O le Tusi Muamua iā Timoteo 4:1-16

  • Lapataʻiga i aʻoaʻoga a temoni (1-5)

  • Auala e avea ai ma auauna lelei a Keriso (6-10)

    • Eseesega o le faamalositino ma le faamaoni i le Atua (8)

  • Ia uaʻi totoʻa i lau aʻoaʻo atu (11-16)

4  Peitaʻi, ua faailoa manino mai e le upu mai i le Atua,* e paʻuʻū ese nisi mai i le faatuatua i se taimi mulimuli ane, ae uaʻi atu i upu taufaasesē mai i agaga+ ma aʻoaʻoga a temoni, 2  e ala i tala pepelo a tagata faafiaamiotonu,+ o ē ua faailogaina o latou lotofuatiaifo i le uʻamea aasa. 3  Ua latou faasāina le faaipoipo+ ma faatonuina tagata e faamamao mai i meaʻai+ na foafoaina e le Atua, e aai ai+ ma le faafetai i latou e faatuatua+ ma iloa lelei le upu moni. 4  Auā e lelei foafoaga uma a le Atua,+ ma e lē tatau ona teena se mea+ pe afai ua talia ma le faafetai, 5  auā ua faapaiaina e ala i le afioga a le Atua ma le tatalo. 6  O le tuuina atu o lenei fautuaga i uso, ua avea ai oe ma auauna lelei a Keriso Iesu, ma ua tausia oe i upu o le faatuatua ma le aʻoaʻoga lelei ua e mulimulituʻi i ai.+ 7  Peitaʻi, ia teena tala sesē ua faaleagaina ai mea e paia,+ e pei o tala sa faamatalaina e loomatutua. Ae ia aʻoaʻo oe lava ia fai ma ou sini le faamaoni i le Atua. 8  Auā e itiiti le aogā o le faamalositino,* a o le faamaoni i le Atua e aogā lea i mea uma lava, auā o loo folafola mai ai le ola i le taimi nei ma le ola i le lumanaʻi.+ 9  E maufaatuatuaina lenā faamatalaga, ma e tatau foʻi ona taliaina atoatoa. 10  O le mea lea ua tatou galulue mamafa ma finafinau ai,+ auā ua tuu atu lo tatou faamoemoe i le Atua soifua, o le Faaola+ lea o ituaiga uma o tagata,+ aemaise lava o ē e faamaoni. 11  Ia faaauau ona taʻu atu nei poloaʻiga ma aʻoaʻo atu. 12  Aua lava neʻi vaai maulalo se tagata i lou talavou. Nai lo o lea, ia fai oe ma faaaʻoaʻo i ē e faamaoni i le tautala, ma le amio, ma le alofa, ma le faatuatua, ma le amio mamā. 13  Ia toʻaga pea e faitau i luma o tagata,+ ia apoapoaʻi* atu, ma aʻoaʻo atu seʻia ou alu atu. 14  Aua neʻi faatalalē i le meaalofa ua tuuina atu iā te oe, e ala i le valoaga ina ua faaee atu lima o le ʻautoeaina iā te oe.+ 15  Ia manatunatu i nei mea; ia naunau i ai, ina ia iloa ai e tagata uma lou agaʻigaʻi i luma. 16  Ia uaʻi totoʻa iā te oe lava ma lau aʻoaʻo atu.+ Ia e tumau ai i nei mea, auā o le faia faapea e faaolaina ai oe lava atoa ma i latou o faalogo iā te oe.+

Faamatalaga Pito i Lalo

^ Ele., “e le agaga.”
^ Po o le “toleni.”
^ Po o le “faalaeiau.”
O LE TUSI PAIA–O LE FAALILIUGA A LE LALOLAGI FOU (TOE TEUTEUINA I LE 2013)
1 Timoteo 4
Faa-Samoa
Faitau le Tusi Paia i le Initaneti
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt itu. 40