O LENEI alagāupu ua masani ai tagata i Aferika i Sasaʻe, ma ua faaalia mai ai le manatu o loo iai i le toʻatele o tagata i le lalolagi. Pe e faapena ou faalogona e faatatau i le aitalafuina o tupe mai i sau uō po o se isi? E ui e foliga mai e lelei le aitalafu i nisi taimi, ae pe e talafeagai lea faiga? O ā ni lamatiaga o le aitalafu?

Ua faailoa mai foʻi i se isi alagāupu i le gagana Swahili le lamatiaga o le aitalafu. Ua faapea mai: “O le aitalafu ma le nonō atu e faaleagaina ai se faigāuō.” E tusa pe e iai ni māfuaaga talafeagai na faia ai e se tasi se aitalafu, ma sa iai sana auala e toe totogi atu ai, ae e iai lava tulaga lē faatalitalia e ono tulaʻi mai. O se faataʻitaʻiga, e ono lē fiafia lē e ana le tupe pe afai ua mavae le aso na tatau ona totogi atu ai, ae e leʻi totogiina atu lava. O le a tulaʻi mai ni feeseeseaʻiga i le va o lē e ana le tupe ma lē na aitalafu, ma e ono aafia ai foʻi o la aiga. O lea, talu ai o le faia o aitalafu e ono iʻu ai ina feeseeseaʻi ma isi, e ao la ona tatou taumafai e ʻalofia le faia o ni aitalafu.

O le aitalafu o tupe e mafai foʻi ona aafia ai le faiā a se tasi ma le Atua. E faapefea? Ua taʻua i le Tusi Paia, o sē e aitalafu ae e lē manaʻo e toe totogi atu le tupe, o ia o se tagata amioleaga. (Salamo 37:21) O loo taʻua manino foʻi i le Faataoto 22:7: “E fai ma auauna le tagata aitalafu i le tagata na nonō mai ai.” E tatau ona iloa e le tagata o loo aitalafu, e faatoʻā saʻoloto o ia pe a uma ona totogi atu le tupe. Ua faapea mai se isi alagāupu faa-Aferika: “Pe a e aitalafuina vae o se tagata, e te mulimuli lava i le mea e taʻitaʻi ai oe e lenā tagata.” O lona uiga, e lē pule lē na aitalafu i le mea e fai, ae e tatau ona mulimuli i le maliega na faia ma lē e ana le tupe.

O lea la, e ao ona totogi muamua aitalafu ina ia ʻalofia ai feteenaʻiga. O le faaputuputu o aitalafu e iʻu ai i le soona popole, lē lelei le moe, galue ovataimi, misa i va o ulugalii, malepelepe aiga, ma molia i le tulafono. E atamai tele la le fautuaga i le Roma 13:8: “Aua neʻi o outou nofo  aitalafu i se tagata ae e tau lava o le alofa o le tasi i le isi.”

E tusa ai o nei manatu na iloiloina, e tāua tele ona faaeteete pe a faia aitalafu. Ia fesili ifo: Po o manaʻomia moni lava ona ou faia se aitalafu? Po o oʻu aitalafu ina ia tausia ai loʻu aiga? Pe e māfua ona o loʻu matapeʻapeʻa, ma manaʻo ia maua mea ou te lē o gafatia? O le mea moni, e sili atu le lotomalie i mea ua mafai ona e maua.

E moni e iai lava tulaga lē maʻalofia e tulaʻi mai ma e ono manaʻomia ai ona faia se aitalafu. Peitaʻi, e tatau lava i lē ua mafaufau e fai se aitalafu ona gaoioi ma le faamaoni. E faapefea?

Muamua, ia aua neʻi o tatou faaaogāina se tasi ona e faapea e tamaoaiga atu nai lo o isi. Ia ʻalofia le manatu e tatau i ē e tamaoaiga ona fesoasoani mai iā i tatou i le itu tautupe, ma e lē afāina pe a tatou lē totogiina atu a latou tupe. E lē tatau ona tatou matauʻa i olaga o i latou e foliga mai o loo maua mea.​—Faataoto 28:22.

Peitaʻi, ia faamautinoa e vave ona toe totogi atu lau aitalafu. Afai e lē taʻuina mai e lē e ana le tupe se aso e manaʻomia ona totogi ai le aitalafu, ia tausolomua oe e taʻu atu se aso patino ma ia tausisi i au upu. E lelei foʻi ona iai se lua maliega tusitusia ina ia ʻalofia ai le feeseeseaʻi o manatu. (Ieremia 32:9, 10) Afai e mafai, ia e alu saʻo i le tagata e ana le tupe e totogi i ai ma faafetai i ai. O le faaalia o le faautauta i le totogiina o lau aitalafu o le a maua ai ni faiā lelei. Na fetalai Iesu i lana Lauga i le Mauga: “A ia avea la outou upu o le Ioe, ia Ioe; ma le Leai, ia Leai.” (Mataio 5:37) E lē gata i lea, ia manatua le Tulafono Faaauro: “O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.”​—Mataio 7:12.

Ua aumaia i le Tusi Paia se vaifofō faigofie pe afai ua tatou mananaʻo e aitalafu se tupe. Ua taʻua i le 1 Timoteo 6:6: “E moni, e tele mea e maua mai le faamaoni i le Atua ma le lotomalie.” I nisi faaupuga, o le iai o se uiga lotomalie, o le auala sili lea e ʻalofia ai āuga tigā ona o le faia o aitalafu. Peitaʻi, e lē faigofie ona maua le lotomalie i lenei lalolagi ua tumu i tagata e mananaʻo e vave faamalie o latou manaʻoga. O i inā la e manaʻomia ai le “faamaoni i le Atua.” I le ā le itu?

O se faataʻitaʻiga, na faaamuia se ulugalii i Asia i tagata na maua o latou lava fale. O lea na la filifili ai e faatau so la fale e faaaogā ai la laʻua teugātupe, faapea tupe na nonō mai i le faletupe ma o la tauaiga. Peitaʻi, e leʻi umi ae o la lagona le mamafatū o le avega o le totogiina o aitalafu. Na alu uma lo la taimi e galulue ovataimi ai ma lē maua ai se mafutaga ma le la fanau. Na faapea mai le tane: “Na ou lagona e pei o loo oʻu tauaveina se maa telē i loʻu ulu, ona o le popole, mafatia ma le lē lava o le moe. Na matuā mamafatū la ma avega.”

Mulimuli ane, na manatua e lenei ulugalii upu o loo i le 1 Timoteo 6:6, ma filifili loa e faatau ese atu le fale. Na faatoʻā uma ona totogi a la aitalafu ina ua mavae le lua tausaga. Na aʻoaʻoina e lenei ulugalii se lesona mai i le mea na tupu ma faapea mai: “O le iai o se vaaiga faaleagaga e tusa ai o meafaitino, o le a avea lea o se puipuiga.”

Ua masani le toʻatele i le alagāupu a le gagana Swahili lea na taʻua i le amataga. Peitaʻi, e lē o taofia ai tagata mai i le faia o aitalafu. E tusa ai o mataupu silisili o le Tusi Paia na tatou iloiloina, e atamai tele ona tatou manatunatu loloto i le fesili lenei, Pe e tatau ona ou aitalafu tupe?