Ua faapea mai Alona: “Pe a ou faalogoina le feʻei o sailini, e tātā vale lava loʻu fatu ma ou tamoʻe i se nofoaga e malu ai mai i pomu. Ae e lē teʻa ai loʻu popole. E sili ona ou popole pe afai ou te iai i fafo ae e leai se mea e lafi ai. I se tasi taimi, a o oʻu savali i le auala, sa ou tagi ma na tau lē mafai ona ou mānava. Na umi se taimi o oʻu taumafai ia toʻa. E uma ane ae toe faalogoina foʻi le feʻei o sailini.”

E lē gata i taua, ae e tele foʻi isi tulaga e lamatia ai. O se faaaʻoaʻoga, e matuā faateʻia oe pe a iloa ane ua aafia oe po o sē e pele iā te oe i se maʻi tugā. O isi e popole e faatatau i le lumanaʻi. E latou te popole e faapea, ʻPo o le a ola aʻe laʻu fanau po o a latou fanau i se lalolagi e iai taua, faamaʻi, solitulafono, faaleagaina le ʻea ma le siʻosiʻomaga, ma suia le tau?’ E mafai faapefea ona tatou feagai ma nei ituaiga o popolega?

O le iloaina e tutupu mea leaga, o lea, “o lē ua iai le utaga mamao ua iloa atu le mala ma lafi ai.” (Faataoto 27:12) E pei ona tatou taumafai e puipuia i tatou i le itu faaletino, e iai foʻi laasaga e mafai ona puipuia ai lo tatou itu faalemafaufau ma taufaalogona. Ua tumu faafiafiaga sauā ma tala fou i vaaiga e matataʻu ai, ma ua atili ai ona faapopoleina i tatou ma a tatou fanau. O le ʻalofia o vaaiga sauā, e lē faapea ai ua tatou teena mea moni o loo tutupu. E leʻi foafoaina e le Atua o tatou mafaufau ia mafaufau i  mea leaga, peitaʻi e ao ona faatumu i ʻmea uma ua moni, tonu, mamā, ma faatupu ai le lotofiafia.’ Pe a faia faapea, o le a aumaia e le “Atua o le filemu” iā i tatou le filemu o le mafaufau ma le loto.​—Filipi 4:8, 9.

E fesoasoani le faatuatua moni iā i tatou ina ia feagai ai ma popolega. Ua faalaeiau i tatou i le Tusi Paia ia “mataala i le faia o tatalo.” (1 Peteru 4:7) Ia talosaga atu i le Atua mo lana fesoasoani faapea le atamai ma le lototele ina ia faia ai le mea sili e tatou te mafaia, ma mautinoa “e faafofoga mai o ia i so o se mea tatou te talosaga atu ai.”—1 Ioane 5:15.

Ua taʻua i le Tusi Paia o Satani o le “pule o lenei lalolagi,” ma “o le lalolagi atoa o loo nofo toʻilalo i le pule a lē o loo leaga,” ae e lē o le Atua. (Ioane 12:31; 1 Ioane 5:19) O lea, e leʻi faafaatusa fetalaiga a Iesu ina ua ia aʻoaʻoina i tatou e tatalo e faapea: “Ia laveaʻi iā i matou mai i lē o loo leaga.” (Mataio 6:13) Ua faapea mai Alona: “O so o se taimi lava e feʻei ai sailini, ou te tatalo iā Ieova e fesoasoani mai ina ia pulea oʻu faalogona. E vili mai foʻi si aʻu tane ma fai faatasi le ma tatalo. O se matuā fesoasoani le tatalo.” Ua moni ai le Salamo 145:18: “E latalata Ieova iā i latou uma e valaau atu iā te ia, o i latou uma e valaau atu iā te ia ma le faamaoni.”

I le Lauga a Iesu i le Mauga, na ia aʻoaʻoina ai ona soo ia tatalo e faapea: “Ia oo mai lou malo.” (Mataio 6:10) O le a aveesea atoatoa e le Malo o le Atua popolega uma. O le a ʻfaaiʻuina e le Atua taua i tuluʻiga o le lalolagi’ e ala iā Iesu le “Perenise o le Filemu.” (Isaia 9:6; Salamo 46:9) ʻE faamasino foʻi e le Atua nuu e tele. E latou te lē toe sii le pelu, o le tasi atunuu i le isi atunuu, pe e latou te toe aʻoaʻo foʻi i taua. E leai foʻi se tasi e faamataʻu iā i latou.’ (Mika 4:3, 4) O le a maua e aiga le fiafia ma latou “fausia fale ma nonofo ai; e latou te totō foʻi togāvine ma latou aai i ona fua.” (Isaia 65:21) “E lē fai mai foʻi se tasi ua nofo ai: ʻOu te maʻi.’”​—Isaia 33:24.

E ui i taumafaiga uma e puipuia ai i aso nei, ae e lē o taimi uma e mafai ai ona tatou ʻalofia mea e “tutupu faafuaseʻi,” pe ʻalofia le iai i se nofoaga sesē i le taimi sesē. (Failauga 9:11) Ua tele senituri o iai taua, faiga sauā ma faamaʻi, ma o loo faaauau ona maliliu ai tagata lelei. O le ā se faamoemoe mo ē ua aafia fua?

O le a toe soifua mai le faitau miliona o i latou ia, o ē o loo silafia e le Atua. O loo manatua i latou i le mafaufau lelei atoatoa o le Atua, ma o loo momoe i le taimi nei seʻia oo i le taimi e ō mai ai i fafo “i latou uma o loo i tuugamau.” (Ioane 5:28, 29) Ua faamautinoa mai i le Tusi Paia e faatatau i le toetū: “O lenei faamoemoe ua iā i tatou, ua avea o se taula i o tatou ola, e mautinoa ma mausalī.” (Eperu 6:19) Ua ʻsaunia foʻi e le Atua se faamaoniga mo tagata uma, ona ua ia toe faatūina Iesu mai i le oti.’​—Galuega 17:31.

I aso nei, e oo lava i ē o loo taumafai e faafiafia le Atua, o le a feagai foʻi ma popolega. Ae o le faia o gaoioiga talafeagai, mafuta vavalalata atu i le Atua i le tatalo, ma atiaʻe le faatuatua i le faamoemoe mo le lumanaʻi o loo taʻua i le Tusi Paia, ua mafai ai ona taulau manuia Paulo, Ianeta ma Alona e feagai ma popolega. E pei ona faia e le Atua iā i latou nei, “tau ina ia faatutumuina outou i le olioli uma ma le filemu e le Atua e aumaia ai le faamoemoe ona ua outou talitonu” iā te ia.​—Roma 15:13.