E eseese māfuaaga ua faamanatu ai e le faitau miliona i le lalolagi aoao le Kerisimasi. O nisi o le taimi lea e fiafia faatasi ai ma aiga ma uō, a o isi o le taimi lea e mafaufau ai i le Atua pe fesoasoani i tagata matitiva. O nei gaoioiga uma e lelei, peitaʻi e iai sona fesootaʻiga i itu lē lelei o le Kerisimasi.

Muamua, e talitonu i latou o loo faamanatuina le Kerisimasi o le aso lea na fanau ai Iesu. Peitaʻi, ua faaalia e nisi o tusitala o talafaasolopito, e lē o iloa tonu le aso na fanau ai Iesu. Ua taʻua i le tusi The Christian Book of Why, “na mumusu Kerisiano i le uluaʻi senituri e faatulaga se aso e faamanatu ai le fanau mai o Iesu.” Sa mananaʻo e “vavaeesea i latou lava mai i so o se faiga faapaupau.” O le mea moni, e augapiu ma se faamatalaga i le Tusi Paia e iloa ai na faamanatu e Iesu lona lava aso fanau, po o aso fanau o isi. Nai lo lea, na ia poloaʻia ona soo ia faamanatu le aso na maliu ai.​—Luka 22:19.

Lua, e talitonu le toʻatele o tagata atamamai, o le tele o tū o le Kerisimasi e lē faa-Kerisiano, ma na amata mai i ni aganuu faapaupau. E aofia ai le tamā o le Kerisimasi, laau Kerisimasi, fesuiaʻiga o meaalofa, tutuina o molīgaʻo, tautau pale teuteu i luma o fale, ma pesepesega o le Kerisimasi. E tusa ai ma nei tū masani, na taʻua i le tusi The Externals of the Catholic Church: “Pe a tatou avatu pe maua se meaalofa o le Kerisimasi, ma tautau ni pale i o tatou fale ma falesā, e toʻafia nisi o i tatou e iloa atonu o loo tatou faamanatuina ni tū faapaupau?”

Ae atonu e te taumānatu, po o le ā le afāina o le faia o nei mea auā e foliga mai o ni mea e lelei. Peitaʻi, e maua le tali i le manatu lona tolu lenei. E inosia e le Atua le faafilogia o le tapuaʻiga mamā ma tū faapaupau. E ala mai i lana perofeta o Amosa, na fetalai atu le Atua i tagata tapuaʻi lē usiusitaʻi i Isaraelu anamua: “Ua ou ʻinoʻino, ua ou teena a outou tausamiga . . . Ia aveese mai iā te aʻu le taalili o au pese.”​—Amosa 5:21, 23.

Aiseā e matuā malolosi ai na faaupuga? Seʻi iloilo le mea na faia e tagata o le malo i mātū o Isaraelu anamua. Na faia e lo latou tupu o Ierepoamo ni tamaʻi povi auro se lua, ma tuu le tasi i Tanu a o le isi i Peteli. Sa ia uunaʻia tagata ia tapuaʻi atu i nei povi auro nai lo o le tapuaʻi atu iā Ieova i le malumalu i Ierusalema. Na faia foʻi e le tupu ni tausamiga ma tofia ni ositaulaga e fesoasoani i tagata e faamanatu nei tausamiga.​—1 Tupu 12:26-33.

O nei mea na faia e tagata Isaraelu na foliga mai e lelei. Auā sa latou faia nei gaoioiga uma ma le manatu e tapuaʻi ai i le Atua ma faafiafia o ia. Ae na faaalia i fetalaiga a le Atua e ala mai i le perofeta o Amosa ma isi perofeta, lona finagalo e faatatau i na gaoioiga. Na fetalai le Atua i le Malaki 3:6: “O aʻu o Ieova; ou te lē liliu lava.” Pe e tatou te lē iloa mai ai i inei, faalogona o le Atua e tusa ai o le faamanatuina o le Kerisimasi?

E toʻatele ua filifili e faamamao mai i le faamanatuina o le Kerisimasi, ina ua latou iloiloina faamatalaga moni o loo taʻua i luga. Peitaʻi, ua latou maua le fiafia ma le faamalieina moni, i le faaalu o lo latou taimi e fiafia ai ma uō ma aiga, ma fesoasoani i tagata matitiva i so o se taimi o le tausaga.