O loo taʻua manino i le Tusi Paia na toe faatūtū e Iesu tagata na feoti. O na tala e lē o ni talafatu, auā o loo taʻua nofoaga ma taimi tonu na tutupu ai. O se faataʻitaʻiga, i le tau māfanafana i le 31 T.A., na malaga faatasi atu ai Iesu ma se motu o tagata mai i Kapanaumi agaʻi i Naina. Ina ua taunuu atu, sa iai foʻi se isi anoano o tagata i inā. E mautinoa e te talitonu i le toe faatūina mai e Iesu o se tagata i inā, ona o loo faamauina i le Afioga a le Atua. E lē gata i lea, o tagata uma na iai na molimauina lenā mea na tupu.​—Faitau le Luka 7:11-15.

Na toe faatūina foʻi e Iesu lana uō o Lasalo, o lē ua fā aso talu ona oti. E mautinoa e te talitonu i le mea na faia e Iesu i lenā aso, auā e toʻatele na molimauina lenā mea na tupu.​—Faitau le Ioane 11:39-45.

Na faatutū e Iesu tagata ona na uunaʻia o ia e lona alofa mutimutivale. E lē gata i lea, ina ia faaalia ai o lona Tamā o le Puna o le ola, lea na tuuina atu le mana iā te ia e faatutū ai tagata mai i le oti.​—Faitau le Ioane 5:21, 28, 29.

O le toe faatutūina e Iesu o i latou na feoti, ua tatou maufaatuatuaina ai ana folafolaga mo le lumanaʻi. O le a ia faatutūina le toʻatele o tagata, e aofia ai tagata amiolētonu o ē e lē iloa le Atua moni. O le a maua e i latou na le avanoa e aʻoaʻoina ai e faatatau iā Ieova le Atua ma alolofa iā te ia.​—Faitau le Galuega 24:15.