Ua faailoa manino mai i le Tusi Paia le gaoioiga o le a faia e Ieova ma lona Alo o Iesu Keriso, i mea leaga lea e faapogaia e Satani le Tiapolo. Ua faapea mai le Tusi Paia: “O le mea lea ua faaali mai ai le Alo o le Atua, [Iesu] ina ia faalēaogāina ai galuega a le Tiapolo.” (1 Ioane 3:8) Ua faia aʻe lenei faiga o mea i le matapeʻapeʻa, le feitagaʻi ma faanaunauga leaga lea o le a tafiesea. O “le pule o lenei lalolagi” po o Satani le Tiapolo, ua folafola mai e Iesu “o le a tuliesea.” (Ioane 12:31) O le a faia aʻe se lalolagi fou amiotonu, lea o le a avea ma nofoaga filemu e a aunoa ma ni aafiaga leaga mai iā Satani.​—2 Peteru 3:13.

O le ā o le a tupu i tagata e lē mananaʻo e suia o latou ala, ae faaauau pea ona faia mea leaga? Seʻi manatu i le folafolaga lenei: “Auā o ē e amio saʻo e latou te mau i le lalolagi, ma o ē e lē ponā e faatotoeina i le lalolagi. Ae e faaumatia o ē e amioleaga mai i le lalolagi; e liaʻieseina foʻi o ē e amio faapiʻopiʻo.” (Faataoto 2:21, 22) O lea, o le a lē toe iai ni aafiaga mai i tagata leaga. I lenā taimi filemu, o le a faasolosolo ona tuusaʻoloto foʻi tagata usiusitaʻi mai i āuga o le lē lelei atoatoa.​—Roma 6:17, 18; 8:21.

E faapefea ona aveesea e le Atua mea leaga i le lalolagi i le lumanaʻi? E na te lē faia tagata e pei o ni masini, pe e aveese foʻi le meaalofa o le filifiliga saʻoloto. Nai lo lea, o le a ia aʻoaʻoina tagata usiusitaʻi i ona ala, ma fesoasoani iā i latou e liliuese mai i o latou manatu ma gaoioiga leaga.

O le ā o le a faia e le Atua i puapuaga e leʻi faatalitalia? Ua folafola mai e le Atua ua toeitiiti ona pulea lea e lona Malo o mea i le lalolagi. O le Tupu tofia o lenā Malo o Iesu Keriso, e iai lona mana e faamālōlō ai maʻi. (Mataio 14:14) E iai foʻi iā Iesu le mana e pulea ai le malosi faalenatura. (Mareko 4:35-41) O lea, o le a lē toe iai ni mafatiaga e tutupu i “taimi e leʻi faatalitalia.” (Failauga 9:11) I le pulega a Iesu, o le a lē toe iai ni mala e aafia ai tagata.​—Faataoto 1:33.

Ae faapefea le faitau miliona o tagata lelei ua maliliu? A o leʻi toe faatūina lana uō o Lasalo, na fetalai atu Iesu e faapea: “O aʻu o le toetū ma le ola.” (Ioane 11:25) Ioe, e iai iā Iesu le mana e faatutū pe toe faafoʻisia ai le ola ia i latou ua maliliu.

Pe afai e logolelei iā te oe le ola i se lalolagi e lē toe aafia ai tagata lelei i mea leaga, aiseā e lē fai ai mo ou sini le aʻoaʻo atili e faatatau i le Atua moni ma lana fuafuaga, e ala i le suʻesuʻeina o le Tusi Paia? E fiafia Molimau a Ieova i lou vaipanoa e fesoasoani atu iā te oe, ina ia maua lenā malamalamaga. E mafai ona e faafesootaʻi i latou, pe e tusi atu foʻi iā i latou na lomia lenei mekasini.