O le Tusi Muamua o Samuelu 3:1-21
-
Tofia Samuelu o se perofeta (1-21)
3 O le taimi lea, ua auauna le tama o Samuelu+ iā Ieova i luma o Eli, ma ua seāseā ona oo mai se afioga mai iā Ieova i na aso; ua seāseā fo‘i toe vaaia ni faaaliga.+
2 A o moe Eli i lona potu i se tasi aso, ua faasolo ina puaoa ona mata, ma ua lē mafai ai ona vaai.+
3 E leʻi tineia lava le molī a le Atua,+ ma o loo moe Samuelu i le malumalu*+ o Ieova, lea o loo iai le Atolaau a le Atua.
4 Ona valaau mai lea o Ieova iā Samuelu. Ua tali atu o ia: “O aʻu lenei.”
5 Ua tamoʻe atu o ia iā Eli ma faapea atu: “O aʻu lenei, auā na e valaau mai iā te aʻu.” Ae ua tali mai o ia: “Ou te leʻi valaau atu iā te oe. Inā toe taoto ia.” Ona alu lea o ia ma taoto i lalo.
6 Ua toe valaau mai Ieova: “Samuelu e!” Ona tulaʻi lea o Samuelu ma alu atu iā Eli, ua faapea atu: “O aʻu lenei, auā na e valaau mai iā te aʻu.” Ae ua ia fai mai: “Loʻu atalii e, ou te leʻi valaau atu iā te oe. Inā e toe taoto ia.”
7 (A o Samuelu, e leʻi oo ina iloa lelei e ia Ieova, ma e leʻi faailoaina mai foʻi iā te ia le afioga a Ieova.)+
8 Ua toe valaau mai Ieova, o le faatolu ai lea: “Samuelu e!” Ona tulaʻi lea o ia ma alu atu iā Eli, ua faapea atu: “O aʻu lenei, auā na e valaau mai iā te aʻu.”
Ona iloa ai lea e Eli, o Ieova lea o loo valaau mai i le tama.
9 Ona fai mai lea o Eli iā Samuelu: “Inā alu ia ma taoto, afai e toe valaau mai o ia iā te oe, ona e faapea atu lea, ‘Fetalai mai ia Ieova e, auā o loo faalogo atu lau auauna.’” Ona alu ai lea o Samuelu, ua taoto i lona moega.
10 Ona toe valaau mai lea o Ieova: “Samuelu, Samuelu e!” Ona tali atu lea o Samuelu: “Fetalai mai ia, auā o loo faalogo atu lau auauna.”
11 Ua fetalai mai Ieova iā Samuelu: “Faauta! o le a ou faia se mea iā Isaraelu, lea e faateʻia ai se tasi* pe afai e faalogo i ai.+
12 I lenā aso, ou te faataunuu ai iā Eli o mea uma na ou fai atu ai e faatatau i lona aiga, e mai i le amataga e oo i le faaiʻuga.+
13 Ia e taʻu atu iā te ia e faapea, ua ou faasalaina lona aiga e oo i le faavavau ona o le mea sesē ua ia iloa,+ o le upuleaga o ona atalii i le Atua,+ ae e na te leʻi aʻoaʻia i laʻua.+
14 O le mea lea ua ou tautō ai i le aiga o Eli, e lē faamagaloina lava le mea sesē a le aiga o Eli i se taulaga po o mea e ofoina mai.”+
15 Ua taoto pea Samuelu seʻia oo i le taeao, ona ia tatala lea o faitotoʻa o le fale o Ieova. Ae ua fefe Samuelu e taʻu atu iā Eli le faaaliga.
16 Ua valaau mai Eli iā Samuelu e faapea: “Samuelu e, loʻu atalii!” Ua tali atu o ia: “O aʻu lenei.”
17 Ona fai mai lea o ia: “O le ā le upu na fetalai atu ai o Ia iā te oe? Faamolemole, aua lava neʻi e natia mai iā te aʻu. Ia matuā faasala oe e le Atua* pe afai e te natia mai iā te aʻu se upu o upu uma na ia fetalai atu ai iā te oe.”
18 Ona faailoa atu lea e Samuelu o upu uma lava, e na te leʻi natia foʻi se mea e tasi mai iā te ia. Ua fai mai Eli: “O le finagalo lenā o Ieova. Ia faia e ia le mea ua ia finagalo i ai.”
19 Ua tupu pea Samuelu, ma sa faatasi Ieova ma ia,+ e leʻi iʻuvale foʻi* se upu o ana upu uma na fai mai ai.
20 Ua iloa e Isaraelu uma e amata mai i Tanu e oo i Peresepa, ua tofia Samuelu e fai ma perofeta a Ieova.
21 Ua faaauau ona faaali mai Ieova i Sailo, auā ua faailoa mai e Ieova o ia lava iā Samuelu i Sailo e ala i le afioga a Ieova.+
Faamatalaga Pito i Lalo
^ E faasino atu i le faleʻie paia.
^ Epe., “e taalili ai taliga o se tasi.”
^ Epe., “Ia faapea ona faia e le Atua iā te oe, ma faaopoopo i ai.”
^ Epe., “e leʻi paʻū i le eleele.”
