fasiotia lea o le aiga uma o Ierepoamo. E na te leʻi faatotoeina foʻi se tagata ola o le aiga o Ierepoamo; na ia faaumatia i latou uma, e tusa ai ma le afioga a Ieova na ia fetalai mai ai e ala i lana auauna o Akia le tagata Sailo.+
30 Na tupu lenei mea ona o agasala na faia e Ierepoamo, lea na faapogaia ai Isaraelu e agasala, ma lona matuā faatigā iā Ieova le Atua o Isaraelu.
31 A o le olaga uma o Natapu ma mea uma na ia faia, po ua lē o tusia ea i le tusi o talafaasolopito o tupu o Isaraelu?
32 Na iai pea taua i le vā o Asa ma Paasa le tupu o Isaraelu.+
33 O le tausaga lona tolu o le nofoaiga a Asa le tupu o Iuta, na fai ai Paasa le atalii o Akia ma tupu o Isaraelu uma, i Tiresa mo tausaga e 24.+
34 Ae ua faia pea e ia o mea leaga i le silafaga a Ieova,+ ua savali foʻi o ia i le ala o Ierepoamo ma ana agasala ia na faapogaia ai Isaraelu e agasala.+
Faamatalaga Pito i Lalo
^ Po o le “tuutoina atu atoatoa.”
^ E faasino atu i sē e tupuga mai iā te ia.
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
^ Epe., “mai i lona tulaga o se masiofo.”
^ Tagaʻi i le Uiga o Upu.
^ Po o le “tuutoina atu atoatoa.”
^ Po o le “toe fausia.”
^ Po o le “ona tuua pe ulufale i vaipanoa o.”
^ Po o le “feagaiga.”
^ Po o le “feagaiga.”
^ Po o le “toe fausiaina.”
^ Po o le “toe fausia.”
^ Po o le “toe fausia.”
